Klei hâo mdah ti anôk bi kƀĭn, Khua anôk bruă phung bi ala Nguyễn Hữu Đông brei thâo, hlăm wưng păn bruă êgao, Êpul gơ̆ng bruă ƀuôn sang gưl čar hlăm kluôm ala mkŏ mjing leh truh 1.950 klei bi kƀĭn. Hlăm anăn mâo 1.281 klei bi kƀĭn truăn kơ bruă kñăm čiăng mghaih msir bi pral dŭm mta bruă adôk ktrŏ, msĕ si kơ klei ruă tưp, kơ ngăn prăk, klei duh bi liê kluôm, lehanăn bi kjăp jih jang bruă leh bruă dăp wĭt êpul bruă. Êpul gơ̆ng bruă ƀuôn sang djăp alŭ wăl mtrŭn leh êbeh 30.800 hdră mtrŭn, mjing knơ̆ng kơ klei bhiăn kơ bruă mđĭ kyar bruă duh mkra ala ƀuôn, rơ̆ng kjăp kơ klei hdĭp mda, lehanăn đru kơ mnuih ƀuôn sang hlăm alŭ wăl. Kluôm ala mâo mkŏ mjing leh êbeh 4.000 êpul ksiêm dlăng, čih pioh êbeh 36.000 klei blŭ, klei akâo mơ̆ng mnuih ƀuôn sang hŏng hnơ̆ng dưi mghaih msir êbeh 86%. Bruă êmuh phung bi ala ƀrư̆ hrue mâo klei klă mngač hĭn, mđing bi mngač jih jang bruă klam mơ̆ng dŭm anôk bruă lehanăn mnuih djŏ tuôm. Khua anôk bruă phung bi ala Nguyễn Hữu Đông lač:

“Bruă mơ̆ng êpul gơ̆ng bruă ƀuôn sang dŭm gưl knư̆ hrue knư̆ mâo klei hnŭk êngiê ngă phŭn, mâo klei kjăp lehanăn tŭ jing, mâo lu klei mlih mrâo dơ̆ng mơ̆ng klei mĭn, hlŏng truh kơ klei mă bruă. Mơ̆ng anăn, lŏ dơ̆ng bi klă klei jing, k’hưm, bruă klam mơ̆ng dŭm anôk bruă mâo klei dưi knŭk kna ti alŭ wăl hlam jih bruă kđi čar.”

Mñă kơ bruă klam ksiêm dlăng klei dưi mơ̆ng Êpul gơ̆ng bruă ƀuôn sang, Đồng Văn Thanh, Khua êpul gơ̆ng bruă ƀuôn sang ƀuôn prŏng Cần Thơ brei thâo, tơdah klei dưi hlăm bruă kiă kriê amâo mâo klei ksiêm dlăng kjăp ôh, srăng truh kơ klei mjhua hŏng klei dưi, ñĕ đuĕ bruă klam, amâodah mă bruă amâo mâo klei tuư dưn ôh. Kyuanăn, Êpul gơ̆ng bruă ƀuôn sang ƀuôn prŏng mâo ngă leh lu hdră hlăm klei mă bruă msĕ si mâo hdră mtrŭn, mâo klei kăp ksiêm, mbha gưl, mbha klei dưi, lehanăn bi tuôm hŏng mnuih ƀuôn sang.

 “Boh sĭt mơ̆ng bruă knuă brei ƀuh, mâo dŭm êpul phung bi ala, lehanăn phung bi ala nao ksiêm dlăng kơ jih jang klei blŭ, klei akâo mơ̆ng mnuih ƀuôn sang, leh klei bi tuôm, lehanăn hưn hŏng dŭm anôk bruă djŏ tuôm, snăn bi mghaih msir pral mtam, bi leh, bi leh, snăn mnuih ƀuôn sang ƀuh ư ai mơh, hŏng klei bruă sang čư̆ êa mđing uêñ. Kyuanăn, dŭm klei blŭ jing klei năng mơ̆ng mnuih ƀuôn sang, jing leh sa kdrêč hlăm bruă kăp ksiêm klei dưi hŏng klei yuôm bhăn, năng mâo klei kăp ksiêm jêñ jêñ, mtrŭt mghaih msir bi pral, đru mđĭ klei tŭ dưn bruă knŭ kna kiă kriê, lehanăn lŏ mđĭ hĭng klei mnuih ƀuôn sang đăo knang hŏng bruă sang čư̆ êa alŭ wăl”.

