Ti krĭng mnuih djuê ƀiă, lăn dôk, lăn pla mjing leh anăn bruă mă ăt jing dŭm bruă mâo mnuih ƀuôn sang, phung mplĕ hră mđing dlăng êdi. Puih Kơk, ti ƀuôn Ia Grăng 1, să Ia Grai, čar Gia Lai, hmăng hmưi Knŭk kna mâo hdră đru djŏ guôp hŏng dŭm gŏ sang dleh dlan.

"Čang hmăng knŭk kna mđing kơ lăn dôk leh anăn lăn pla mjing mơ̆ng mnuih ƀuôn sang, mđing tal êlâo kơ phung mâo klei hdĭp dleh dlan, mjing bruă mă ti sang, ti ƀuôn čiăng mđĭ kyar bruă duh mkra ala ƀuôn".

Mbĭt hŏng klei mđing uêñ kơ hdră duh ƀơ̆ng, mnuih ƀuôn sang Rơ Mah Nhiên, ti ƀuôn Ia Răng 2, să Ia Grai, čang hmăng mâo thiăm bruă mă ti anôk pô, bi hrŏ klei phung mda asei nao mă bruă kbưi.

"Bruă mă ti alŭ wăl amâo mâo, phung hđeh êdam êra ti Gia Lai nao mă bruă kbưi lu êdi, bruă mă ti anôk dôk amâo mâo. Čang hmăng Đảng, Knŭk kna mđing hĭn kơ bruă anei čiăng đru kơ mnuih ƀuôn sang mđĭ kyar bruă duh mkra hlăm êdei anăp".

Pô bi ala Ndong Brừm, mnuih K'ho ti să Dam Rông 3, čar Lâm Đồng, čang hmăng Bruă kƀĭn ala mđing dlăng klei găl mđĭ kyar krĭng mnuih djuê ƀiă, boh nik anôk bruă nah gŭ leh anăn hdră đru kơ klei hdĭp mda.

"Čang hmăng Bruă kƀĭn ala mđing duh bi liê êlan klông, bruă mdrao mgŭn, sang hră mơar leh anăn đru kơ hdră duh ƀơ̆ng kơ mnuih ƀuôn sang; mbha ngăn prăk djŏ guôp čiăng bi hrŏ klei kpleh mđĭ kyar plah wah dŭm krĭng, đru kơ mnuih ƀuôn sang tlaih ƀun hơĭt kjăp".

Dŭm klei akâo mơ̆ng nah gŭ ăt mdưm klei čiăng bi leh hdră êlan lăn ala, rơ̆ng klei tŭ dưn djŏ klă mơ̆ng mnuih ƀuôn sang leh anăn ruh mgaih klei kpăk hlăm hdră hluê ngă. Pô bi ala H’Nhip BKrông, djuê ana ÊĐê ti ƀuôn Čuôr, să Ea M'Droh, čar Dak Lak, hmăng hmưi pral msir mghaih klei ngă hră mơar bi ktlah hră djă yua lăn.

“Amĭ ama mbha kơ kâo 4 sao lăn giăm knơ̆ng bruă sang čư̆ êa să čiăng mkra mjing, ƀiădah truh kơ ară anei ka dưi mbha ôh hră tŭ yap klei dưi djă yua lăn. Kâo čang hmăng dưi msir mgaih hră mơar čiăng kơ lăn čŏng pô, hơĭt ai tiê mkra mjing”.

Ti krĭng ktuê hang ksĭ, mnuih ƀuôn sang čang hmăng dŭm hdră mtrŭn kơ klei duh bi liê knŭk kna mđing kơ bruă phŭn, msir mghaih dŭm klei êdu kƀah dôk mâo sui, răng mgang krĭng mnuih ƀuôn sang dôk ti anăp klei yan adiê ngă. Mnuih ƀuôn sang Nguyễn Văn Mẹo, ti alŭ Từ Nham, ƀuôn hgŭm Sông Cầu, čar Dak Lak, akâo pral duh bi liê kban gang klei klưh hroh.

“Grăp thŭn, êa ksĭ mŭt êlam snăk, ngă kơ mnuih ƀuôn sang huă ƀơ̆ng amâo jăk, pĭt amâo jăk grăp blư̆ truh yan hjan hlĭm. Akâo kơ Bruă kƀĭn ala, Gưl dlông ksiêm dlăng mkŏ mkra knơ̆ng kdơ̆ng êa čiăng răng mgang kơ mnuih ƀuôn sang".

