Mta bruă mrô 8 mâo ngă leh hŏng klei jăk, djŏ guôp hŏng grăp alŭ wăl, mâo klei bi  mlih prŏng hlăm krĭng mnuih djuê ƀiă lehanăn krĭng čư̆ čhiăng.

Hŏng hdră bi hmô mâo leh mơ̆ng êlâo, mđĭ klei thâo săng, dŭm êpul hgŭm msĕ si “Pô kiă kriê kơ klei bi mlih” lehanăn “pul hâo hưn hlăm yang ƀuôn” jing leh phung knơ̆ng kơ bruă bi lar klei kreh knhâo. Mơ̆ng dŭm klei bi mguôp bi trông, mdah hlăm klei kdŏ muiñ hŏng dua klei blŭ djuê lar lehanăn djuê ƀiă, mâo klei čiăng mtă kơ klei mtăp mđơr êkei mniê, klei amâo mâo jăk mơ̆ng klei bi dôk ung mô̆ mơ̆ng mda, klei bi dôk anak amiêt awa, lehanăn klei ngă jhat hlăm găp djuê hlăm ƀuôn sang. Klei bi hmô mơ̆ng ƀuôn Chùa ti (Quảng Trị) amâodah ti Huổi Ho (Điện Biên), klei bi ldôk ung mô̆ mơ̆ng mda, klei bi dôk anak amiêt awa sa êrah hrŏ leh êdi, lu phung hđeh mniê mâo mđĭ ai lŏ wĭt nao sang hră. Adei Hồ Thị Bảy ti ƀuôn Chùa, ƀuôn hgŭm Hiếu Giang, Quảng Trị lač:

“Klei hâo hưn hrue anei, đru leh kơ kâo mđĭ hĭn klei thâo săng, lehanăn thâo hdră răng kriê kơ asei mlei pô. Thâo hdră ñĕ đuĕ mơ̆ng klei amâo mâo jăk hlăm yang ƀuôn, pô tui duah klei hdĭp jăk ênuah ênô hĭn. Mơ̆ng anăn kâo thâo kơ hđeh ka bŏ thŭn đĭ prŏng, snăn bruă tal êlâo jing hriăm hră mơar, dăm tui tiŏ klei bi ƀô bi khăp ôh. Kâo čang hmăng mơ̆ng klei hâo hưn hrue anei amâo mâo djŏ knŏng đru hjăn kơ kâo, ƀiădah kơ jih jang ƀĭng găp mkăn”.

Bruă đru kơ klei duh ƀơ̆ng, mkŏ mjing leh êpul bi hgŭm, hdră brei čan prăk mbha wir, mjuăt bi hriăm bruă knuă, lehanăn tui duah anôk čhĭ mnia boh mnga pô mâo. Mơ̆ng bruă rông ŭn jŭ, rông bê, pla mjing ana êa drao, bruă giêng đêč, thâodah bruă hiu čhưn ênguê hlăm yang ƀuôn, phung mniê lŏ mâo leh ênoh ba wĭt hơĭt. Klei anei amâo mâo djŏ knŏng đru bi hrŏ ƀun, mđĭ klei hdĭp mda ƀiădah lŏ mđĭ k’hưm, klei blŭ mơ̆ng phung mniê hlăm yang ƀuôn.

Klei đru kơ phung mniê lehanăn kơ hđeh dôk hlăm klei hdĭp dleh dlan, mâo msĕ si: “Amĭ rông”, “klei đru prăk hriăm hră” hră ênua mdrao mgŭn, amâodah mkŏ mjing “Sang h’uh mđao klei khăp” jing leh anôk jưh knang kjăp kơ phung dôk hlăm klei dleh dlan. Jih jang bruă anăn bi êdah klei thâo khăp prŏng, đru kơ phung mniê lehanăn kơ phung hđeh lŏ mâo dŭm klei găl kpưn đĭ, ñu kmă lehanăn mđĭ kyar.

