Hlăm yan adiê mđiă leh anăn angĭn yan bhang Lăn Dap Kngư, êdeh kai ti êlan lăn bazan mơ̆ng ƀuôn nao kơ hma. Ênai êdeh kai hlai mbĭt hŏng ênai blŭ tlao mơ̆ng êpul phung tuê hiu čhưn ênguê mơ̆ng Prăng Mercler Olivier, sa čô tuê hriê mơ̆ng Prăng, hưn mdah ai tiê êjai mbĭt hŏng mnuih ƀuôn sang nao kơ hma:

“Jăk êdi yơh! Hmei hruê anei dưi ksiêm hrăm kơ dhar kreh, mnơ̆ng ƀơ̆ng huă, klei hdĭp aguah tlam tinei”.

Hriê hŏng dŭm ƀuôn êlan mnuih Êđê ti Dak Lak, phung tuê amâo djŏ knŏng gưi čuă dlăng, mă rup, ƀiădah lŏ dưi ktuê dlăng kluôm dhuôm ai hdĭp mơ̆ng ƀuôn sang. Mercler Claire,  tuê mơ̆ng Prăng, bi êdah klei jăk êjai thâo bruă klam mơ̆ng phung mniê Êđê hlăm klei hdĭp ƀuôn sang. Ñu ƀuh phung mniê Êđê jing phung mbruă êdi, amâo djŏ knŏng nao hgŭm mă bruă knuă, ƀiădah lŏ jing phŭn gŏ sang.

          “Phung mniê hlăm dhar kreh Êđê jing yuôm êdi. Klei anei jing mdê hŏng lu dhar kreh mkăn, phung mniê amâo mâo yuôm sơnăn ôh. kâo mĭn anăn jing kơhưm jăk êdi kơ mniê.”

Dŭm klei anăn mĭndah hơăi mang ƀiădah brei kơ phung tuê ala tač êngao mâo klei ƀuh mdê kơ klei hdĭp dhar kreh dŭm djuê ana Việt Nam - anôk bi mguôp êpul êya, bruă klam mơ̆ng gŏ sang leh anăn klei ñŭ kma mbĭt hŏng čư̆ dliê dưi kriê pioh hlăm lu ênuk gưl.

Y-Tiên Niê Kđăm, pô hiu atăt tuê hiu chưn ênguê, lu thŭn atăt phung tuê nao ti dŭm ƀuôn êlan ti Dak Lak. Hŏng ñu, grăp gưl nao atăt amâo djŏ knŏng jing tour hiu čhưn ênguê, ƀiădah jing sa hdră bi mguôp, đru kơ phung tuê thâo kơ dhar kreh ƀuôn sang, bi mnuih ƀuôn sang jhŏng bi êdah klei hdĭp aguah tlam pô. Ayŏng Y-Tiên brei thâo, bruă hiu čhưn ênguê ƀrư̆ ƀrư̆ jing sa kdrêč hlăm klei hdĭp, mkŏ mjing hdră duh ƀơ̆ng, hưn mdah dhar kreh knhuah gru hŏng klei klă sĭt hĭn.

“Phung tuê ala tač êngao hriê tinei hŏng ƀuôn sang, mnuih ƀuôn sang pô hơ̆k mơak êdi leh anăn drông tuê hŏng jih ai tiê leh anăn mâo klei jhŏng hĭn”.

Gŏ sang amai H’Đor Ênuôl ti ƀuôn Čuah, să Krông Ana, čar Dak Lak ară anei mưng leh hŏng bruă drông tuê ala tač êngao hlăm sa krum đưm, 4 gưl hlăm gŏ sang hdĭp mbĭt. Klei hdĭp mâo phung tuê ăt msĕ aguah tlam mơh. Amai H’Đor ăt pơ̆k mñam, ƀă anak điêt hluê dŭm êpul tuê nao kơ hma mbĭt hŏng ung ti dlông êdeh kai pô. Hlăm dŭm gưl drông phung tuê, amai ƀuh, phung tuê ala tač êngao hriê čiăng lông ngă bruă sĭt, kyuanăn knŏng čiăng hdĭp sĭt leh anăn mă sĭt.

“Mphŭn kâo mĭn drông tuê ala tač êngao srăng dleh, ƀiădah mâo dŭm blư̆ ƀuh ăt ênưih mơh, pô hdĭp sĭt, mă sĭt čiăng kơ phung tuê ƀuh klei sĭt klei klei hdĭp leh anăn bruă mă pô. Ƀrư̆ ƀrư̆ pô jhŏng hĭn blŭ hrăm hŏng tuê.”

Bruă hiu čhưn ênguê êpul êya ti dŭm ƀuôn êlan Dak Lak dôk mđing truh kơ klei thơ̆ng kơ bruă leh anăn mkŏ mjing dŭm klei bi mguôp hơĭt kjăp. Ti ƀuôn čuôr (să Hoà Phú), ung mô̆ amai H’Belly Êban mdơ̆ng leh sang krum Êđê čiăng ngă homestay drông tuê. Čiăng blŭ hrăm hŏng phung tuê ala tač êngao, amai hriăm klei Angle, klei Prăng. Hluê si amai H’Belly, bruă hiu čhưn ênguê êpul êya jih sa ƀuôn ngă mbĭt, bi kah mbha leh anăn mâo boh tŭ dưn mbĭt. Bruă hiu čhưn ênguê êpul êya mđing truh kơ ñŭ kma tar rŏng lăn, srăng đru kơ mnuih ƀuôn sang djă pioh knhuah gru dhar kreh, dŭm boh tŭ dưn jăk siam mơ̆ng djuê ana pô.

          “Ngă bruă hiu čhưn ênguê êpul êya srăng bi mguôp jăk hĭn, thơ̆ng kơ bruă hĭn. Ƀiădah yuôm hĭn ăt mơ̆ng grăp gŏ sang, grăp ƀuôn êlan srăng djă pioh dŭm boh tŭ dhar kreh. Kyua phung tuê hriê amâo djŏ knŏng huă ƀơ̆ng, mdei msăn, ƀiădah lŏ čiăng dlăng kơ dhar kreh leh anăn hmư̆ dŭm klei yăl dliê mơ̆ng ƀuôn sang.”

        Trần Hồng Tiến, Khua knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak brei thâo, bruă hiu čhưn ênguê êpul êya jing êlan nao djŏ guôp, pŏk êlan mđĭ kyar bruă duh mkra mrâo, đru mguôp kriê pioh dhar kreh leh anăn mñă klă bruă klam jing phŭn mơ̆ng mnuih ƀuôn sang, êpul êya hlăm klei ñŭ kma.

“Hmei srăng ba yua dŭm wăl anôk kriê pioh, bi mguôp hŏng klei duh bi liê mơ̆ng Knŭk kna leh anăn dŭm hdră ala čar kñăm, čiăng đru kơ mnuih ƀuôn sang jing mnuih djuê ƀiă bi lar, kriê pioh dŭm boh tŭ dưn dhar kreh nao mbĭt hŏng mđĭ kyar bruă hiu čhưn ênguê yang ƀuôn.”

Mơ̆ng đĭ êdeh kai nao kơ hma, mơ̆ng djam hla hbei ƀlang - djam trŏng, truh kơ anôk pơ̆k mñam, ti djiêo dring sang, dŭm mlam hmư̆ ênai tông čing, bruă hiu čhưn ênguê êpul êya ti Dak Lak ăt nao mbĭt hŏng knhuah gru, klei ktưn hưn leh anăn knuih hdĭp pô čiăng bi mguôp hŏng mah jiăng tar rŏng lăn./.