Hŏng dŭm alŭ wăl êa ksĭ, plao ksĭ, akâo mđĭ kyar bruă duh mkra mguôp hŏng bruă răng mgang klei êđăp ênang ăt mâo mnuih ƀuôn sang mđing dlăng êdi. Phạm Thanh Liêm, Khua knơ̆ng bruă sang čư̆ êa krĭng Trường Sa, čar Khánh Hòa, akâo lŏ bi leh hdră êlan mđĭ kyar bruă duh mkra êa ksĭ leh anăn hdră êlan mdê hjăn kơ alŭ wăl plao ksĭ.

“Čang hmăng Bruă kƀĭn ala lŏ dơ̆ng bi leh hdră êlan mđĭ kyar bruă duh mkra êa ksĭ, đru kơ mnuih trah mă kan, duh bi liê anôk bruă nah tluôn bruă trah mă kan. Bi hŏng krĭng knông lăn Trường Sa, čang hmăng Bruă kƀĭn ala lŏ dơ̆ng uêñ mĭn, bi leh hdră êlan mdê hjăn čiăng iêo jak ai dưi mkŏ mjing anôk bruă nah tluôn, mkăp kơ bruă mđĭ kyar bruă duh mkra - ala ƀuôn mguôp hŏng bruă răng mgang klei êđăp ênang".

Hluê si klei hưn mdah mơ̆ng Dhar bruă mặt trận čar kwar gưl dlông Việt Nam, mâo leh êbeh 2.800 klei blŭ, klei akâo mơ̆ng phung bi ala, mnuih ƀuôn sang kluôm ala mơĭt kơ Klei bi kƀĭn tal dua, Bruă kƀĭn ala gưl XVI. Phung bi ala leh anăn mnuih ƀuôn sang ăt dôk hyưt kơ klei mplư ti êlan mạng, boh nik klei yua klei thâo mĭn anak mnuih čiăng mplư, čhĭ mnia mnơ̆ng soh hŏng klei bhiăn; dôk hyưt kơ klei doh ê ƀăt mnơ̆ng ƀơ̆ng, klei čhŏ djhan wăl hdĭp mda; hnơ̆ng msir mgaih hră mơar knŭk kna ti dŭm alŭ wăl adôk êmưt….Khua hlăm Phŭn bruă kđi čar, Khua Dhar bruă Mặt trận čar kwar gưl dlông Việt Nam, Bùi Thị Minh Hoài mñă:

"Akâo kơ knŭk kna, dŭm anôk bruă djŏ tuôm, dŭm alŭ wăl mđĭ ktang klei ksiêm dlăng, ktuê dlăng čiăng hmao ƀuh lehanăn msir mgaih ktang dŭm klei ngă soh kơ mnơ̆ng mgưt, êa drao mgưt, mnơ̆ng ƀơ̆ng năng mgưt, ngă soh kơ klei doh êƀăt mnơ̆ng ƀơ̆ng leh anăn dŭm klei ngă bi čhŏ djhan wăl hdĭp mda; akâo kơ bruă kƀĭn ala, knŭk kna lŏ dơ̆ng gĭt gai bi leh mđrăm mbĭt hdră êlan klei bhiăn lehanăn mđing ruh mgaih dŭm klei dleh dlan, gun kpăk hlăm bruă lăn ala, klei čiu hnô, đru lŏ mkŏ mjing anôk dôk mrâo, mkŏ wĭt klei hdĭp mrâo kơ mnuih ƀuôn sang tơdah hluê ngă bruă hrui mă lăn.

Dŭm klei akâo mơ̆ng Lăn Dap Kngư truh kơ djăp krĭng kwar ala čar bi êdah klei čang hmăng djŏ klă mơ̆ng mnuih ƀuôn sang, mbĭt anăn ba mdah klei čiăng kơ Bruă kƀĭn ala lŏ dơ̆ng mđing hmư̆, ktuê dlăng leh anăn mtrŭt mđĭ bruă msir mgaih tŭ dưn dŭm boh klei mơ̆ng boh sĭt, mkăp djŏ hŏng klei đăo knang leh anăn klei čang hmăng mơ̆ng Mnuih ƀuôn sang.