Pô bi ala Nguyễn Xuân Nghiêm, êpul mơ̆ng Đà Nẵng lač, bi mguôp pă hdră ala čar kñăm jing 1 hdră kluôm jing sa klei bi mlih prŏng amâo djŏ knŏng kơ ênoh hdră bruă ƀiădah jing klei bi mlih hdră mkŏ mjing hluê ngă hdră mđĭ kyar ti dŭm alŭ wăl dleh dlan. Kyua anăn, klei bhiăn kluôm anăn jing bi mguôp brei klă sĭt; amâo dưi bi hrŏ hnơ̆ng mđing tal êlâo hŏng dŭm alŭ wăl, phung dôk dleh dlan; mbĭt anăn, mbha gưl brei nao mbĭt hŏng klei dưi, ai dưi leh anăn boh tŭ hdră bruă brei dưi mkă hŏng boh tŭ klă sĭt:

Tơdah bi mklă leh anei jing sa hdră kñăm ala čar knŏng sa snăn brei mâo sa mta kñăm mbĭt, sa hdră êlan phŭn bi sa hnơ̆ng, sa klei bhiăn mkŏ mjing klei găl leh anăn sa hdră kriê dlăng bi sa hnơ̆ng. Kâo amâo mâo bi mĭn ôh klei bi mguôp amâo mâo jing lăm lui hĕ dŭm mta kñăm, phung ngă bruă amâodah hdră êlan mdê hjăn mơ̆ng grăp mta bruă, mklăk hŏng anăn dŭm hdră êlan mdê hjăn ăt brei dưi răng mgang, ƀiădah hdră mkŏ mjing hdră kčah, mkŏ mjing klei găl, mkŏ mjing hdră hluê ngă, ktuê dlăng leh anăn ksiêm dlăng brei mâo klei bi sa hnơ̆ng. Boh nik bi mguôp brei mjing klei dưi mkăp brei ngăn prăk jăk hĭn amâo djŏ knŏng bi mguôp ngăn prăk.

Hluê si pô bi ala Nguyễn Thị Yến Nhi, êpul mơ̆ng Vĩnh Long, klei mĭn mơ̆ng hdră ala čar kñăm brei mlih ktang hluê hdră Knŭk kna đru čiăng kơ mnuih ƀuôn sang čŏng pô mđĭ kyar. Kyua klei bi hrŏ ƀun h'ĭt kjăp brei dưi mkă hŏng boh tŭ dưn (leh đru, mnuih ƀuôn sang mâo bruă mă amâodah hơăi, hnư hrui wĭt dưi mđĭ amâodah hơăi, mâo hdră duh ƀơ̆ng hơĭt kjăp leh anăn dưi čŏng pô krơ̆ng kjăp amâodah hơăi:

Brei mđing tal êlâo dŭm hdră bruă mkŏ mjing bruă mă, mđĭ hnư hrui wĭt, bi hgŭm mkra mjing, mnia mblei, mjuăt bi hriăm bruă mguôp hŏng klei čiăng mơ̆ng wăl anôk mnia mblei, bi mlih mrô, mnia mblei điện tử, mđĭ kyar mnơ̆ng dhơ̆ng mdê hjăn, hiu čhưn ênguê êpul êya, hiu čhưn ênguê bruă lŏ hma, hiu čhưn ênguê dhar kreh. Kâo akâo hlăm klei ksiêm dlăng hdră bruă brei bi mlih hŏng klei kjăp, amâo mă ênoh prăk brei čan jing hnơ̆ng mkă kdlưn hĭn mơ̆ng klei tŭ jing. Sa hdră bruă brei čan 100% ƀiădah leh ruĕ mnuih ƀuôn sang ăt ƀun, gru hmô amâo dưi rơ̆ng kjăp snăn amâo dưi yap jing tŭ jing ôh. Mklăk hŏng anăn, sa hdră bruă đru kơ mnuih ƀuôn sang mâo hdră duh ƀơ̆ng, mđĭ hnư hrui wĭt tlaih ƀun hơĭt kjăp leh anăn čŏng pô ngă leh klei đru anăn yơh jing boh tŭ klă sĭt.

