Hdră tŭ drông mnuih ƀuôn sang, msir mghaih klei kčŭt hưn thŭn 2023 mâo lu klei bi mlih, ba wĭt boh tŭ dưn, msir mghaih pral djŏ si klei kčah mtrŭn mơ̆ng hdră bhiăn hŏng 81,7% ênoh klei kčŭt hưn, 86,3% ênoh klei kđil êmuh djŏ hŏng klei dưi. Khă snăn, klei mnuih ƀuôn sang nao truh kơ dŭm Phŭn, dhar bruă hưn mdah, kčŭt hưn đĭ, năng mđing, hdră bi tuôm hŏng mnuih ƀuôn sang ti gưl Phŭn bruă knŏng mâo 60% hluê si klei kčah mtrŭn.

Bi trông ti Sang bi kƀĭn, phung bi ala Anôk bruă kƀĭn ala mñă klă, hdră tŭ drông mnuih ƀuôn sang khădah mâo klei bi mlih jăk mkă hŏng êlâo ƀiădah bruă tŭ drông ƀuôn sang mŏng phung khua anôk bruă ngă hră m’ar ka rŏng djŏ si klei kčag mtrŭn. Pô bi ala Điểu Huỳnh Sang, êpul Bình Phước brei thâo, thŭn 2023, ênoh mnuih ƀuôn sang nao kơ anôk bruă knŭk kna kčŭt hưn đĭ 37,7%... kyua anăn, Knŭk kna brei tĭng dlăng klă hdră tŭ drông mnuih ƀuôn sang, msir mghaih jih klei kčŭt hưn hlăm thŭn 2023.

 “Brei bi mklă mta phŭn ngă mđĭ ênoh klei kčŭt hưn, ênoh mnuih nao kčŭt hưn lehanăn mâo lu êpul mnuih nao kơ Anôk bruă knŭk kna kčŭt hưn. Mƀĭt anăn tăng dlăng boh klei lehanăn mta phŭn kbiă hriê klei kčŭt hưn, klei kčŭt hưn đĭ lu êdi, brei mâo hdră kah mbha bi mklă dŭm klei kčŭt hưn mrâo lehanăn dŭm boh klei mâo mŏng dŭm thŭn êlâo, boh klei mâo leh mŏng sui thŭn… čiăng mâo hdră msir mghaih klă klơ̆ng.

Pô bi ala Đàng Thị Mỹ Hương, êpul Bình Thuân brei thâo, msir mghaih dŭm klei êdu kƀah, dleh dlan hlăm bruă tŭ drông mnuih ƀuôn sang, msir mghaih klei kčŭt hưn knŏng dôk ti hnơ̆ng hưn mdah lehanăn ba mdah hdră msir:

 “Hlăm klei hưn mdah ksiêm dlăng kơ dŭm mta phŭn dôk lu klei êdu kƀah, kpăk đuôm lehanăn mta phŭn dôk mâo mơ̆ng lu thŭn êlâo dưi hưn mdah leh hlăm hră hưn mơ̆ng Knŭk kna ti dŭm thŭn êlâo ƀiădah truh kơ ară anei ka dưi msir mghaih jih ôh. Kâo čang hmăng anôk bruă kƀĭn ala srăng ba mdah hdră mtrŭn jao bruă klam klă klơ̆ng čiăng hnưm msir mghaih dŭm klei dôk kpăk đuôm anei”.

Bruă hưn mthâo boh tŭ klei tŭ drông, msir mghaih klei kčŭt hưn kơ Anôk bruă kƀĭn ala, phung bi ala ka ba m’ĭt djŏ wưng; mâo dŭm boh klei ka bi mklă, ngă kơ mnuih ƀuôn sang ăt čôñ, mâo dŭm boh klei kčŭt hưn, mâo ba mdah ƀiădah êmưt hluê ngă, bruă msir mghaih dôk sui, amâo hưn klă hdră msir mghaih… Pô bi ala Phạm Thị Kiều, êpul Dak Nông brei thâo:

            “Ka mâo klei bhiăn kjăp hưn mdah kơ klei dŭm anôk bruă êmưt msir mghaih hră kčŭt hưn kơ Êpul bi ala anôk bruă kƀĭn ala tŭ klei đua klam msir mghaih snăn dŭm anôk bruă êmưt wĭt lač kreh mtrŭt lu blư̆ nanao. Mơ̆ng anăn, ngă kơ bruă ksiêm dlăng, mtrŭt, tĭng dlăng boh tŭ bruă msir mghaih, wĭt lač mơ̆ng dŭm anôk bruă mâo klei dưi ka dưi hluê ngă nanao mơ̆ng anăn ngă kơ hdră đru kčĕ, ba mdah, ksiêm dlăng bruă msir mghaih klei kčŭt hưn ka dưi hluê ngă lu msĕ si klei hưn mdah mâo bi mklă leh”.

Hlak mblang dŭm klei mđing uêñ mơ̆ng phung bi ala lač, Khua knơ̆ng ksiêm dlăng knŭk kna Đoàn Hồng Phong brei thâo, hră kčŭt hưn thŭn 2023 đĭ lu, ênoh hră mâo djăp klei găl msir mghaih đĭ lu – hdră msir mghaih lŏ hrŏ, bruă ba m'ĭt lehanăn msir mghaih hră dôk lu klei gun kpăk. Kơ boh tŭ ksiêm dlăng klei kčŭt hưn dôk mâo sui thŭn, hluê ngă Hdră mtrŭn mrô 623, Knŭk kna, Khua knŭk kna gĭt gai leh dŭm Phŭn, dhar bruă, alŭ wăl mjêč ksiêm dlăng jih klei kčŭt hưn mâo mơ̆ng êlâo. Knơ̆ng ksiêm dlăng knŭk kna mâo leh hdră bi hgŭm hŏng Phŭn bruă kahan ksiêm, dŭm phŭn bruă djŏ tuôm, alŭ wăl ksiêm dlăng, bi mklă lehanăn msir mghaih 1003 boh klei. Dŭm alŭ wăl ksiêm dlăng, bi mklă, msir mghaih leh 856 boh klei, mâo 85,3%:

Hlăm wưng ti anăp, Knơ̆ng ksiêm dlăng knŭk kna lŏ dơ̆ng đru kčĕ kơ knŭk kna, Khua knŭk kna gĭt gai dŭm alŭ wăl msir mghaih klei kčŭt hưn, bi hgŭm kjăp hŏng dŭm Phŭn, dhar bruă gưl dlông mđing msir mghaih jih boh klei dôk mơ̆ng dŭm thŭn êlâo, mâo leh mơ̆ng sui mâo leh klei bi mklă msir mghaih djŏ si klei kčah mtrŭn mơ̆ng Knŭk kna, Khua knŭk kna mtă kơ Anôk bruă sang čư̆ êa čar ba mdah klei hưn mjưh mdei, ksiêm dlăng, msir mghaih djŏ hŏng klei dưi mjing klei găl kơ dŭm anôk bruă gưl dlông tơdah tŭ mă hră m’ar kčŭt hưn amâo lŏ ba wĭt kơ alŭ wăl ôh”./.