Ti anăp boh klei djŏ ƀơ̆ng mta ruă mâo lu leh anăn lu mta, pô bi ala Nguyễn Minh Tâm, êpul bi ala mơ̆ng Quảng Bình mñă kơ knŭk kna, Bruă Kƀĭn Ala lŏ dơ̆ng bi ênŭm dŭm hdră êlan, klei bhiăn lăn čar kñăm mkŏ mjing tur knơ̆ng hdră bhiăn kơ klei kriê dlăng knŭk kna kơ klei doh êbăt mnơ̆ng ƀơ̆ng, boh nik jing mnơ̆ng ƀơ̆ng ti ktuê êlan. Hlăm bruă gang mkhư̆ klei pui ƀơ̆ng, klei mtuh, pô bi ala Nguyễn Minh Tâm mñă klă: ăt dôk mâo boh klei “kơ dlông ktang, ti gŭ êdu” hlăm bruă hluê ngă dŭm hdră êlan ksiêm dlăng boh klei anei:

 “Hlăm gưl kƀĭn tal 5, Khua phŭn bruă mkŏ mkra mñă klă srăng hrăm mbĭt hŏng Phŭn bruă kahan ksiêm rơ̆ng jăk bruă gang mkhư̆, truih mdjiê pui ƀơ̆ng. Klei kƀĭn tal 6 phung phung bi ala mâo klei bi êdah klei uêñ mĭn kơ bruă gang mkhư̆, truih mdjiê klei pui ƀơ̆ng, knŭk kna ăt ƀuăn hrăm mbĭt gĭt gai kjăp bruă ksiêm dlăng bruă gang mkhư̆ klei pui ƀơ̆ng, truih mdjiê pui, boh nik ti dŭm ƀuôn prŏng kreh mâo dŭm klei pui ƀơ̆ng mrâo êgao brei ƀuh drei amâo thâo bĭt mjing ôh ti anăp klei ksŭng pui ƀơ̆ng. Hmăng hmưi dŭm phŭn, dhar bruă lŏ dơ̆ng ngă bruă ktang phĭt, mgaih msir boh klei kơ dlông ktang ti gŭ êdu čiăng kơ dŭm asăp mtrŭn mơ̆ng knŭk kna dưi hmao hluê ngă kñăm gang mkhư̆ klei jŭ jhat, luč liê mơ̆ng klei pui ƀơ̆ng hlăm wưng kơ anăp”.”

Hlăm bruă mtô mjuăt bi hriăm, pô bi ala Trần Đình Gia, Êpul bi ala Hà Tĩnh lač, leh wưng mlih mrâo hdră mtô bi hriăm, hră hriăm gưl 3, lu kdrăp yua hriăm hră mơar ka dưi duh bi liê năng djŏ, mtô bi hriăm phung nai dŭm mta hriăm dôk lu klei dleh dlan… Bi kơ bruă kriê dlăng klei mtô thiăm, hriăm thiăm, pô bi ala Trần Đình Gia lač:

 “Mtô thiăm, hriăm thiăm jing klei čuăn mơ̆ng yang ƀuôn tơdah dưi ksiêm dlăng, ktrâo lač tŭ dưn, ƀiădah dŭm hră mơar mtô kơ bruă kriê dlăng, mkŏ mjing klei mtô thiăm, hriăm thiăm êngao kơ sang hră ăt dôk dleh kpăk, ngă truh mâo phung mjhua hmăi kơ dhar bruă. Boh klei anei, dhar bruă mtô mjuăt bi hriăm čiăng mâo klei mtô lač”.

Bi tăng mgăl hlăm klei kƀĭn kơ klei blŭ mguôp duh bi liê kơ bruă mdrao mgŭn nah gŭ, pô bi ala Nguyễn Lân Hiếu, êpul bi ala mơ̆ng Bình Định mñă klă: tơdah dôk ngă hŏng hdră hđăp amâo mâo tŭ dưn leh anăn ba mdah hdră êlan:

 “Kâo bi êdah hlăm wưng ară anei čiăng duh bi liê ai dưi kơ bruă mdrao mgŭn gưl kdriêk, kyua jing anôk bruă mdrao mgŭn amâo mâo hơĭt wăt kơ anak mnuih leh anăn kdrăp yua. Mnuih ruă mâo klei găl nao mdrao kơ gưl nah dlông, phung adôk jing phung ƀun ƀin, phung ruă kjham, phung gui klei ktrŏ dlông mra.”

Bi klă boh tŭ dưn mơ̆ng hdră mkŏ mkra krĭng ƀuôn sang mrâo ngă kơ klei hdĭp mda, bruă duh mkra ala ƀuôn dưi mđĭ hĭn, ƀiădah pô bi ala Nguyễn Văn Huy, êpul bi ala Thái Bình huĭ hyưt kơ klei dlăng hơăi mang dhar kreh. Lu wăl dhar kreh, mnơ̆ng kriê pioh hƀuê ênuk dhar kreh, wăl bi kƀĭn yang ƀuôn bi hrŏ hĕ, dŭm klei mĭn amâo mâo jăk duah êlan mŭt leh anăn dôk hmăi kơ knhuah hdĭp mnuih ƀuôn sang ti krĭng ƀuôn sang…

 “Čiăng đru mtrŭt mđĭ bruă mkŏ mkra krĭng ƀuôn sang mrâo, bi kluôm dŭm hnơ̆ng čuăn dhar kreh hlăm bruă mkŏ mkra krĭng ƀuôn sang mrâo, kâo akâo kơ knŭk kna kñăm ksiêm duah mkŏ mjing dŭm hdră bhiăn kơ dhar kreh, dŭm klei dleh dlan kơ ai dưi duh bi liê hmăi leh kơ klei mđĭ kyar dhar kreh, akâo kơ knŭk kna uêñ mĭn ksiêm dlăng, mtô lač čiăng mâo klei čuăn klă hĭn, bi klă hĭn kơ krĭng ƀuôn sang mrâo jing dŭm klei čuăn djŏ tuôm hŏng dhar kreh”.

Ăt hlăm hruê kăm êgao, Bruă Kƀĭn Ala bi trông kơ boh sĭt kơ bruă duh mkra, ala ƀuôn leh anăn ngăn prăk knŭk kna thŭn 2023 leh anăn dŭm mlan akŏ thŭn anei.  Phung bi ala lač, bruă duh mkra ala čar drei mâo klei đĭ kyar jăk, bruă duh mkra hnơ̆ng prŏng đĭ kyar hơĭt êjai tar rŏng lăn dôk mâo klei dleh kpăk. Mñă klă gru mngač năng čih yap jing alŭ wăl bruă lŏ hma lŏ dơ̆ng bi klă bruă klam jing kmeh gơ̆ng bruă duh mkra, phung bi ala ăt mñă čiăng ksiêm dlăng hnơ̆ng pŏk mlar bruă duh mkra, mđing kơ anôk mnia mlei hlăm lăn čar 100 êklăk čô mnuih ƀuôn sang, mbĭt anăn mbha gưl, mbha klei dưi kơ alŭ wăl čiăng bi lar klei čŏng pô, klei mbruă./.