Khua bruă kƀĭn ala brei thâo, hlăm wưng êgao, Bruă kƀĭn ala mlih mrâo leh klei mĭn mkŏ mjing hdră bhiăn, mtrŭt mđĭ bruă ba yua klei mlih mrô leh anăn klei thâo anak mnuih mkra mjing hlăm bruă mkŏ mjing hdră bhiăn. Ƀiădah, bruă hâo hưn hdră bhiăn ăt adôk ktrŏ hŏng klei sa anăn, ka dưi mjing klei bi mguôp hŏng mnuih ƀuôn sang. Mơ̆ng boh sĭt anăn, Khua bruă kƀĭn ala mtă kơ klei čih mkra hdră bhiăn brei mjing klei kdlưn hĭn kơ klei mlih mrô hlăm bruă hâo hưn, mtô mblang hdră bhiăn.

"Brei drei bi mlih mrô ktang hlăm bruă hâo hưn mtô mblang hdră bhiăn, ñĕ kơ klei bi mlih mrô hŏng kdrăp mă bruă ƀiădah brei mđing truh kơ klei bi mguôp lu tĭng. Boh sĭt ară anei, klei bi mlih mrô hlăm bruă hâo hưn mtô mblang hdră bhiăn knŏng mrâo mdei ti bruă ba mdah hră mơar hŏng PDF hlăm dŭm anôk hâo hưn điện tử, dleh snăk dưi iêo jak mnuih ƀuôn sang. Klei čih mkra hdră bhiăn brei mâo klei bhiăn klă klơ̆ng kơ bruă mkŏ mjing wăl anôk mrô ala čar hâo hưn mtô mblang hdră bhiăn. Bi klă hdră bhiăn bruă klam mơ̆ng dŭm anôk bruă mkăp hlăm bruă mkăp klei hâo hưn pŏk (open data) čiăng bi mguôp hlăm dŭm kdrăp AI, Chatbot čŏng ngă, đru wĭt lač hdră bhiăn kơ mnuih ƀuôn sang 24/7”.

Kơ hdră bi mguôp, amâo djŏ knŏng hâo hưn sa anôk mơ̆ng anôk bruă Knŭk kna trŭn; hdră čih mkra brei thiăm mbŏ klei kčah mtrŭn kơ hdră tŭ mă klei wĭt lač, ksiêm dlăng hnơ̆ng thâo săng leh anăn mkă hnơ̆ng dưi dưn hdră bhiăn mơ̆ng mnuih ƀuôn sang hlăm wăl anôk mrô čiăng hmao mkra mlih mta phŭn hâo hưn.

 Lač kơ bruă brei bi mklă phung mâo klei mdê hjăn leh anăn mdê hjăn kơ mta phŭn hâo hưn, Khua bruă kƀĭn ala brei thâo, Hdră bhiăn ară anei thŭn 2012 čoh čuăn dŭm êpul phung mâo klei mdê hjăn (msĕ si mnuih djuê ƀiă, phung amâo mâo jăk asei mlei, phung dôk tŭ klei bi kmhal) ƀiădah hdră hluê ngă ăt adôk kƀah. Kyua anăn, brei thiăm mbŏ dŭm hnơ̆ng čuăn tĭng mkă čiăng bi mklă phung mâo klei mdê hjăn hluê krĭng kwar, gưl thŭn, bruă duh mkra.

Khua bruă kƀĭn ala lač klă, klei êdu kƀah hlăm bruă hluê ngă hdră bhiăn jing bruă hâo hưn mtô mblang hdră bhiăn kơ mnuih ƀuôn sang djuê ƀiă. Mta phŭn kyua lăn ala kbưi, kdrăp hâo hưn mtô mblang ka tŭ dưn leh anăn klei kpăk kơ klei blŭ.

Klei čih mkra hdră bhiăn čiăng bi klă ktang bruă klam mơ̆ng dŭm anôk bruă dhar kreh nah gŭ: khua mduôn, khua ƀuôn, mnuih mâo kơhưm, găp djuê, dŭm gru hmô čŏng kriê dlăng ti êpul êya. Mbĭt anăn, mlih mơ̆ng klei hâo hưn kluôm jing hâo hưn "sĭt êmĭt", jing mnuih ƀuôn sang ya bruă ngă, hdĭp ti alŭ wăl snăn dưi mđing tal êlâo êpul hdră bhiăn hmăi klă anăp kơ klei tŭ dưn mơ̆ng diñu. Mbĭt anăn, brei msir mgaih klei kpăk kơ klei dưi mơ̆ng Êpul hgŭm hâo hưn mtô mblang hdră bhiăn dŭm gưl; msir mgaih klei dleh dlan kơ prăk bi liê, boh nik ti gưl nah gŭ leh anăn klei mnuih mă bruă lu jing ngă lu bruă.

Mbĭt hŏng bruă mlih mrâo hdră mtô mblang, Khua bruă kƀĭn ala Trần Thanh Mẫn ăt mtă brei mđĭ klei bi mguôp yang ƀuôn hlăm bruă mtô mblang, mjuăt bi hriăm hdră bhiăn; mâo hdră mtrŭn mtrŭt mđĭ anôk bruă duh mkra, êpul bruă leh anăn phung thơ̆ng kơ hdră bhiăn nao hgŭm đru kčĕ hdră bhiăn, mtô mblang hdră bhiăn kơ mnuih ƀuôn sang.

  “Kâo mĭn bruă mkra mlih Hdră bhiăn hưn mthâo, mtô mblang hdră bhiăn tal anei amâo djŏ knŏng mdei ti bruă mkra mlih boh blŭ amâodah thiăm mbŏ bruă klam kơ dŭm anôk bruă, ƀiădah brei jing sa klei mlih mrâo kơ hdră êlan hluê ngă; bi mlih klei mĭn kriê dlăng "pŏk brei" klei hâo hưn jing klei mĭn đru, đru kơ mnuih ƀuôn sang mđĭ klei thâo răng mgang pô hŏng hdră bhiăn. Bruă mkra mlih hdră bhiăn tal anei yuôm bhăn êdi čiăng rơ̆ng kơ bruă hâo hưn, mtô mblang hdră bhiăn nao hlăm boh sĭt, truh hŏng djăp êpul êya leh anăn mnuih ƀuôn sang. Anei jing bruă amâo djŏ knŏng mơ̆ng dhar bruă čih mkra Hdră bhiăn ôh ƀiădah mơ̆ng jih bruă kđi čar, mơ̆ng Đảng, bruă sang čư̆ êa, Mặt trận truh kơ dŭm êpul êya".

Bruă mkra mlih Hdră bhiăn hưn mthâo, mtô mjuăt hdră bhiăn amâo djŏ knŏng kñăm bi leh hdră bhiăn, ƀiădah lŏ bi êdah klei gĭr mơ̆ng Bruă kƀĭn ala mkŏ mjing sa hdră bhiăn giăm mnuih ƀuôn sang, ênưih dưi nao hgŭm leh anăn đru kơ mnuih ƀuôn sang jăk hĭn. Dŭm klei blŭ ti anôk bi trông lŏ brei ƀuh Bruă kƀĭn ala mđing hmư̆ nanao boh sĭt, tŭ mă klei mĭn, klei čiăng mơ̆ng mnuih ƀuôn sang čiăng bi leh hdră êlan, ba hdră bhiăn klă sĭt nao hlăm klei hdĭp./.