Mñă klă, klei tŭ jing mơ̆ng hdră bruă brei dưi ksiêm dlăng hŏng tlâo klei bi mlih: Mơ̆ng kriê dlăng lu jơr jing kriê dlăng bi mguôp; mơ̆ng kriê dlăng phŭn mkăp jing kriê dlăng hluê boh tŭ; mơ̆ng gưl dlông bi mklă lu bruă klă klơ̆ng jing alŭ wăl čŏng pô, đua klam leh anăn dưi ksiêm dlăng hŏng boh tŭ. Pô bi ala Bùi Văn Dũng, êpul mơ̆ng Thanh Hoá lač:

Kâo tŭ ư hŏng klei bhiăn alŭ wăl bi mklă, alŭ wăl mkŏ mjing hluê ngă lehanăn tŭ đua klam kơ boh tŭ dưn. Gưl dlông kiă kriê hdră kñăm, hdră êlan, hnơ̆ng čuăn lehanăn ksiêm dlăng, ktuê dlăng. Ƀiădah mbha gưl brei klă sĭt, jao bruă klam brei nao mbĭt hŏng klei dưi bi mklă lehanăn klei dưi bi liê ngăn prăk. Brei mlih mơ̆ng gưl dlông kiă kriê hdră ngă bruă jing gưl dlông kiă kriê hdră kñăm, hnơ̆ng čuăn lehanăn boh tŭ dưn. Lehanăn kâo akâo kơ knŭk kna brei jao kơ sa anôk bruă ngă khua gĭt gai hdră bi mŭt anei.

Pô bi ala Lý Thị Lan, êpul Tuyên Quang akâo bi klă hĭn klei dưi čŏng pô mơ̆ng alŭ wăl hlăm klei ruah hdră hluê ngă. Dŭm bruă thơ̆ng kơ bruă, hdră mnêč mâo gưl să ka djăp klei thâo snăn gưl čar brei mâo bruă klam ktrâo lač, đru. Kơ klei čuăn alŭ wăl brei rơ̆ng mkăp djăp prăk bi liê hlăm hdră duh bi liê knŭk kna wưng man dưn, tĭng mkă ngăn prăk grăp thŭn hluê si hnơ̆ng ƀiă hĭn, pô bi ala lač klă:

Hŏng dŭm čar krĭng čư̆ čhiăng, krĭng knông lăn, krĭng mnuih djuê ƀiă ka dưi bi kna ôh ngăn prăk. Kâo mĭn hdră mtrŭn anei brei dưi tĭng mkă hĭn, dŭm alŭ wăl anei kreh mâo ênoh mnuih dưi dưn prŏng, klei čiăng duh bi liê lu kyua anăn phŭn mkăp gưl dlông mbha prŏng. Tơdah bi mklă klei bi mguôp hluê ênoh prăk gưl dlông jao snăn ênoh klă klơ̆ng alŭ wăl brei mkăp mđĭ, hlăk êjai klei dưi bi kna ngăn prăk lŏ dleh dưi ksiêm dlăng năng ai gưl dlông mbha leh phŭn mkăp ƀiădah alŭ wăl dleh dưi ba yua jih kyua amâo dưi rơ̆ng prăk bi mguôp.

Hưn mthâo, bi mklă klei phung bi ala mrâo lač, Khua phŭn bruă ngăn prăk Ngô Văn Tuấn brei thâo:

ăt krơ̆ng kjăp ai dưi mơ̆ng pă hdră mâo leh Bruă kƀĭn ala bi mklă. Prăk knŭk kna gưl dlông srăng đru kơ dŭm alŭ wăl amâo čŏng bi tĭng mkă ôh, amâodah mâo tĭng mkă leh ƀiădah amâo mâo đru mguôp kơ Gưl dlông ôh. Mbha lehanăn đru mơ̆ng Gưl dlông snăn hluê si klei bhiăn, tĭng kơ hnơ̆ng dleh dlan, tĭng kơ êwang bi kpleh plah wah ară anei lehanăn mta kñăm kčah mtrŭn, hlăm anăn mâo klei mđing dlăng kơ hnơ̆ng ngă bruă, boh tŭ dưn kriê dlăng ba yua ngăn prăk. Lehanăn boh nik hlăm Hră čih Hdră mtrŭn ăt bi mklă, boh nik klei mđing dlăng hŏng mnuih djuê ƀiă krĭng čư̆ čhiăng.