Mâo “mnuih ƀuôn sang jưh knang, Đảng ruah” thŭn anei jing wưng tal dua leh Đỗ Hiền Lương klam ngă khua bruă Đảng alŭ mrô 2 ti wăl krah Sa Thầy, kdriêk Sa Thầy. Čiăng dưi bi leh bruă klam jing khua bruă Đảng hŏng 67 čô đảng viên lehanăn khua alŭ ti krah kdriêk, mâo bruă klam prŏng kơ klei mđĭ kyar bruă lŏ hma, lehanăn jing anôk bi mnia mblei, tui si Lương, brei klă sĭt jing mnuih kơ   Đảng, kơ mnuih ƀuôn sang, jing anôk phŭn kơ klei bi mguôp:

 “Hŏng lu bruă hlăm ƀuôn sang, amâo mâo lŏ čih yap hrue mmông ôh, ya bruă mâo hlŏng nao ngă mtam. Mnuih ƀuôn sang jưh knang kơ pô snăn pô lŏ bi wĭt klei digơ̆ knang kơ pô, đru mghaih msir djăp mta bruă, boh nik klei mnuih ƀuôn sang lĕ hlăm klei amâo mâo thâo bi djŏ hdơ̆ng găp, amâodah klei amâo mâo plah wah alŭ anei hŏng alŭ adih. Mơ̆ng leh mâo kâo đru mghaih msir djăp mta boh klei truh kơ ară anei ka lŏ tuôm mâo ôh klei nah dlông ƀuah ăl. Snăn jing jih jang bruă mâo klei jăk sơăi”.

Čiăng dưi ngă jih bruă bi klin khua bruă Đảng, hlŏng klam ngă khua alŭ, lehanăn khua bruă Đảng hlŏng klam ngă khua bruă mặt trận alŭ, hlăm dŭm thŭn êgao kdriêk Sa Thầy mđing ngă jăk jih jang klei ruah mnuih ngă bruă, rơ̆ng mâo klei thâo, klei hur har, mâo knhuah dôk dơ̆ng ƀơ̆ng huă jăk, lehanăn jih mnuih mâo kơhưm mơh. Kyuanăn yơh êpul khua kiă kriê bruă Đảng hlŏng klam ngă khua ƀuôn, alŭ dưi bi êdah leh bruă klam jing pô knơ̆ng kơ bruă kđi čar, jing anôk phŭn kơ klei bi mguôp ti dŭm anôk bruă Đảng, alŭ ƀuôn. Aduôn Y Sâm, K’iăng khua bruă Đảng kdriêk, Khua Êpul gơ̆ng bruă ƀuôn sang Sa Thầy lač:

 “Bruă tal êlâo năng ngă anăn jing ruah mnuih ngă bruă. Ruah mnuih mâo kơhưm, phung thâo săng kjăp kơ hdră êlan mơ̆ng Đảng, klei bhiăn knŭk kna. Mâo mnuih ƀuôn sang jưh knang, mâo klei Đảng ruah. Krĭng dleh dlan kiă kriê hlăm nah gŭ lŏ bi ksiêm wĭt phung knuă druh mda asei, hlăk ai boh nik hŏng phung amuôn adei mâo leh klei thâo hriăm truh anih. Tal dua, jing phung amuôn adei leh wĭt mơ̆ng kahan, pioh bi mŭt hlăm Đảng lehanăn mjuăt bruă knuă kơ ƀuôn sang”.

Hŏng klei gĭr čiăng bi leh hdră êlan mơ̆ng gưl dlông, lehanăn mơ̆ng čar, truh mlan 8/2023 hlăm 64 boh alŭ ƀuôn ti 11 boh să, wăl krah ti kdriêk Sa Thầy mâo leh truh 53 čô khua bruă Đảng hlŏng klam ngă khua ƀuôn alŭ, lehanăn 11 čô khua bruă Đảng hlŏng klam jing khua bruă mặt trận alŭ ƀuôn. Boh sĭt brei ƀuh klei hlŏng klam ngă bruă msĕ djuê anăn mâo đru leh kơ bruă mklin khuăt jih jang bruă, dưi bi hrŏ truh 64 pô klam bruă ti ƀuôn sang lehanăn bi ba mdưm hlăm sa anôk pioh mghaih msir bruă knuă hŏng klei pral khuăt lehanăn ênưih.

