Blŭ hrăm gĭt gai, Khua bruă kƀĭn ala mñă klă, sa klei bhiăn jăk brei "kjăp mơ̆ng hdră êlan, kjăp hlăm hdră ngă bruă, bi sa hnơ̆ng hlăm hdră êlan, klă mngač hlăm bruă hluê ngă". Anei ăt jing klei čiăng mâo čiăng kơ bruă čih mkra klei bhiăn ƀrư̆ hruê ƀrư̆ bi mguôp hŏng boh sĭt klei hdĭp, hŏng dŭm bruă mnuih ƀuôn sang leh anăn anôk bruă duh mkra dôk mđing.

Hluê si Khua bruă kƀĭn ala Trần Thanh Mẫn, hdră mkŏ mjing klei bhiăn tal êlâo hĭn brei mphŭn mơ̆ng hnơ̆ng tŭ jăk hdră êlan, amâo djŏ knŏng ênoh mta mtrŭn. Grăp hdră bhiăn brei bi klă ya bruă dôk mghaih msir mơ̆ng boh sĭt, ya ngă čiăng mkra mlih hdră bhiăn, hdră êlan mrâo mkŏ mjing ya klei tŭ dưn, si ngă klei hmăi kơ hlei pô, ênoh bi liê hluê ngă si ngă, mơ̆ng anôk mâo ai dưi hluê ngă leh anăn ya anôk bruă đua klam.

          Boh nik, phung bi ala brei mđing bi trông kơ dŭm hdră êlan adôk mâo klei blŭ mdê mdê, dŭm boh klei hmăi klă anăp kơ mnuih ƀuôn sang, anôk bruă duh mkra; dŭm hdră êlan mrâo ka mâo klei bi hmô amâodah ka dưi ksiêm dlăng djăp ênŭm. Khua bruă kƀĭn ala Trần Thanh Mẫn mtă kơ bruă čih mkra hdră bhiăn brei bi êdah klei mĭn mrâo, hlăm anăn hdră bhiăn mđing kơ dŭm boh klei hlăm klei dưi mơ̆ng Bruă kƀĭn ala, mâo klei bhiăn leh anăn kjăp. Klei mĭn dưi mñă klă jing hdră bhiăn dưi ƀiă hĭn ƀiădah amâo dưi êdu kƀah kơ hdră êlan; klei čuăn ƀiă hĭn ƀiădah bruă klam brei klă.

“Dŭm boh klei djŏ tuôm hŏng klei dưi anak mnuih, klei dưi mnuih ƀuôn sang, klei găl bruă duh mkra mnia mblei, mkăp brei ngăn prăk, mkŏ mjing klei dưi leh anăn bruă klam mơ̆ng anôk bruă knŭk kna brei dưi čoh čuăn klă klơ̆ng mtam hlăm hdră bhiăn. Mklăk hŏng anăn, amâo mâo jăk ôh ba hlăm hdră bhiăn lu đei hdră ngă bruă amâo dah dŭm boh klei kreh bi mlih nanao. Ai tiê hdră bhiăn ƀiă hĭn ƀiădah amâo mâo êdu kƀah ôh kơ hdră êlan; čoh čuăn ƀiă hĭn ƀiădah bruă klam brei klă mngač; hơĭt kjăp hĭn ƀiădah ăt brei djăp klei găl dưi mdrơ̆ng hŏng boh sĭt. Hdră bhiăn brei tui tiŏ klei hdĭp, ƀiădah tui tiŏ amâo djŏ hŏng klei hdĭp ôh hŏng hdră mkra mlih nanao hdră bhiăn".

Hŏng mnuih ƀuôn sang, hnơ̆ng tŭ jăk mơ̆ng sa hdră bhiăn amâo djŏ knŏng bi êdah hlăm dŭm mta phŭn mâo Anôk bruă kƀĭn ala bi mklă, ƀiădah yuôm bhăn hĭn jing leh mŭt hlăm klei hdĭp, hdră bhiăn klă sĭt dưi mgaih msir boh klei amâodah hơăi, klei dưi leh anăn boh tŭ dưn djŏ hdră bhiăn mơ̆ng mnuih ƀuôn sang dưi rơ̆ng jăk hĭn amâodah hơăi. Khua Anôk bruă kƀĭn ala Trần Thanh Mẫn mtă brei ksiêm dlăng kjăp grăp knhuang hluê ngă hdră bhiăn; rơ̆ng djŏ guôp hŏng gru hmô bruă sang čư̆ êa alŭ wăl dua gưl leh anăn mtă brei lŏ mtrŭt mđĭ hdră mbha gưl, mbha klei dưi. Mbha gưl amâo djŏ knŏng jing ba jao klei dưi ƀiădah brei nao mbĭt hŏng ai dưi, klei hâo hưn leh anăn bruă klam.

Bruă kƀĭn ala ngă hdră bhiăn čiăng mgaih msir boh klei mơ̆ng boh sĭt, răng mgang klei dưi lehanăn klei tŭ dưn djŏ hdră bhiăn mơ̆ng mnuih ƀuôn sang, ruh mtlaih klei gun kpăk, bi hluh ai dưi, pŏk êlan kơ klei đĭ kyar. Ênoh čuăn knhal tuič amâo djŏ jing dưi bi mklă dŭm hdră bhiăn, ƀiădah leh hdră bhiăn ba yua, anôk bruă mâo ngă bruă jăk mơ̆ amâo dah hơăi, mnuih ƀuôn sang lehanăn anôk bruă duh mkra mâo klei găl hĭn mơ̆ amâo dah hơăi, ai dưi yang ƀuôn mâo klei mtlaih êngiê mơ̆ amâo dah hơăi, ai dưi kriê dlăng ala čar mâo klei mđĭ hĭn amâo dah hơăi. Sa hdră bhiăn jăk brei "kjăp mơ̆ng hdră êlan, kjăp hlăm hdră ngă bruă, sa hnơ̆ng hlăm hdră bhiăn, klă mngač hlăm bruă hluê ngă".

Khua bruă kƀĭn ala čang hmăng grăp klei blŭ mơ̆ng phung bi ala ti anôk bi kƀĭn amâo djŏ knŏng mdei ti klei čih, ƀiădah brei kbiă hriê mơ̆ng klei ksiêm duah hră mơar, bi mklă boh sĭt leh anăn mdưm hlăm kluôm hdră bhiăn. Dŭm hdră bhiăn ka rơ̆ng kơ hdră êlan, klei tĭng dlăng klei hmăi, klei bi mguôp hŏng dŭm hdră bhiăn mkăn amâodah klei găl hluê ngă snăn brei lŏ dơ̆ng bi leh. Hŏng mnuih ƀuôn sang, anei yơh jing hnơ̆ng mkă yuôm bhăn mơ̆ng bruă čih mkra hdră bhiăn. Sa hdră bhiăn knŏng klă sĭt mâo boh tŭ dưn tơdah đru kơ anôk bruă ngă bruă tŭ dưn hĭn, mnuih ƀuôn sang leh anăn anôk bruă duh mkra găl ênưih hĭn, ai dưi yang ƀuôn dưi mtlaih leh anăn ai dưi kriê dlăng ala čar dưi mđĭ.