Ti anôk mă bruă, leh hmư̆ phung bi ala knŭk kna, lehanăn êpul ksiêm dlăng hlak mblang klei hâo mdah klah čŭn bruă hlue ngă hdră mtrŭn mrô 88 lehanăn hdră mtrŭn mrô 51 mơ̆ng anôk bruă kƀĭn ala kơ hdră hdruôm hră mtô bi hriăm ti sang hră, phung hlăm êpul ksiêm dlăng mâo leh klei bi trông kơ bruă ngă hlăm bruă klei hâo mdah anăn. Hlăm anăn, mâo dŭm mta bruă:  Ksiêm kơ hdră kluôm kơ jih jang klei bi hriăm, lač kơ klei mlih mrâo hdră mtô bi hriăm, hnơ̆ng kjăp kơ klei mtô bi hriăm, bruă čih mkra, ksiêm bi mklă, bi lar lehanăn ênoh ênil čhĭ hdruôm hră kơ hđeh hriăm. Boh sĭt, klei dôk găn jin, mâo dŭm klei akâo kơ phung nai mtô; kơ anôk hriăm, mnơ̆ng mnuă yua hlăm sang hră hlăm klei mtô bi hriăm hdră mrâo.

Blŭ hrăm ti anôk ngă bruă, k’iăng khua bruă kƀĭn ala Trần Thanh Mẫn lač, jih jang klei blŭ bi êdah leh hŏng jih ai tiê, mâo klei hur har, lehanăn bruă đua klam prŏng Êpul ksiêm dlăng mâo čih pioh djăp ênŭm, bi leh klei čih mkra klei hâo mdah mơ̆ng êpul ksiêm dlăng, lehanăn klei čih mkra kơ hdră mtrŭn pioh kơ Dhar bruă gĭt gai bruă kƀĭn ala mkŏ mjing klei bi mklă ti anôk bi kƀĭn mlan 8/2023. Bi hŏng klei blŭ mơ̆ng êpul ksiêm dlăng lehanăn êpul bi ala dŭm anôk bruă, phŭn dhar bruă ti anôk ngă bruă, akâo kơ knŭk kna lŏ ksiêm duah, tŭ mă bi djăp ênŭm kñăm čiăng bi leh klei čih mkra hdra hâo mdah pioh ba hlak mblang, mâo klei akâo lŏ ksiêm duah thiăm mbŏ mơ̆ng êpul ksiêm dlăng. K’iăng khua bruă kƀĭn ala Trần Thanh Mẫn mtă kơ knŭk kna bi mđing hĭn kơ 5 mta bruă phŭn kơ êpul nai mtô:

“Kơ klei phung nai mtô, anei jing mta phŭn čiăng mâo klei tŭ dưn jăk hlăm bruă mtô bi hriăm hdră bi hriăm mrâo. Mtă kơ knŭk kna gĭt gai dŭm phŭn dhar bruă djŏ tuôm bi ksiêm kluôm ênŭm kơ bruă mkŏ mjing kơ klei tiŏ nao nai mtô, kñăm bi hmao hŏng hdră mtô bi hriăm mrâo, lehanăn mghaih msir bi pral klei dôk kƀah nai mtô, lehanăn bruă hrŏng nai mtô, bi dhŏ hŏng hdră mjuăt bi hriăm mơ̆ng thŭn 2018”.

        K’iăng khua bruă kƀĭn ala Trần Thanh Mẫn ăt mtă kơ knŭk kna, ksiêm dlăng bi nik, lehanăn mâo klei tĭng knăl kơ anôk mtô bi hriăm, kdrăp mtô bi hriăm, mâo mtam hdră êlan mghaih msir klei kƀah, klei gun kpăk ară anei. Mđing tal êlâo jing kơ bruă sang hră mơar, lŏ mjing dŭm mta mtrŭn mrâo bi djŏ hĭn, lehanăn hyuă kjăp bruă ksiêm dlăng hdruôm hră mtô bi hriăm.

          Êlâo anăn, hlăm mlan 4/2023, Êpul ksiêm dlăng mơ̆ng dhar bruă gĭt gai bruă kƀĭn ala ngă leh bruă hŏng phŭn bruă sang hră mơar kơ klei hlue ngă hdră mtrŭn mrô 88 lehanăn mrô 51 mơ̆ng anôk bruă kƀĭn ala kơ bruă mlih mrâo hdră mtô bi hriăm. Êpoul ksiêm dlăng ƀuh ti anei adôk mâo dŭm bruă ngă năng lŏ bi kjăp hĭn, kñăm rơ̆ng djŏ hŏng ênoh prăk knŭk kna bi liê, lehanăn djŏ hŏng klei mtô bi hriăm dôk čiăng ară anei. Vũ Thị Lưu Mai, K’iăng khua kiă kriê anôk bruă ngăn prăk mơ̆ng Bruă kƀĭn ala lač:

“Hlăm lu mta bruă drei čiăng iêo jak jih jang yang ƀuôn, ƀiădah hŏng bruă sang hră mơar snăn klei iêo jăk snăn dôk tuôm hŏng lu klei dleh dlan. Kyuanăn, tơdah drei ngă bruă anei, si ngă jing găl amâodah hơăi drei iêo jak yang ƀuôn bi hgŭm mbĭt, čăng hmăng mâo knŭk kna hâo mdah lehanăn wĭt lač kơ klei dưi ngă lehanăn amâo mâo dưi ngă, hlăm hlăm klei hlue ngă dua hdră mtrŭn mơ̆ng Bruă kƀĭn ala”.

Hlăm mlan 6 leh êgao, Khua bruă kƀĭn ala Vương Đình Huệ kiă kriê leh klei bi kƀĭn hŏng bruă phung ngă bruă ksiêm dlăng mơ̆ng bruă kƀĭn ala kơ klei hlue ngă hdră mtrŭn mrô 88 lehanăn mrô 51 mơ̆ng anôk bruă kƀĭn ala kơ klei bi mlih hdră mtô bi hriăm, bi mlih hdruôm hră mtô bi hriăm ti sang hră”. Anei jing sa hlăm 4 mta bruă pioh kơ anôk bruă kƀĭn ala, dhar bruă gĭt gai bruă kƀĭn ala ngă hlăm thŭn 2023 anei. Khua bruă kƀĭn ala bi mni bruă mơ̆ng Êpul ksiêm dlăng ngă leh hŏng klei kjăp jih jang mta mtrŭn mơ̆ng anôk bruă kƀĭn ala, lehanăn dhar bruă gĭt gai bruă kƀĭn ala jao, ngă bruă hŏng klei ƀhĭ klĭ ênŭm, siă suôr, mâo klei đua klam djăp ênŭm hră mơar mâo Khua êpul nao ksiêm dlăng, mơ̆ng k’iăng khua bruă kƀĭn ala Trần Thanh Mẫn ngă leh.