Hrue 19/7, Êpul ksiêm dlăng mơ̆ng bruă kƀĭn ala mâo Thượng tướng Trần Quang Phương, K’iăng khua bruă kƀĭn ala ngă khua êpul ngă leh bruă hŏng phung khua kiă kriê čar Daklak kơ boh tŭ dưn klei hlue ngă dŭm hdră mtrŭn mơ̆ng anôk bruă kƀĭn ala, mâo: Hdră lăn čar kñăm mkŏ mkra krĭng ƀuôn sang mrâo; hdră bi hrŏ ƀun hŏng klei kjăp wưng thŭn 2021-2025 lehanăn hdră mđĭ duh mkra ala ƀuôn krĭng mnuih djuê ƀiă lehanăn krĭng čư̆ chiăng wưng thŭn 2021-2030.

Hâo mdah hŏng êpul ngă bruă, leh giăm 3 thŭn hlue ngă bruă 3 hdră ala čar kñăm, snăn krĭng ƀuôn sang čar Daklak mâo leh klei bi mlih. Klei hdĭp mda mnuih djuê ƀiă mâo leh klei đĭkyar, hnơ̆ng ênoh gŏ êsei ƀun hrŏ. ai tiê lehanăn mnơ̆ng dhơ̆ng mâo klei đĭ hĭn. Jih jang bruă kđi čar mâo bi kjăp, klei êđăp ênang yang ƀuôn dưi răng mgang. 

Siămdah, mbĭt hŏng jih jang boh tŭ dưn leh mâo, mơ̆ng klei hlue ngă 3 hdră lăn čar kñăm ti Daklak ăt tuôm hŏng lu klei dleh dlan, mâo dŭm ênoh čuăn mơ̆ng hdră kñăm dleh mâo boh tŭ dưn. Klei mnuih ƀuôn sang tlaih mơ̆ng ƀun ƀin ênưih anăp lŏ lĕ hlăm klei dleh dlan.

Ƀuh dŭm mta phŭn ngă truh klei dleh dlan hlăm klei hlue ngă 3 hdră lăn čar kñăm, snăn phung bi ala lač: Mnuih ngă bruă, lehanăn klei thâo ngă bruă hlăm phung knuă druh čiăng dưi ngă jih hdră lăn čar kñăm jing adôk awăt êdu êdi hlăm alŭ wăl nah gŭ. Mbĭt hŏng anăn mâo đa đa bruă hlăm 3 hdră lăn čar kñăm jing ka pral mâo ngăn prăk bi liê, lehanăn hră mơar ktrâo atăt kơ bruă ngă adôk êmưt mơ̆ng gưl dlông hlŏng kơ dhŭn knơ̆ng dhar bruă lehanăn nah gŭ ka djăp ênŭm. Đinh Xuân Hà, Khua knơ̆ng bruă čuăl mkă lehanăn duh bi liê čar Daklak lač:

“Mâo leh dŭm mta hră mơar dưi bi mlih, thiăm mbŏ, ƀiădah ăt adôk mđĭ mđăl. Dôk tuôm hŏng lu mta hră mơar kơ klei ngă bruă amâo mâo bi sa hnơ̆ng ôh. Hlăm grăp kdrêč hră mơar čih mdê mdê, snăn truh kơ alŭ wăl čiăng ngă bruă jing thâo săng mdê hŏng hdră mtrŭn”.

Khua bruă Đảng čar Dak Lak Nguyễn Đình Trung ăt hưn mơh kơ jih jang klei dleh dlan, klei awăt msĕ si: Bruă jao lăn kơ mnuih djuê ƀiă dôk tuôm hŏng lu klei dleh kpăk, năng brei bi mâo dŭm hdră êlan djŏ guôp hĭn hŏng klei bhiăn hdĭp mnuih lăn dap kngư anei, bruă ngă, lehanăn phung dưi dưn hdră êlan mă bruă hlăm wưng thŭn 2021 - 2025 mâo lu klei mrâo snăn, snăn năng mâo hdră êlan bi ksiêm mkă hlak mblang kñăm bi mklă jih jang bruă duh bi liê kyuadah awăt dôk tuôm hŏng klei dleh dlan mtŭk mtŭl.

Blŭ hrăm ti anôk ngă bruă, Thượng tướng Trần Quang Phương, K’iăng khua Bruă kƀĭn ala čih pioh, lehanăn bi mklă boh tŭ dưn klei hlue ngă hdră êlan lăn čar kñăm tui si čar Daklak mâo leh. Lehanăn, hŏng klei ksiêm dlăng anei, čiăng hrăm mbĭt đru bi ruh mgaih klei dleh dlan, hŏng hdră mă bruă klă mngač mơ̆ng čar, k’iăng khua bruă kƀĭn ala mtă:

 “Phung khua kiă kriê čar lŏ dơ̆ng gĭt gai kjăp, mâo klei hâo mdah ênŭm kkơ jih jang klei blŭ čiăng kơ êpul ngă bruă bi klin jih jang bruă dôk gun kpăk, lŏ dơ̆ng akâo kơ hdră êlan ruh mgaih, ngă bruă. Tal dua lĕ kiă kriê bi kjăp, bi hmao plah wah dŭm anôk bruă êpul êya, dưn yua jih klei găl ai dưi, ƀrư̆ ƀrư̆ mâo klei bi mlih klei bhiăn duh ƀơ̆ng mđĭ kyar klei hdĭp mda ala ƀuôn”.

Wưng leh êgao, bruă kƀĭn ala mâo ngă leh hdră ksiêm dlăng kơ klei hlue ngă hdră lăn čar kñăm thŭn 2023 ti 03 krĭng. Msĕ si: Ksiêm dlăng klei jing lehanăn bruă ngă, lehanăn mâo bruă ngă klă anăp lehanăn hŏng online mkŏ mbĭt hŏng 14 boh čar krĭng kngư kwar krah, lehanăn krĭng lăn dap kngư ti čar Bình Định; ksiêm dlăng klei ngă bruă hŏng 13 boh čar krĭng dap mnai krông Cửu Long mkŏ mjing ti čar Bạc Liêu.

K’iăng khua knŭk kna ăt jao kơ Phŭn bruă čuăl mkă lehanăn duh bi liê kiă kriê bi hgŭm hŏng dŭm phŭn dhar bruă mâo Phŭn bruă lŏ hma, Phŭn bruă mnuih ngă bruă phung knap mñai, Anôk bruă kiă kriê mnuih djuê ƀiă lehanăn dŭm phŭn dhar bruă djŏ tuôm mkăn, mbĭt hŏng dŭm alŭ wăl mprăp klei hâo mdah, hră mơar ngă bruă mâo mmông bi trông hŏng alŭ wăl, hlăm anăn mđing mă klei hriăm, bi lar dŭm hdră êlan ngă bruă jăk, ngăn bruă djŏ hlăm bruă mkŏ mjing lehanăn bi leh klei bhiăn, kơ hdră bi liê ngăn prăk kñăm bi leh jih jang bruă lăn čar kñăm ti dŭm alŭ wăl, ksiêm bi nik, thâo ƀuh bi pral jih jang klei dleh dlan, lehanăn mâo klei akâo čiăng ruh mgaih jăk jih jang klei gun kpăk, mđĭ hĭn bruă knuă leh kčah. Adŭ bruă knŭk kna bi hgŭm leh hŏng dŭm phŭn dhar bruă, alŭ wăl djŏ tuôm mprăp kơ hdră êlan ngă bruă, bruă knuă ngă, lehanăn jih jang klei găl kơ bruă knuă kñăm hlue ngă hdră kñăm hŏng klei tŭ dưn./.