Klei bi kƀĭn tal 10 srăng pŏk hlăm hrue 20/10 lehanăn srăng bi hruĕ hlăm brô hruê 12/12. Tui si tĭng bruă kƀĭn ala srăng ksiêm, bi mklă: 45 klei čih mkra hdră bhiăn, hdră mtrŭn dôk hlăm bruă mkŏ mjing klei bhiăn; 13 êpul bruă kơ klei duh mkra ala ƀuôn, klei kơ ngăn prăk knŭk kna, klei kăp ksiêm lehanăn bi mklă dŭm mta bruă prŏng mkăn kơ lăn čar; mbĭt anăn mâo 13 êpul bruă mâo dŭm mta bruă mơ̆ng dŭm anôk bruă hâo mdah leh pioh kơ phung bi ala ksiêm dlăng.

Khua knŭk kna Phạm Minh Chính lač, klei mkŏ mjing hdră bhiăn, ti gŭ klei bhiăn knŭk kna mâo klei dưi mơ̆ng yang ƀuôn ngă phŭn êngiê, kyua kơ mnuih ƀuôn sang, kyua kơ mnuih ƀuôn sang, mă mnuih ƀuôn sang jing phŭn. Khua knŭk kna mtă, dua anôk bruă mâo klei bi hgŭm, mă bruă hŏng klei tŭ jing hŏng dŭm anôk bruă mkăn, lehanăn bi hgŭm hŏng bruă Mặt trận čar kwar kăp mđing hmư̆ klei mĭn mnuih ƀuôn sang, phung truăn kơ bruă, phung kreh knhâo, tui duah klei mdid\ kyar, rơ̆ng mă bruă bi dhŏ hŏng hdră êlan, lehanăn bi leh hŏng hdră kčah. Mbĭt anăn, bruă mprăp kơ dŭm bruă čih mkra klei bhiăn brei mâo klei ksiêm bi nik, bi hgŭm kjăp plah wah dŭm anôk bruă, brei mâo bruă đua klam. Khua knŭk kna Phạm Minh Chính mñă:

 “Lŏ dơ̆ng mlih mrâo klei mĭn, mđĭ hĭn bruă čuăl mkă klei čih mkra hdră bhiăn, bi mlih mơ̆ng klei mĭn mang kơ klei kiă kriê nao kơ klei mĭn jing mnuih mă bruă kơ pô mkăn. Anei jing sa klei êmuh hlăm wưng ară anei. Bi păn kjăp boh sĭt klei dôk găn, mpŭ kơ klei jing ară anei, mă klei kpă jing giê mkă. Bi mlih yơh klei mĭn, kčưm mă bruă hlăm klei mlih mrâo, ai ktang kbiă hriê mơ̆ng mnuih ƀuôn sang. Snăn bruă mkra hdră bhiăn brei mâo klei ksiêm duah kjăp hŏng hdră êlan anăn yơh.”

          Mbĭt anăn, hŏng dŭm klei khua knŭk kna Phạm Minh Chính klă čŭn leh, Khua bruă kƀĭn ala Trần Thanh Mẫn lŏ mñă, mơ̆ng ară anei hlŏng truh kơ hrue bi kƀĭn amâo lŏ sui ôh, boh nik êjai mâo lu bruă yuôm bhăn, msĕ si prăp êmiêt kơ klei bi kƀĭn prŏng Đảng kluôm ala gưl 14, ruah khua bruă kƀĭn ala gưl 16 lehanăn êpul gơ̆ng bruă ƀuôn sang dŭm gưl wưng păn bruă 2026-2031. Siămdah, bruă kƀĭn ala, knŭk kna ăt mprăp bi jăk kơ klei bi kƀĭn tal 10, jing klei bi kƀĭn knhal tuič mơ̆ng wưng păn bruă bruă kƀĭn ala gưl 15.

Khua bruă kƀĭn ala mñă, dŭm anôk bruă lŏ bi čih mkra, mprăp bi djŏ hŏng klei bhiăn, dŭm mta mtrŭn, klei bhiăn mâo mtrŭn. Leh klei bi kƀĭn, khua čih hră anôk bruă kƀĭn ala bi hgŭm hŏng khua adŭ bruă knŭk kna dăp hdră bi djŏ hŏng wưng kčah dŭm klei bi kƀĭn mơ̆ng Đảng.  Dua nah lŏ dơ̆ng bi hgŭm pral hĭn bruă mprăp hră mơar, ba yua hlăm APP bruă kƀĭn ala, čiăng kơ phung bi ala bruă kƀĭn ala ksiêm dlăng. Khua bruă kƀĭn ala brei thâo, hŏng ai tiê mă bruă bi pral, ti anôk bi kƀĭn anei, bruă kƀĭn ala, lehanăn knŭk kna  mâo leh klei bi tŭ ư amâo mâo mdei ôh mkrah wưng.

“Bruă kƀĭn ala ăt kăn ngă rei klei êmuh, ƀiădah hrô kơ anăn hŏng hdr\a mkăn, knŭk kna mơĭt klei hâo mdah bi djăp ênŭm čiăng kơ bruă kƀĭn ala trông čhai hlăm sa aguah. Anôk bruă ba mdah hdră čŏng mprăp jih jang mta phŭn kơ klei hâo mdah, snăn phung khua phŭn bruă, khu ânôk bruă mâo dŭm mta bruă pioh hâo mdah. Kñăm bi hrŏ mmông ba mdah hră mơar hlăm brô 5 mnĭt, dăp mmông bi djŏ kơ dŭm hdră bhiăn, hdră mtrŭn pioh trông čhai, lehanăn mmông kơ bruă kƀĭn ala ksiêm dlăng pioh mâo klei bi mklă. Kyua hlăk mjêč, snăn klei bi kƀĭn bruă kƀĭn ala tal anei srăng mbha êpul bi trông. Hŏng klei bi trông hlue êpul duh mkra, êpul yang ƀuôn, êpul bruă hdră bhiăn klei kreh knhâo, kdrăp mrâo bruă lĭng kahan, bruă răng mgang klei êđăp ênang, drei bi mbha êpul bi trông čhai mơh.”

Khua bruă kƀĭn ala mtă kơ phung khua phŭn bruă, Khua Êpul gơ̆ng djuê ana, khua dŭm dhar bruă bi tui tiŏ tơl leh bruă mkra hdră bhiăn, mâo leh dŭm anôk bruă dôk čih mkra, ba mdah, tơl truh ti mmông bruă kƀĭn ala bi mklă. Mbĭt hŏng anăn, phung khua phŭn bruă lŏ mtrŭt mjhar êpul bruă pô mđĭ hĭn klei ba yua kdrăp mrô, ba yua klei kreh knhâo hlăm bruă knuă, mă bruă hŏng klei pral hĭn lehanăn mâo klei tŭ dưn hĭn. Khua bruă kƀĭn ala Trần Thanh Mẫn tŭ ư hŏng khua knŭk kna Phạm Minh Chính lač, dua nah brei mâo klei bi hgŭm kjăp, klei bi kƀĭn tal anei mâo klei tŭ dưn mbĭt kơ knŭk kna lehanăn bruă kƀĭn ala, ti gŭ klei gĭt bgai mơ̆ng êpul khua kiă kriê bruă Đảng gưl dlông, Phŭn bruă kđi čar, êpul khua kiă kriê bruă Đảng, lehanăn mơ̆ng Khua gĭt gai Đảng  Tô Lâm.