Hŏng 90,51% phung bi ala Bruă Kbĭn ala tŭ ư, Bruă Kbĭn ala bi klă hdră mtrŭn kơ hdră êlan mđĭ kyar bruă duh mkra ala ƀuôn thŭn 2026. Hdră mtrŭn bi klă 15 ênoh čuăn phŭn, hlăm anăn: Klei đĭ kyar mnơ̆ng dhơ̆ng hlăm lăn čar (GDP) gĭr mâo mơ̆ng 10% kơ dlông. GDP kah knar grăp čô mâo mơ̆ng 5.400 - 5.500 dolar Mi (USD). Anei jing dŭm ênoh čuăn dlông, ƀiădah hluê si lu phung bi ala êjai bi trông kơ boh klei anei srăng bi djăp tur knơ̆ng srăng mâo mta kñăm hŏng bruă mkŏ mjing hlăm wưng anei. Pô bi ala Trần Văn Lâm, Êpul bi ala Bắc Ninh mnă klă, dŭm boh tŭ dưn đĭ kyar dưi mâo, mbĭt hŏng hdră êlan mâo leh Bruă Kbĭn ala bi kluôm hlăm dŭm klei kƀĭn giăm anei, jing boh kdrŭt čiăng kơ Việt Nam mŭt hlăm thŭn 2026 hŏng klei jhŏng leh anăn čŏng pô:

“Đĭ kyar thŭn anei mâo êbeh 8%. Leh anăn klei găl kơ wưng êdeu mâo leh Bruă Kbĭn ala hlăm lu klei kƀĭn bi trông čiăng ngă klei mkra mlih dŭm hdră êlan, mkŏ mjing lu kdrăp kyua ktang đru kơ Knŭk kna čiăng mtrŭt mđĭ klei đĭ kyar hlăm thŭn 2026 leh anăn wăt wưng êdei hŏng mta kñăm lu hĭn leh anăn kâo đăo knang jing dŭm klei drei dưi leh anăn dôk ngă srăng mâo boh tŭ dưn msĕ hŏng mta kñăm”.

Hŏng 88,61% phung bi ala bi tŭ ư, tlam anei Bruă Kbĭn ala bi klă hdră mtrŭn kơ tĭng mkă ngăn prăk Knŭk kna thŭn 2026. Hluê anăn, hdră mtrŭn anei hŏng hnư Knŭk kna hrui wĭt jing êbeh 2 êklăk mkrah êklai prăk. Kluôm ênoh prăk bi liê jing êbeh 3 êklăk êklai prăk ( lu jing mbŏ kơ dŭm alŭ wăl rơ̆ng ngă prăk mlan nah gŭ 2 êklăk 340 êbâo prăk hlăm sa mlan).

Sa bruă mkăn ăt mâo phung bi ala Bruă Kbĭn ala leh anăn phung bi ala kơ mnuih ƀuôn sang uêñ mĭn anăn jing klei live stream čhĭ mnơ̆ng. Êjai brei klei blŭ mguôp kơ Hdră bhiăn čhĭ mnia online, phung bi ala yap anei jing hdră bhiăn yuôm bhăn, amâo djŏ knŏng mkra mlih klei čhĭ mnia ƀiădah lŏ jing tur knơ̆ng bruă mkŏ mkra mơ̆ng bruă duh mkra mrô lăn čar. Pô bi ala Hoàng Thị Thanh Thúy, Êpul mơ̆ng Tây Ninh lač, khădah hdră bhiăn bi klă leh bruă klam mơ̆ng pô live stream čhĭ mnơ̆ng ƀiădah adôk dôk mâo lu anôk huông msĕ si: ka mâo hdră êlan ksiêm dlăng êlâo kơ mđung dŭm mta mnơ̆ng hmăi kơ klei suaih pral, mông djă pioh klei čih hưn adôk bhiâo, ka bi klă bruă klam êjai mđung klei hưn soh.

“Čiăng rơ̆ng kơ hdră bhiăn djŏ hĭn hŏng boh sĭt dôk mkŏ mjing pral mơ̆ng klei čhĭ mnia hŏng live stream, mñă brei ksiêm dlăng bi mbŏ hdră ksiêm dlăng êlâo kơ mđung live stream dŭm mta mnơ̆ng hmăi kơ klei suaih pral, bi klă bruă klam mơ̆ng pô live stream hlăm klei mđung klei amâo mâo djŏ amâodah soh hŏng hră mơar mnơ̆ng dhơ̆ng, Pŏk mlar anôk djă pioh live stream, bi mbŏ bruă klam tur knơ̆ng pŏk hnơ̆ng čuăn live stream, ksiêm dlăng klei čih, klei dlăng mgưt leh anăn mâo klei hưn brei răng kơ phung wĭt lač amâo mâo djŏ.

Hŏng 15 êklăk čô mnuih ƀuôn sang thâo yua đĭng blŭ thâo mĭn, ƀiădah hlăm hdră bhiăn ka bi klă ôh klei čuăn čiăng răng mgang klei dưi leh anăn klei êđăp ênang kơ phung hđeh hlăm anôk čhĭ mnia online. Hlăm anăn, pô bi ala Nguyễn Thị Việt Nga, Êpul mơ̆ng Hải Phòng mñă:

“Mbĭt anăn, êjai ƀuh klei livestream mâo mta phŭn amâo mâo djŏ hŏng hdră bhiăn dhar kreh, hdră bhiăn lăn čar hmăi kơ phung hđeh čiăng mâo hdră hưn mdah găl guôp plah wah tur knơ̆ng leh anăn anôk bruă kriê dlăng čiăng lăm mtam dŭm mta phŭn anăn”.

Bi klă klei anei, k’iăng Khua Knŭk kna Bùi Thanh Sơn brei thâo:

“Hdră bhiăn ară anei ăt gĭr bi kƀĭn dŭm mta phŭn dreu dưi kriê dlăng jăk phung blei ba yua ăt msĕ mơ̆ng phung nao hgŭm hlăm klei čhĭ mnia online. Êngao kơnăn, hdră bhiăn ăt bi klă bruă klam mơ̆ng pô livestream leh anăn pô čhĭ. Hruê anei hmei lŏ dơ̆ng mđing hmư̆ klei blŭ mguôp mơ̆ng phung bi ala čiăng gĭt gai anôk bruă čih mkra bi trông lŏ dơ̆ng bi mbŏ, bi kluôm mta phŭn anei, boh nik hlăm bruă răng mgang boh tŭ kơ phung hđeh”.