Klei bi hmô kơ knuă druh êpul hgŭm lehanăn kơ yang ƀuôn: Mâo dŭm gưl mjuăt bi hriăm kơ klei hâo hưn, kơ klei kiă kriê bruă knuă, klei ba yua kdrăp mrâo hlăm phung knuă druh, lehanăn phung knơ̆ng čiăng mâo klei thâo hlăm bruă knuă, lehanăn dưi bi lar ngă nanao bruă knuă hŏng klei kjăp. Bruă jih jang êpul hgŭm mniê ti dŭm boh ƀuôn hgŭm hlăm knông lăn Lào Cai mâo mprăk leh computer, masin kđăp boh hră jing dŭm klei tôhmô kơ bruă bi mlih mrô hlăm êpul hgŭm bruă, kñăm mđĭ hĭn klei tŭ dưn bruă knuă.

Čiăng kơ dŭm mta bruă mơ̆ng hdră êlan mrô 8 mâo boh tŭ dưn dưi hlue ngă, lehanăn lar bra hlăm djăp anôk, snăn tui si Nguyễn Thị Minh Hương, K’iăng khua Êpul hgŭm bruă mniê Việt Nam, dŭm gưl êpul hgŭm kreh bi ksiêm wĭt, mđĭ klei găl, thâo ƀuh klei awăt mơ̆ng dŭm bruă bi hmô. Mơ̆ng anăn, mkăp êpul knuă druh kjăp, thâo kơ bruă, lehanăn mâo hră mơar ktrâo atăt, mjing klei găl kơ bruă bi lar.. Êngao kơ bruă mjuăt bi hriăm kjăp knuă druh mă bruă hlăm klei kiă kriê, hlăm klei hâo hưn boh nik hŏng phung knuă druh nah gŭ. Snăn lŏ mđing hĭn bruă hlăm yang ƀuôn, tinei klei kơ phung mniê, lehanăn kơ mnuih ƀuôn sang čiăng dưi bi mguôp hlăm jih bruă mâo, dơ̆ng mơ̆ng kčĕ đru kơ klei mĭn, lehanăn ngă bruă amâo mâo mdei. Klei bi mguôp kjăp mơ̆ng yang ƀuôn jing leh boh kdrŭt yuôm bhăn mơ̆ng djăp bruă bi hmô. Nguyễn Thị Minh Hương lŏ brei thâo:

Dlăng kluôm hmei dưi ƀuh mâo klei kiă kriê kjăp mơ̆ng gưl dlông, djăp alŭ wăl dưi păn kjăp bruă knuă, hluê ngă djŏ guôp hŏng alŭ wăl pô mdê mdê. Lu ênoh čuăn dưi djăp lehanăn jing kdlưn hĭn hŏng hdră kčah, lehanăn dŭm klei bi mlih jăk kơ knhuah mĭn, hdră mă bruă mơ̆ng mnuih ƀuôn sang, hlă\m anămn mâo phung mniê lehanăn wăt phung êkei, mơ̆ng mnuih prŏng hlŏng kơ phung hđeh, mơ̆ng anăn mơh dưi đru leh hlăm bruă mghaih msir dŭm mta klei yang ƀuôn dôk čiăng, lehanăn mđĭ hĭn klei mtăp mđơr êkei mniê krĭng mnuih djuê ƀiă lehanăn krĭng čư̆ čhiăng.

 Mta bruă mrô 8 amâo mâo djŏ knŏng jing bruă nga mă ệjai ôh, ƀiădăh srăng jign bruă ngă nanao hlăm klei mtăp mđơr êkei mniê, lehanăn mđĭ k’hưm kơ phung mniê đru mguôp hlăm bruă mđĭ kyar kjăp krĭng mnuih djuê ƀiă lehanăn krĭng čư̆ čhiăng. Hŏng klei kñăm mđĭ hĭn hnơ̆ng kjăp, lehanăn bi lar hdră bi hmô, dŭm klei tŭ dưn mơ̆ng klei mtăp mđơr êkei mniê srăng dưi lar bra hlăm djăp ƀuôn êlan, đru kơ phung mniê mđĭ hĭn klei thâo pô, mđrăm mbĭt rŭ mdơ̆ng kơ klei hdĭp êdei anăp jăk mơak, mngač tač lehanăn mdrŏng sah./.