Hlăm wưng êgao, hdră êlan mrô 8 ba wĭt lu klei bi mlih hlăm klei hdĭp kơ phung mniê leh anăn phung hđeh krĭng dleh dlan, bi êdah klă bruă klam đru kơ hdră duh ƀơ̆ng, hâo hưn mđĭ hĭn klei thâo săng, gang mkhư̆ klei bi dôk ung mô̆ mơ̆ng mda, klei čăm biêng hlăm gŏ sang… Hlăm klei mă bruă, Êpul hgŭm bruă phung mniê Việt Nam jing anôk bruă phŭn ngă dŭm mta phŭn mơ̆ng hdră êlan mrô 8. Êpul dưi brei ƀuh klei čŏng pô, bruă klam leh anăn klei gĭr prŏng, mơ̆ng bruă mkŏ mjing truh kơ brei čan. Kyuanăn, lu phung mniê ƀun ƀin, phung mniê dôk hjăn, hđeh mniê krĭng tlaih kbưi dưi mâo klei đru lĭng vvan, mơ̆ng anăn kpưn đĭ hlăm klei hdĭp.

Ƀiădah, êngao kơ dŭm boh tŭ dưn, bruă hluê ngă hdră êlan mrô 8 ăt dôk hŏng lu klei dlan dlan. Mâo êbh 200 hnơ̆ng mrô čiăng ktuê dlăng, hlăm anăn mâo êbeh 70 hnơ̆ng mrô djŏ tuôm hŏng êkei mniê. Hluê si Phùng Quốc Huy, adŭ bruă gĭt gai mơ̆ng gưl dlông, hdră ala čar kñăm, klei anei jing klei čiăng êdi, ƀiădah ngă truh klei kpĭ prŏng kơ knuă druh gưl ƀuôn să, gưl kdriêk êlâo dih, anôk mâo mă knŏng ƀiă phung thơ̆ng kơ bruă. Diñu amâo mâo djăp mnuih mă bruă leh anăn mnơ̆ng yua čiăng hrui mă, bi kƀĭn klei hưn. Klei hưn mthâo mrâo mrang lu anôk adôk awăt, ngă kơ bruă bi mrâo leh anăn ktuê dlăng klei hưn jing dleh dlan êdi.

“Hlăm bruă mkŏ mjing hdră, lu hdră kdrêč mdê mdê bi čih mđing kơ phung mniê. Ƀiădah, drei knŏng mrâo mdei hlăm bruă bi êdah hdră êlan ƀiădah ka dưi bi klă ôh si srăng mđing. Klei anei ngă kơ drei amâodưi mjing klei anăn jing hnơ̆ng čuăn êkei mniê klă klơ̆ng hlăm dŭm hdră êlan anăn čiăng dưi mkă leh anăn bi klă”.

Kyuanăn, čiăng mđĭ kơhưm klei mtăp mđơr êkei mniê hlăm wưng kơ anăp, čiăng mâo dŭm hdră êlan klă klơ̆ng hĭn. Tal êlâo hĭn, čiăng kñăm ai dưi hlăm dŭm klei bi hmô, bruă ngă dưi bi klă boh tŭ dưn, hrô kơ khă bi mâo. Sitôhmô, dŭm klei bi hmô hdră duh ƀơ̆ng kơ phung mniê mnuih djuê ƀiă, dŭm adŭ mtô kơ hdră hdĭp, hâo hưn gang mkhư̆ klei bi dôk ung mô̆ mơ̆ng mda…dưi brei ƀuh klă boh tŭ dưn leh anăn čiăng dưi pŏk mlar.

Tal 2 čiăng lŏ wĭt ksiêm dlăng hdră mkăp brei ngăn prăk. Tơdah grăp anôk bruă điêt mâo ênoh prăk mdê, bruă bi kƀĭn leh anăn  brei čan srăng dleh dlan. Phùng Quốc Huy lač, čiăng rơ̆ng kơ ênoh prăk mdê kơ Êpul bruă phung mniê čiăng ệjai ngă dŭm mta bruă phŭn srăng mâo klei găl hlăm bruă kriê dlăng leh anăn ngă bruă hlăm boh sĭt. Êngao kơnăn, čiăng mđĭ hĭn bruă jao klei dưi kơ alŭ wăl, jao hnơ̆ng čuăn leh anăn ai dưi čiăng kơ bruă sang čư̆ êa ƀuôn hgŭm čŏng pô mkŏ mjing dŭm mta bruă djŏ guôp hŏng boh sĭt leh anăn klei čiăng klă sĭt mơ̆ng grăp anôk.

“Drei bi hrŏ ênoh prăk djă ti gưl dlông, hrô kơnăn jing jao lu hĭn kơ nah gŭ. Alŭ wăl jing anôk thâo klă hĭn klei hdĭp mnuih ƀuôn sang, jao klei dưi kơ diñu srăng đru kơ bruă klă hŏng boh sĭt leh anăn tŭ dưn hĭn.”

Sa boh klei mkăn ăt čiăng mâo klei uêñ mĭn msĕ si bi dôk ung mô̆ mơ̆ng mda, bi dôk anak amiêt awa…Anei jing phŭn agha bi kpăk klei đĭ kyar mơ̆ng phung mniê leh anăn phung hđeh mnuih djuê ƀiă. Mbĭt hŏng anăn, čiăng bi mguôp kjăp plah wah dŭm dhar bruă čiăng nĕ kơ klei lŏ pluă bruă klam, ba yua tŭ dưn ai dưi.

Bruă mđĭ hĭn bruă klam, kơhưm mơ̆ng phung mniê, kriê dlăng phung hđeh amâo djŏ knŏng jing klei dưi čiăng êdi, ƀiădah lŏ jing duh bi liê kơ êdei anăp. Hlăm wưng kơ anăp, klei mtăp mđơr êkei mniê čiăng dưi ngă klă klơ̆ng hĭn, mâo hdră mkă klă nik, mâo ai dưi bi kƀĭn, leh anăn mâo klei nao hgŭm mơ̆ng bruă sang čư̆ êa. Sơnăn kơh drei klă sĭt dưi mâo klei mlih, hơĭt kjăp kơ klei hdĭp mơ̆ng phung mniê leh anăn phung hđeh mnuih djuê ƀiă – đru ngă tŭ jing hdră êlan ala čar kơ klei mtăp mđơr êkei mniê truh thŭn 2030.