Kơ dŭm mta boh phŭn hlăm bruă mlan 2, Khua bruă kƀĭn ala mtă leh kơ dŭm anôk bruă mprăp bi jăk kơ klei bi kƀĭn mơ̆ng Dhar bruă gĭt gai bruă kƀĭn ala (Tĭng srăng mkŏ mjing hlăm 4 hrue), lehanăn tui tiŏ hlăm hdră ngă bruă mơ̆ng kluôm Đảng bruă kƀĭn ala, djŏ hŏng klei bi kƀĭn prŏng Đảng kluôm ala 13. Sa mta bruă yuôm bhăn mkăn anăn jing Klei bi kƀĭn kluôm ala ksiêm wĭt bruă Êpul Gơ̆ng bruă ƀuôn sang dŭm čar, ƀuôn prŏng hlăm gưl dlông (Năng ai srăng bi kƀĭn ti Quảng Ninh).  

Kơ jih jang bruă hlăm 3 mlan akŏ thŭn lehanăn kơ jih thŭn. Khua bruă kƀĭn ala Vương Đình Huệ mtă leh kơ dhar bruă hdră bhiăn kiă kriê bruă mkŏ mjing klei bhiăn, hdră bhiăn mtrŭn thŭn 2024, lŏ mlih mkra hdră mkŏ mjing klei bhiăn, hdră bhiăn mtrŭn thŭn 2023, jih jang dŭm anôk bruă čŏng bi mguôp hŏng djăp anôk bruă djŏ tuôm, čiăng kơ jih jang bruă ngă dưi ba mdah hŏng dhar bruă gĭt gai bruă kƀĭn ala, kơ bruă kƀĭn ala tui si klei dưi.

Bi kơ klei čih mkra hdră bhiăn lăn ala lŏ mlih mrâo, Khua bruă kƀĭn ala mtă leh kơ dŭm anôk bruă bi tui ksiêm bi djŏ hŏng hdră mtrŭn mơ̆ng dhar bruă gĭt gai bruă kƀĭn ala, mă klei blŭ phung ƀuôn sang, hŏng mta kñăm čiăng bi mâo klei ngă bruă jih hnơ̆ng, dưi bi leh, lehanăn ba mdah hŏng dhar bruă gĭt gai bruă kƀĭn ala ti mlan 3.

Djŏ tuôm hŏng klei kăp ksiêm, Khua bruă kƀĭn ala Vương Đình Huệ pŏk êlan:

“Ngă jih jang bruă ksiêm hlăm thŭn anei, 4 mta bruă kăp ksiêm jing bruă phŭn anăn jing: Bruă êa pui êwa čuh, bruă hdruôm hră mtô bi hriăm; 3 mta hdră ala čar kñăm, kơ dŭm bruă mdrao mgŭn, jih jang bruă anei jing dleh sơăi, lehanăn hlăk hlê jing bruă mjêč ktrŏ. Lŏ mđĭ hĭn bruă kăp ksiêm kơ jih jang klei duh mkra kluôm, hŏng jih jang klei kơ ngăn prăk, klei kơ chứng khoán, klei kơ bruă sang lăn, klei kơ trái phiếu bruă duh mkra. Êpul gơ̆ng bruă djuê ana, dŭm anôk bruă hlăm bruă kƀĭn ala bi ruah jih jang bruă ngă hŏng klei klă mngač kñăm mđing mghaih msir. Jih jang bruă anei, tơdah dôk guôn bruă kƀĭn ala hrŏng ruah, snăn srăng êmưt, kyuanăn tơdah dưi jing ngă ară anei mtam. Mơ̆ng anăn, Êpul gơ̆ng bruă djuê ana, dŭm anôk bruă hlăm bruă kƀĭn ala bi ruah djăp mta bruă hŏng klei djŏ, jĕ hĭn hŏng klei hdĭp, đăm ôh leh ngă hlŏng lui kơ anăn, knŏng ba klei hing amâo mâo jăk. Bi jih jang boh klei lŏ mâo mrâo snăn drei gĭr bi mghaih msir hŏng hdră mrâo mơh”.

Tui si hdră, Dhar bruă gĭt gai bruă kƀĭn ala, Bruă kƀĭn ala srăng ngă bruă êmuh, lehanăn wĭt lač klei êmuh, kñăm păn kjăp jih jang boh klei bi djŏ hŏng klei hdĭp mda ala ƀuôn dôk găn ară anei. Khua bruă kƀĭn ala mtă, bi ruah djŏ lehanăn jăk hŏng klei klă lŏ dơ̆ng ksiêm duah čiăng bi mrâo djăp mta bruă hŏng klei djŏ hĭn:

“Ngă klei êmuh, amâo mâo djŏ jing klei bi mđăo hŏng khua phŭn bruă ôh, ƀiădah jing čiăng mđrăm mbĭt bi mngač jih jang boh klei, mă bruă klă mngač hĭn, djŏ hŏng klei hdĭp hĭn. Mă bruă hlăm klei klă, hŏng klei kpă, jih jang bruă dưi ngă hŏng klei mngač, mơ̆ng anăn tui duah hdră ruh mgaih hŏng klei jăk. Bi kơ bruă mprăp kơ klei kăp ksiêm jih jang mta bruă ngă kơ thŭn êdei, tui si kâo, drei bi ksiêm bruă hlue ngă dŭm hdră mtrŭn kơrŭ wĭt bruă duh mkra, dŭm bruă prŏng mơ̆ng ala čar, djăp mta klei mtrŭn mơ̆ng gưl dlông, hdră mtrŭn mơ̆ng bruă kƀĭn ala, leh knŭk kna mâo mtrŭn dŭm hdră êlan mă bruă, čiăng dưi ngă lehanăn ksiêm jih jang hră mơar djŏ hŏng klei bhiăn mơ̆ng Êpul gơ̆ng bruă ƀuôn sang, dŭm dhar bruă kơ klei duh bi liê hlăm wưng kơ anăp bi mâo hdră kăp ksiêm kjăp, pioh ngă bruă hŏng klei pral amâo mâo klei ktrŏ ôh”.

Thŭn anei, bruă kƀĭn ala srăng ngă klei mplĕ hră amâo mâo đăo knang hŏng phung khua păn bruă mâo anôk bruă kƀĭn ala ruah, kyuanăn khua bruă kƀĭn ala mñă, klei mprăp čiăng kơ phung bi ala păn djă bi djŏ bruă klam jing klei yuôm bhăn snăk mâo Êpul Gơ̆ng bruă djuê ana, dŭm anôk bruă djŏ tuôm, dŭm êpul hlăm khua kiă kriê bruă kƀĭn ala. Mâo khua bruă kƀĭn ala ăt mtă brei ngă bi jăk lehanăn pral jih jang bruă bi tĭng tla, mkă tĭng ngăn prăk knŭk kna, bruă ngă hŏng ala tač êngao, lehanăn dŭm kơ mta bruă khua bruă kƀĭn ala, k’iăng khua bruă kƀĭn ala nao ngă bruă kơ ala tač êngao, lehanăn dŭm klei bi kƀĭn phung khua kƀĭn ala mda asei mâo ala čar drei mkŏ mjing./.