Kyua mâo ruah mnuih thâo hlăm bruă, thâo kiă kriê gĭt gai, lehanăn mâo ai tiê hur har, lehanăn jing mnuih mâo kơhưm hŏng mnuih ƀuôn sang, snăn jih jang bruă ngă pral ba wĭt klei tŭ dưn sơăi. Phan Chí Thiện, Khua bruă Đảng să Ya Ly, huyện Sa Thầy lač:

 “Tlao boh ƀuôn mnuih djuê ƀiă mâo leh khua bruă Đảng hlŏng klam ngă khua ƀuôn, diñu thâo săng kơ ai tiê klei mĭn mnuih ƀuôn sang, păn kjăp si klei hdĭp mnuih ƀuôn sang pô, mơ̆ng anăn mơh găl ênưih hlăm bruă klam jing khua bruă Đảng lehanăn khua ƀuôn mtam. Jăk hlăm klei hlue ngă dŭm hdră êlan mơ̆ng Đảng lehanăn klei bhiăn knŭk kna”.

Bi Nguyễn Minh Thuận, Khua bruă Đảng wăl krah Sa Thầy, kdriêk Sa Thầy lač:

 “Bruă Đảng bi ktưn leh čiăng mâo ênŭm 100% klei bi mklin bruă msĕ snăn. Jing jăk găl hlăm klei klam mtam, kiă kriê, ktrâo atăt pral jih jang hdră mtrŭn mơ̆ng Đảng lehanăn hlŏng mkŏ mjing hdră êlan hlue ngă mtam yơh hlăm ƀuôn sang pô. Klei găl tal dua, hlăm klei mkŏ mjing Đảng jing mâo ngă leh hŏng dŭm hdră êlan mrâo, mâo klei Đảng kiă kriê, bi êdah mơ̆ng bruă klam mơ̆ng khua bruă Đảng alŭ wăl mnuih ƀuôn sang anăn yơh”.

Mơ̆ng boh tŭ dưn tal êlâo bruă bi mklin khua bruă Đảng hlŏng klam jing khua ƀuôn, amâodah khua bruă mặt trận, bruă Đảng kdriêk Sa Thầy hlăk lŏ dơ̆ng ksiêm dlăng, mtrŭt mjhar, mâo klei bi mlih pral čiăng kơ phung yap jing “Mnuih ƀuôn sang jưh knang, Đảng ruah” bi leh jăk bruă klam pô. Kơ êdei anăp kdriêk Sa Thầy srăng lŏ bi kjăp, ruah mnuih thâo bruă, mâo klei thâo săng, mâo ai tiê hur har mâo kơhưm hŏng mnuih ƀuôn sang, jing đảng viên hlăm êpul bruă Đảng pioh ruah jing mnuih ngă bruă, mđing kơ bruă lŏ bi hriăm mbŏ, mđĭ klei thâo lehanăn mâo dŭm hdră đru kơ digơ̆ čiăng bi hơĭt ai tiê mă bruă. Snăn hlăm kluôm čar Kon Tum, mâo leh 360 hlăm ênoh jih jang 756 boh alŭ ƀuôn mâo khua bruă Đảng hlŏng jing khua ƀuôn, khua alŭ, lehanăn khua bruă Đảng hlŏng klam ngă khua bruă mặt trận. Klei bi mklin dua mta bruă kơ sa čô mnuih kñăm bi khuăt êpul djă bruă mơ̆ng phung knuă druh ti dŭm boh ƀuôn, alŭ./.