Blŭ hrăm hlăm hdră, Khua bruă kƀĭn ala Vương Đình Huệ bi êdah klei mgei ai tiê ti anăp dŭm klei duh myơr, đru mguôp, asăn asei, luč liê mơ̆ng mnuih ƀuôn sang, lĭng kahan hlăm klei mdrơ̆ng hŏng klei truh yan adiê ngă, klei pui ƀơ̆ng leh anăn dŭm boh tŭ dưn, gru hmô kdlưn hĭn hlăm bruă jing jang mnuih ƀuôn sang nao hgŭm Gang mkhư̆, truih mdjiê klei pui ƀơ̆ng leh anăn tui duah đru dŏng.

Khua bruă kƀĭn ala Vương Đình Huệ lač, mbĭt hŏng klei mđrăm mbĭt, sa ai mơ̆ng êpul êya ngă bruă hlăm bruă Gang mkhư̆, truih mdjiê klei pui ƀơ̆ng leh anăn tui duah đru dŏng jing klei nao hgŭm mơ̆ng jih jang mnuih ƀuôn sang. Kdlưn hĭn êdi msĕ si: Êpul Gang mkhư̆, truih mdjiê klei pui ƀơ̆ng leh anăn tui duah đru dŏng wăl krah Lạc Dương, čar Lâm Đồng hŏng ai tiê čŏng pô, gĭr jih ai nao hgŭm ngă bruă Gang mkhư̆, truih mdjiê klei pui ƀơ̆ng leh anăn tui duah đru dŏng, msĕ si ayŏng Nguyễn Hữu Đốn mâo klei jhŏng, asăn asei êjai đru dŏng mnuih hlăm klei pui ƀơ̆ng bi ƀuôn prŏng Phan Thiết, čar Bình Thuận mrâo êgao, Êpul dŏng mdraŏ FAS Angle hŏng hdră ngă bruă “Đru dŏng anak mnuih jing hdră hdĭp” dưi đru leh kơ dŭm êpul čô tuôm hŏng klei truh leh anăn giăm anei dưi đru dŏng mtaih lu mnuih hlăm klei pui ƀơ̆ng kjham ti ƀuôn hgŭm Khương Đình, kdriêk čar Thanh Xuân, ƀuôn prŏng Hà Nội…Anei jing dŭm mta bruă tŭ jăk, bi lar ktang ai tiê jhŏng ktang, knhuah gru “khăp kơ pô riêng gah msĕ hŏng khăp kơ asei pô” mơ̆ng djuê ana drei.

Ăt hlăm hdră anei, pah mni leh anăn bi mni kơ dŭm bruă ngă jăk siam, klei jhŏng, dŭm boh tŭ hĭn mơ̆ng êpul êya leh anăn mnuih ƀuôn sang hlăm bruă Gang mkhư̆, truih mdjiê klei pui ƀơ̆ng leh anăn tui duah đru dŏng leh anăn bi hdơr kơ phung tuôm hŏng klei truh, bi hdơr kơ phung knuă druh, lĭng kahan leh anăn mnuih ƀuôn sang mâo klei jhŏng, asăn asei wơr pô truih mdjiê pui ƀơ̆ng leh anăn đru dŏng hlăm wưng êgao.

Hlăm wưng kơ anăp, boh sĭt klei pui ƀơ̆ng, klei mtuh, klei truh ăt dleh dưi ksiêm dlăng, boh nik ti dŭm sang dôk lu mnuih, sang mâo lu adŭ, sang dôk mnuih ƀuôn sang bi mguôp hŏng bruă mkra mjing, mnia mblei, sang mnia, anôk čhĭ mnia, anôk bruă mâo lu mnuih. Hluê si Khua bruă kƀĭn ala, klei anei čiăng kơ kahan ksiêm Gang mkhư̆, truih mdjiê klei pui ƀơ̆ng leh anăn tui duah đru dŏng mbĭt hŏng dŭm gưl bruă, dhar bruă mđĭ hĭn klei čŏng pô, bi mprăp klă nik leh anăn kreh knhâo hŏng bruă anei. Khua bruă kƀĭn ala Vương Đình Huệ lač:

