Khua gĭt gai Đảng Tô Lâm mñă ktang: bruă sang hră mơar, mdrao mgŭn, dhar kreh jing dŭm kmeh gơ̆ng ala čar, jing mta kñăm, jing boh kdrŭt čiăng mđĭ kyar anak mnuih - ai dưi yuôm bhăn mơ̆ng lăn čar. Khua gĭt gai Đảng Tô Lâm lač dŭm hdră ala čar kñăm hlăm wưng êgao ka kluôm dhuôm, wĭt mâo nanao, klei dưi rưng, ka dưi bi klă mta kñăm phŭn leh anăn ăt ka bi klă anôk bruă đua klam phŭn.

Hŏng bruă mdrao mgŭn, Khua gĭt gai Đảng Tô Lâm mñă brei mlih mta kñăm jing kriê dlăng klei suaih pral mơ̆ng phŭn leh anăn mkăp, mgaih msir jih hnơ̆ng dŭm boh klei wăl hdĭp mda, êa doh, klei doh êƀăt mnơ̆ng ƀơ̆ng,  phŭn agha klei ruă. Tơdah amâo msir mơ̆ng phŭn, wăt kơ duh bi liê dŭm sang êa drao ăt kăn dưi bi mâo djăp klei čiăng.

Hŏng bruă mdrao mgŭn, yuôm hĭn jing kriê dlăng klei suaih pral mơ̆ng phŭn, srăng mđĭ klei mkăp. Ară anei nao mkă dlăng klei ruă, msĕ si nao khă bi mâo đuč - kyua hdră mkăp awăt anăn yơh klei ruă đĭ. Srăng bi klă djăp mta bruă, ya dŏ dôk mâo, 5 thŭn kơ anăp dưi mơ̆ drei tla? Srăng klă msĕ sơnăn. Klei ruă hnak dlông rŏng lăn msưh kdŭn mơ̆ng sui leh, ti anôk tưp ăt liê lu prăk sơnăk. Ruă tiê si ngă, si ngă ñu tưp? Kâo mĭn hdră ala čar srăng nao hlăm dŭm bruă klă klơ̆ng, hŏng dŭm mta kñăm.

Hŏng bruă sang hră mơar, Khua gĭt gai Đảng Tô Lâm mñă ktang čiăng duh bi liê djŏ kơ bruă mkŏ mkra, êpul ngă bruă, hdră bi hriăm, mkŏ wĭt sang hră, adŭ hriăm, tĭng mkă ênoh phung nai, mđĭ hnơ̆ng phung nai mtô, boh nik jing thâo klei Angle leh anăn klei thâo mtô dŭm mta hŏng klei Anglei. Khua gĭt gai Đảng Tô Lâm mñă klă grăp hdră êlan srăng mđing kơ mta kñăm knhal tuč: mnuih ƀuôn sang dưi dưn klă klơ̆ng, dưi hriăm, kriê dlăng klei suaih pral, hdĭp êđăp ênang. Êjai anăn kơh dŭm hdră đĭ kyar klă sĭt tŭ dưn.

brei klei blŭ mguôp kơ hdră ala čar kñăm bi mrâo mrang, mđĭ hnơ̆ng jăk bruă sang hră mơar wưng thŭn 2026 - 2035, Khua Bruă Kbĭn ala Trần Thanh Mẫn lač, hlăm wưng anei tŭ klei hmăi ktang mơ̆ng wưng bruă tuh tia 4.0, klei bluh đĭ mơ̆ng AI leh anăn klei čiăng mnuih mă bruă hnơ̆ng jăk. Kyuanăn amâo djŏ knŏng mdei hlăm bruă mtô jăk, hriăm hŏng knhuah đưm ƀiădah lŏ jing klei bi mlih kơ klei mĭn leh anăn kdrăp yua čiăng kơ bruă sang hră mơar đĭ kyar:

Hdră êlan čiăng mâo hdră tă sui, dưi đăo tĭng klei đĭ kyar mơ̆ng yang ƀuôn, anôk mă bruă hlăm êdei anăp. Hdră ala čar kñăm čiăng msir dŭm boh klei phŭn mâo knhuah klưn hĭn hlăm bruă sang hră mơar. Hluê si kâo jing kñăm kơ klei mlih mrô, mtô bruă mă hnơ̆ng jăk amâodah phung nai tĭng krĭng tlaih kbưi čiăng mâo hdră êlan ngăn prăk djŏ msĕ. Tal dua jing srăng rơ̆ng kơ ai dưi ngăn prăk kriê dlăng, ksiêm dlăng. Prăk ƀiă, ƀiădah dưi ngă hră mơar pral, rơ̆ng kơ klei ngă bruă amâo mâo klei luč liê mang, klei amâo mâo jăk.

Hluê si khua Bruă Kbĭn ala, leh mâo Bruă Kbĭn ala ba mdah hdră êlan čiăng hnưm mprăp dŭm hră mơar mtô, mkăp brei klă hlăm klei ngă bruă leh anăn hmao mkăp ngăn prăk. Anri jing bruă awăt hĭn hlăm boh sĭt. Êngao kơnăn čiăng ksiêm dlăng jêñ. Khua Bruă Kbĭn ala mñă ktang, anei jing hdră êlan hmăi klă anăp kơ mnuih ƀuôn sang, tơdah dưi ngă jăk mnuih ƀuôn sang srăng mâo 4 mbĭt jing mnuih ƀuôn sang thâo, mnuih ƀuôn sang bi trông, mnuih ƀuôn sang ksiêm dlăng, mnuih ƀuôn sang dưn.