 Ti anôk bi kƀĭn, Phạm Thị Thanh Trà, K’iăng khua knŭk kna mâo klei bi êdah leh 5 hdră kñăm ba wĭt klei tŭ dưn hĭn êpul gơ̆ng bruă ƀuôn sang mă bruă hlăm wưng thŭn 2026 - 2031. Hlăm anăn mñă kơ klei mlih mrâo klei mĭn kiă kriê hlue hdră êlan mă ai tiê mnuih ƀuôn sang lehanăn phung duh mkra yơh jing tal êlâo, mđĭ hĭn klei mbha gưl, mbha klei dưi nâo mđrĭng hŏng bruă kăp ksiêm klei  kriê hŏng bruă mrô lehanăn AI; mđĭ mlih bruă ngă hră mơar, mđĭ klei thâo ksiêm dlăng hdră êlan, lehanăn kăp hưn pral kơ ya mta klei amâo mâo jăk êjai mă bruă:

Klei kăp ksiêm bruă knuă mơ̆ng êpul gơ̆ng bruă ƀuôn sang, năng bi mlih mơ̆ng bruă ksiêm tui si boh klei, nao hlăm klei kăp ksiêm hdră êlan mđĭ kyar, bi mlih mơ̆ng klei kăp ksiêm boh tŭ dưn knhal tuič, bi ksiêm êlam hĭn hlăm dŭm mta klei ênưih lĕ hlăm amâo mâo jăk, msĕ si kơ klei duh bi liê kluôm, klei kơ lăn ala, kơ bruă čuăl mkă, klei bi mlih hdră mă bruă. Klei yuôm bhăn hĭn, jing mđĭ hĭn klei thâo kăp hưn pral, hmâo thâo ƀuh, mghaih msir bi pral ya mta klei amâo mâo jăk mơ̆ng nah gŭ”.

 Klah čŭn anôk bi kƀĭn, Khua bruă kƀĭn ala Trần Thanh Mẫn mñă, hlăm boh klei mrâo, Êpul gơ̆ng bruă ƀuôn sang dŭm gưl lŏ dơ̆ng mlih mrâo ktang hĭn čiăng bi năng kơ klei mđĭ kyar lăn čar. Bruă mơ̆ng Êpul gơ̆ng bruă ƀuôn sang brei bi djŏ hŏng hdră êlan mơ̆ng Đảng, mâo klei ngă phŭn êngiê, mđĭ hĭn klei bi kdơ̆ng hŏng klei ƀơ̆ng ngăn, klei bi liê hơăi mung mang, klei ngă amâo mâo djŏ, lehanăn mă klei mnuih ƀuôn sang, lehanăn phung duh mkra ư ai jing giê mkă.

“Êpul gơ̆ng bruă ƀuôn sang dŭm gưl mđĭ hĭn klei Đảng kiă kriê hŏng klei mkŏ mjing, lehanăn bruă ngă mơ̆ng êpul gơ̆ng bruă ƀuôn sang, anei yơh jing anôk tŭ hĭn. Bruă mơ̆ng êpul hgŭm bruă ƀuôn sangknŏng klă sĭt mâo klei tŭ dưn, tơdah mâo klei ksiêm dlăng jih jang hdră êlan, hdră mtrŭn mơ̆ng Đảng, mjing klei gĭr mơ̆ng bruă kđi čar mơ̆ng Đảng jing klei bhiăn, jing hdră êlan mơ̆ng bruă sang čư̆ êa alŭ wăl. Lŏ dơ̆ng hlue ngă kjăp hĭn, lehanăn tŭ jing hĭn dŭm hdră êlan mơ̆ng Đảng kơ bruă mkŏ mjing knŭk kna mâo klei dưi mơ̆ng yang ƀuôn ngă phŭn êngiê, mlih mrâo êpul bruă sang čư̆ êa, lehanăn dưn yua kjăp hĭn klei ngă phŭn êngiê. Bi kdơ̆ng hŏng klei ƀơ̆ng ngăn, klei bi liê hơăi mung mang, klei amâo mâo jăk. Klei sa ai mơ̆ng mnuih ƀuôn sang, mơ̆ng phung duh mkra jing giê mkă hŏng jih jang bruă êpul gơ̆ng bruă ƀuôn sang mă.”