Amĭ kkiêng leh anăn hriê kơ prŏng ti ƀuôn sang mâo knhuah gru krŭ kdơ̆ng Nghệ An, Hoàng Ngọc Linh kkiêng thŭn 1982, leh ruê̆ hriăm gưl 3, čŏng čih hră nao mŭt kahan. Mjưh ruê̆ dua thŭn nao ngă bruă čuăn lĭng kahan, ñu lŏ dơ̆ng tui hriăm ti sang hră nai êa drao kahan 2 ƀuôn prŏng Hồ Chí Minh.  Hriăm ruê̆ hŏng hră bi mklă hriăm thâo, ñu dưi tiŏ nao mă bruă ti anôk bruă lĭng kahan răng mgang knông lăn čar Gia Lai. Thŭn 2018, Hoàng Ngọc Linh dưi tiŏ nao mă bruă ti Kđông kahan răng mgang knông lăn Ia R’Vê, kdriêk Ea Sup, čar Dak Lak klam bruă kriê dlăng adŭ ksiêm mkă hluê knhuah lĭng kahan, ngă bruă kriê dlăng klei suaih pral kơ phung knuă druh lĭng kahan ti kđông leh anăn mnuih ƀuôn sang hlăm să. Thượng úy Hoàng Ngọc Linh brei thâo:"Klei mdê êdi ti krĭng knông lăn kơ yan hjan snăn kreh mâo klei ruă êngoh bi ƀlĕ êrah; bi yan không snăn ruă tian eh, klei ruă hlăm êlan bi êwa… leh anăn grăp hruê mâo mơ̆ng 10-15 čô nao ksiêm mkă leh anăn hmei mdrao hlao. Grăp thŭn kƀĭn mbĭt snăn mâo êbeh 4000 čô mnuih ruă dưi hmao mdrao. Wăt tơdah jing lu mnuih ƀiădah đru kơ klei suaih pral mnuih ƀuôn sang snăn jih jang ayŏng adei hmei mơak leh anăn gĭr. Mbĭt hŏng bruă jih ai tiê ksiêm mkă snăn ayŏng adei lŏ hâo hưn mtô mblang kơ mnuih ƀuôn sang bi mdoh pưk sang, tŭk ksă mnăm ktơ̆ng… rơ̆ng klei suaih pral.”

Vi Văn Ngút 67 thŭn, să Ia R’Vê, kdriêk Ea Sup brei thâo, alŭ kbưi hŏng kdriêk Ea Sup truh êbeh 60 km, êlan klông dleh găn êrô, boh nik hlăm yan hjan, Mơ̆ng leh mâo adŭ ksiêm mkă hlue knhuah kahan Kđông kahan răng mgang knông lăn ia R’Vê, mnuih ƀuôn sang amâo lŏ nao ksiêm mkă mdrao mgŭn ti anôk kbưi ôh. Amâo djŏ knŏng dŭm năn ôh, knuă druh aê mdrao drao kahan lŏ gĭr nao truh ti sang mnuih ƀuôn sang čiăng ksiêm mkă, mdrao kơ mnuih ruă khua thŭn, ruă kjham… Ăt kyua mâo adŭ ksiêm mkă anei leh anăn aê mdrao Hoàng Ngọc Linh anăn phung mâo klei ruă amâo thâo hlao msĕ si mô̆ ñu dưi lŏ êbat hiu. Vi Văn Ngút brei thâo:"Mô̆ kâo mâo klei ruă hlăm klang rŏng gưl knhal tuič, sang êa drao lač diñu amâo dưi mdrao hlao ôh, mô̆ kâo amâo dưi lŏ êrô êbat ôh. Hmư̆ lač ti adŭ ksiêm mkă hlue knhuah kahan mâo aê mdrao Linh dưi mdrao hlao anăn kâo ba mô̆ nao ksiêm mkă. Mơ̆ng klei mdrao mgŭn hlăm brô 18 hruê snăn mô̆ kâo dưi ƀiă, dưi êrô êbat. Jih gŏ sang mơak snăk.”

Ia R'vê jing să knông lăn kbưi hĭn mơ̆ng kdriêk Ea Sup, hŏng 6.800 čô mnuih hlăm 28 djuê ana ayŏng adei hdĭp mda. Bruă duh mkra dleh dlan ngă kơ bruă kriê dlăng klei suaih pral mnuih ƀuôn sang adôk lu klei kƀah. Hlue si Lê Văn Hoàng Lâm –  Khua Knơ̆ng bruă sang čư̆ êa să Ia R’Vê, dŭm thŭn êgao, adŭ ksiêm mkă mdrao mgŭn hlue knhuah kahan ti Kđông kahan răng mgang knông lăn Ia R’vê ngă leh jăk bruă ksiêm mkă, mdrao kơ mnuih ƀuôn sang ti knông lăn. Thượng úy Hoàng Ngọc Linh mâo leh lu mnuih ƀuôn sang dŭm djuê ana khăp čiăng."Hoàng Ngọc Linh jing sa čô aê mdrao jih ai tiê hŏng bruă ksiêm mkă mdrao kơ mnuih ƀuôn sang. Grăp blư̆ mâo mnuih ƀuôn sang akâo snăn amâo uêñ kơ hruê mlam amâodah êlan klông taih kbưi nao đru kơ mnuih ƀuôn sang. Mbĭt hŏng bruă ksiêm mkă, ñu lŏ hâo hưn kơ mnuih ƀuôn sang bi mdoh wăl hdĭp mda, tŭk knă bi doh êƀăt, hưn kơ hdră gang mkhư̆ Covid-19 mjing klei đăo knang hlăm mnuih ƀuôn sang…”

Hŏng klei gĭr hlăm hdră mă bruă, Thượng úy quân y Hoàng Ngọc Linh mâo lu gưl, dhar bruă mđup brei klei pah mni yuôm bhăn. Ƀiădah hŏng ñu, klei mơak prŏng hĭn jing mâo ƀĭng kahan, mnuih ƀuôn sang dŭm djuê ana khăp čiăng đăo knang, hrăm mbĭt đru mkŏ mjing krĭng knông lăn ƀrư̆ hruê ƀrư̆ mdrŏng sah jăk siam./.