Hrue kăm êgao, êpul ksiêm mơ̆ng Dhar bruă gĭt gai bruă kƀĭn ala mă leh bruă hŏng čar Bình Định kơ klei hlue ngă hdră mtrŭn mơ̆ng bruă kƀĭn ala mlih mrâo hdră mtô bi hriăm sang hră mơar. Tui si klei hâo mdah, čar Bình Định mâo bi leh jih bruă bi hriăm mbŏ hdră mtô bi hriăm mơ̆ng hlăk thŭn 2018 kơ êbeh 12.700 čô nai lehanăn phung knuă druh bruă sang hră mơar. Knơ̆ng bruă sang hră mơar čar Bình Định kčoh mkra leh hdruôm hră mjuăt bi hriăm adŭ1; adŭ 2; adŭ 3; adŭ 6, adŭ 7, lehanăn adŭ 10, hŏng klei jăk lehanăn djăp ênoh čiăng.

 Ti anôk mă bruă hŏng Êpul ksiêm mơ̆ng dhar bruă gĭt gai bruă kƀĭn ala, snăn čar Bình Định akâo leh kơ knŭk kna mkăp brei hră hriăm amâo mâo mă prăk ôh hŏng phung hđeh hriăm hră jing mnuih djuê ƀiă, hđeh krĭng čư̆ čhiăng, akâo kơ phŭn bruă sang hră mơar pral mâo hdră kơ klei bi lông jih gưl 3 thŭn hriăm 2024-2025 čiăng kơ djăp alŭ wăl mâo hdră mprăk jăk hĭn.

         K’iăng khua bruă kƀĭn ala Trần Thanh Mẫn mtă kơ čar Bình Định lŏ dơ̆ng bi lar jăk hĭn jih jang bruă mâo ngă leh, mghaih msir bi jih dŭm mta bruă adôk awăt, mâo leh êpul ksiêm dlăng kčĕ, mđing mghaih msir bi jăk kơ mnuih ngă bruă, mđĭ bruă bi mlih mrô hlăm sang hră mơar:

“Mđĭ klei kjăp kơ jih jang phung nai mtô, lehanăn mnuih ngă bruă hlăm sang hră mơar, kơ ênoh phung nai mtô. Ngă bruă bi mlih mrô, ba yua kdrăp mă bruă mrâo mrang, bi mguôp ngă bruă hŏng klei tŭ jing. mơ̆ng hdră ala čar kñăm, mâo klei bi mguôp mơ̆ng yang ƀuôn, čiăng mjing ai ktang kơ bruă sang hră mơar pioh duh bi liê kơ krĭng mnuih djuê ƀiă, krĭng dleh dlan”.

            Êpul ksiêm dlăng mơ̆ng Dhar bruă gĭt gai bruă kƀĭn ala lač, klei mâo hră mtrŭn klei kiă kriê, ktrâo atăt hdră mtô bi hriăm hŏng hră mrâo thŭn 2018 mơ̆ng čar Bình Định mâo ngă hŏng klei jăk leh, mjing klei găl kơ bruă kđi čar đru kơ dŭm knơ̆ng dhar bruă alŭ wăl mă bruă jăk.

Mbĭt hŏng wưng leh êgao, k’iăng khua bruă kƀĭn ala Trần Thanh Mẫn mbĭt hŏng êpul ksiêm dlăng mơ̆ng dhar bruă gĭt gai bruă kƀĭn ala lŏ mă leh bruă hŏng knơ̆ng bruă sang čư̆ êa čar Hưng Yên kơ bruă hlue ngă hdră mtrŭn mơ̆ng bruă kƀĭn ala hlăm klei mlih mrâo hră mtô bi hriăm. Khua bruă Đảng čar Hưng Yên Nguyễn Hữu Nghĩa brei thâo, čar duh bi liê leh kơ bruă nah gŭ, hlăm anăn mâo rŭ mdơ̆ng sang hră mơar, gĭr čiăng bi mâo djăp anôk kơ hdeh hriăm hră hriăm:

“Mơ̆ng kčưm wưng ngă bruă mtam hmei mâo hdra mtrŭn mrô 12 kơ klei, mđĭ kyar bruă sang hră mơar čar Hưng Yên truh thŭn 2025 lehanăn hlŏng tă êlan truh kơ thŭn 2030”. Hdră mtrŭn anei mâo mta kñăm kluôm, wăt hlăm bruă mđĭ kyar bruă nah gŭ, sang hră mơar, mbĭt hŏng hdruôm hră mơar, boh nik hdruôm hră mtô bi hriăm mrâo, mđing hlăm 5 mta bruă phŭn anăn jing: sa, kơ anak mnuih snăn phung nai mtô, mnuih ngă bruă hlăm sang hră mơar, tal dua: jing kơ anôk anăn jing sang hră adŭ hriăm, kdrăp mtô bi hriăm; tal 3: dăp bruă, dăp mnuih; tal 4 mđĭ ai kluôm yang ƀuôn bi mguôp mbĭt, lehanăn tal 5: jing bruă klam mkŏ mjing lehanăn hlue ngă hdră mtrŭn anei”.

         Blŭ hrăm klah čŭn ti anôk ngă bruă, k’iăng khua bruă kƀĭn ala Trần Thanh Mẫn mtă hlăm wưng kơ anăp čar Hưng Yên lŏ dơ̆ng bi ksiêm, čuăl mkă bruă sang hră mơar, mâo klei akâo bi ksiêm, bi mlih jăk hĭn kơ mnuih hriăm, lehanăn mđĭ hnơ̆ng tŭ jăk hlăm bruă mjuăt bi hriăm kluôm:

“Iêo jak klei duh bi liê kơ bruă sang hră mơar,mđĭ hĭng klei thâo bi mguôp hŏng yang ƀuôn .Ară anei mâo leh lu sang hră êngao knŭk kna, mâo lu phung nai mtô êngao knŭk kna, snăn ƀuh klei anei jing mơak snăk, knŏng pô thâo bi kiă kriê jăk. Bi mbha gưl, mbha hnơ̆ng, čŏng bi đua klam hŏng dŭm boh sang hră, mđĭ hĭn klei kăp ksiêm jêñ jêñ, lehanăn mghaih msir mtam ya mta jing amâo mâo djŏ hlăm bruă sang hră mơar”./.