 “Srăng dlăng yuôm bhăn bruă gang mkhư̆, mă gang mkhư̆ jing phŭn, mơ̆ng anăn bi hrŏ ênoh klei pui ƀơ̆ng leh anăn klei hmăi mơ̆ng klei pui ƀơ̆ng, boh nik jing anak mnuih, răng mgang asei mlei mơ̆ng mnuih ƀuôn sang jing răng mgang klei êđăp ênang anak mnuih, jing mta kñăm yuôm hĭn hlăm bruă răng mgang klei êđăp ênang, mđĭ kyar lăn čar, rơ̆ng kơ dŭm klei găl gang mkhư̆ klei pui ƀơ̆ng kơ grăp anôk bruă, grăp alŭ ƀuôn sang, grăp gŏ sang, mtrŭt mđĭ bruă mtô lač leh anăn hâo hưn, hlăk mblang, klă nik, jêñ jêñ mtô mblang klei bhiăn ala čar, mtô kơ bruă gang mkhư̆ klei pui ƀơ̆ng, boh nik jing klei thâo bi mdrơ̆ng hŏng klei pui ƀơ̆ng kơ mnuih ƀuôn sang, bi lar hdră “4 sa anôk” (gĭt gai mơ̆ng phŭn, êpul êya mơ̆ng phŭn, êdeh êdâo mơ̆ng phŭn, mnơ̆ng yua mơ̆ng phŭn), mkŏ mjing leh anăn pŏk mlar klei bi hmô, hdră bruă msĕ si: Êpul gŏ sang gang mkhư̆ klei pui ƀơ̆ng, anôk truih mdjiê pui yang ƀuôn, mtrŭt mjhar mnuih ƀuôn sang mđĭ klei thâo răng, hluê ngă djŏ hdră êlan gang mkhư̆, bi mdrơ̆ng, truih mdjiê klei pui ƀơ̆ng, klei mtuh tŭ dưn hĭn”.

Êngao kơnăn, mkŏ mjing klei ksiêm dlăng kluôm, ksiêm dlăng klei êđăp ênang gang mkhư̆ klei pui ƀơ̆ng hlăm kluôm ala, boh nik hŏng dŭm alŭ wăl, anôk bruă mâo klei arưp aram pui ƀơ̆ng ktang, lŏ dơ̆ng ksiêm dlăng dŭm klei čuăn kơ klei bhiăn ala čar mkŏ mjing, mkra mlih, hmao bi mbŏ, djŏ guôp, bi klă dŭm klei čuăn, hdră êlan gang mkhư̆ truih mdjiê klei pui ƀơ̆ng.

Khua bruă kƀĭn ala mñă klă, čiăng hmao pah mni, mđĭ ai, bi lar dŭm klei bi hmô, klei êdah êdi, mbĭt anăn mđĭ hĭn bruă ksiêm dlăng, hmao ƀuh, ƀuah mkra ktang phĭt dŭm klei ngă soh hlăm bruă Gang mkhư̆, truih mdjiê klei pui ƀơ̆ng leh anăn tui duah đru dŏng.

Ƀri wưng anei, Khua bruă kƀĭn ala Vương Đình Huệ iêo mthưr dŭm gưl bruă, dhar bruă leh anăn jih jang mnuih ƀuôn sang mđĭ hĭn klei thâo săng, bruă klam kơ bruă Gang mkhư̆, truih mdjiê klei pui ƀơ̆ng leh anăn tui duah đru dŏng, dlăng anei jing bruă klam yuôm bhăn, jêñ jêñ, amâo dưi luč klei răng, ngă ngơi mang, grăp gŏ sang, grăp čô mnuih ƀuôn sang hluê ngă jăk dŭm klei čuăn hlăm klei bhiăn ala čar kơ bruă gang mkhư̆, truih mdjiê klei pui ƀơ̆ng.