Hluê hdră ksiêm mđing klei mnuih ƀuôn sang čiăng mơ̆ng Anôk bruă kƀĭn ala hlăm mlan 10 lehanăn 11 thŭn anei, mnuih ƀuôn sang kluôm ala bi êdah klei đăo knang hŏng Đảng, bi mni kơ hdră mtrŭn mlih mrâo, mkŏ dăp anôk bruă kđi čar khuăt, ngă bruă tŭ dưn. Bruă lŏ mlih mrâo, mkŏ dăp anôk bruă kđi čar jing bruă mjêč êdi ară anei, mnuih ƀuôn sang čang hmăng bruă hluê ngă hdră mtrŭn anei srăng mjing boh kdrŭt mrâo kơ hdră răng mgang, mkŏ mkra lehanăn mđĭ kyar lăn čar, mjing boh kdrŭt yuôm bhăn bi leh dŭm mta kñăm mơ̆ng Hdră mtrŭn Klei kƀĭn phung bi ala kluôm ala čar tal 13 mơ̆ng Đảng kčah mtrŭn. Mbĭt anăn, mnuih ƀuôn sang čang hmăng tơdah hluê ngă hdră mlih mrâo, mkŏ dăp anôk bruă khuăt, ngă bruă tŭ dưn, brei mđing kơ bruă rơ̆ng klei tŭ dưi kơ phung knuă druh, mnuih mă bruă. Ti anôk bi kƀĭn, Khua Dhar bruă Lĭng kahan lehanăn răng mgang klei êđăp ênang Lê Tấn Tới lač klă:

“Mơ̆ng hdră bi tuôm leh êgao. Kâo bi tuôm hŏng mnuih ƀuôn sang Long An, krĭng Dap mnai êa krông Cửu Long snăn klei êdah êdi jing mnuih Long an sa ai êdi hŏng klei bi khuăt anôk bruă hluê si Hdră mtrŭn mrô 18 mâo klei hmăi prŏng êdi hlăm yang ƀuôn. Mâo lu êdi mnuih sa ai.

Ti anôk bi tuôm hŏng mnuih ƀuôn sang leh Klei bi kƀĭn tal 8, Anôk bruă kƀĭn ala gưl 15, mnuih ƀuôn sang čar Dak Lak ăt bi êdah klei đăo knang, mđing truh kơ bruă ksiêm wĭt klei hluê ngă Hdră mtrŭn mrô 18/NQ-TW kơ bruă “Lŏ dơ̆ng mlih mrâo, mkŏ dăp anôk bruă kđi čar”. Anei klă sĭt jing sa hdră bi khuăt anôk bruă kđi čar, mâo knuă druh, đảng viên, mnuih ƀuôn sang mđing. Vũ Mạnh Khuông, ti ƀuôn hgŭm Thành Công, ƀuôn prŏng Ƀuôn Ama Thuôt, brei thâo:

“Mkŏ dăp anôk bruă mơ̆ng gưl dlông truh kơ alŭ wăl mâo leh klei sa ai hlăm mnuih ƀuôn sang, knuă druh lehanăn mnuih ƀuôn sang đăo knang kơ Đảng, Knŭk kna hluê ngă hdră mkŏ dăp anôk bruă mơ̆ng gưl dlông čiăng mđĭ boh tŭ hluê ngă tŭ dưn hdră mtrŭn mơ̆ng Đảng. Čang hmăng hlăm wưng ti anăp, Đảng, Knŭk kna srăng ngă bruă kjăp, ba wĭt boh tŭ dưn djŏ hŏng klei mnuih ƀuôn sang čang hmăng.

Ti anôk bi kƀĭn, Dhar bruă gĭt gai Anôk bruă kƀĭn ala brei ngă jăk hĭn hdră mtô mblang. Kyua bruă mkŏ dăp djŏ tuôm kơ anak mnuih, hmăi truh kơ klei tŭ dưi mơ̆ng anak mnuih. Brei đăo knăl dŭm klei bluh mâo, klei dleh dlan lehanăn dŭm hdră msir čiăng hluê ngă tŭ dưn dŭm hdră mtrŭn mkŏ dăp anôk bruă kđi čar khuăt, ngă bruă tŭ dưn. Kơiăng khua Anôk bruă kƀĭn ala Nguyễn Thị Thanh mtă brei mđing kơ klei bhiăn, hdră mtrŭn djŏ guôp, jăk găl kơ êpul knuă druh dôk hlăm hdră mkŏ dăp, bi hrŏ ênoh mnuih mă bruă, mkŏ wĭt êpul knuă druh, mnuih mă bruă.

“Hmei mĭn brei mâo klei bhiăn kjăp lehanăn êdah kdlưn hĭn mkă hŏng dŭm klei bhiăn êlâo adih, čiăng mtrŭt mnuih adôk 2 thŭn, 3 thŭn, 4 thŭn dưi mprăp ai tiê mdei brei kơ phung knuă druh mda asei, knuă druh mâo mjuăt bi hriăm dôk mă bruă. Tơdah drei amâo mâo hdră mtrŭn jăk snăn dleh snăk dưi krơ̆ng phung knuă druh drei čiăng lehanăn amâo dưi ba phung knuă druh drei čiăng nao ngă dŭm bruă mkăn.

Blŭ hrăm ti anôk bi kƀĭn, Khua Anôk bruă kƀĭn ala Trần Thanh Mẫn mtă brei mjêč čih mkra dŭm hdră mtrŭn, mkra mlih dŭm klei bhiăn djŏ tuôm, hluê ngă hdă mlih mrâo, mkŏ dăp anôk bruă khuăt, ngă bruă tŭ dưn. Khua Anôk bruă kƀĭn ala mtă brei msir mghaih jih klei kčŭt hưn dôk mâo sui, hưn mdah klă dŭm anôk bruă mâo klei đua klam, klei dưi msir mghaih klei čŭt hưn lu mnuih, boh nik brei msir mghaih kjăp, msir mghaih jih mơ̆ng nah gŭ.

“Ksiêm dlăng čiăng msir mghaih kluôm ênŭm. Tơdah arăng kčŭt hưn brei drei ksiêm dlăng bi mklă. Si klei gưl dlông msir mghaih, ya klei alŭ wăl msir mghaih snăn brei msir mghaih jih mtam. Mbĭt anăn, brei tui ksiêm hlei pô kčŭt hưn, mâo phung mčŭt mčhur….nao msir mghaih mtam”.

Ăt ti anôk bi kƀĭn tal anei, Dhar bruă gĭt gai Anôk bruă kƀĭn ala bi mklă leh Hdră mtrŭn kơ bruă mkŏ dăp, mkŏ mjing êpul êya ngă hră mơar gưl kdriêk, gưl să wưng thŭn 2023-2025 mơ̆ng čar Ninh Bình.