Mă klei blŭ kơ hdră bhiăn mlih mrâo, thiăm mbŏ kơ đa đa mta mơ̆ng hdră bhiăn đru kơ klei bhiăn, dưi pŏk mlar phung dưi dưn klei đru, mâo leh phung bi ala mâo klei blŭ. Tui si phung bi ala, klei čoh čuăn anei amâo mâo djŏ knŏng jing jăk lehanăn mtăp mđơr, ƀiădah lŏ mâo klei đĭ kyar hlăm klei hdĭp mda ala ƀuôn. Sa ai hŏng klei thiăm mbŏ mâo klei dưi đru kơ hdră bhiăn amâo mâo mă prăk ôh, ƀiădah pô bi ala Lý Anh Thư, êpul mơ̆ng An Giang lač:

 Bruă čoh čuăn dŭm klei bhiăn amâo mâo mă prăk ôh, mâo leh dŭm klei kƀah, jing klei ktrŏ hŏng ngăn prăk knŭk kna, ka dưi klam jih ôh hŏng jih janfg mnuih, ƀiădah amâo mâo dôk hlăm ênoh amâo mâo hrui prăk. Kyuanăn kâo čang hmăng anôk bruă čih mkra bi ksiêm duah lŏ thiăm mbŏ klei bhiăn bi hrŏ ênoh prăk hrui tui si klei bhiăn, ti djiêo klei amâo mâo hrui prăk dôk ngă ară anei. Pŏk mlar mnuih dưi dưn klei ting tla bi djŏ guôp. Êngao kơ dŭm mnuih mâo hnơ̆ng hrui wĭt ƀiă, dưi dưn klei amâo mâo tĭng tla, snăn ăt mâo mơh êpul mâo hnơ̆ng hrui wĭt man dưn, mnuih hiu dôk, amâodah mnuih djuê ƀiă, ăt čiăng bi mâo klei đru sa kdrêč kơ klei tĭng tla hlăm klei mtăp mđơr.

Mñă, mtă čuăn knhal tuič mơ̆ng hdr\a êlan jing klei tŭ dưn kơ klei dưi, klei tŭ dưn djŏ klei bhiăn mơ̆ng mnuih dưi đru hlăm klei bhiăn, pô bi ala Cao Thị Xuân, êpul mơ̆ng Thanh Hóa lač, brei bi mlih mơ̆ng klei tŭ dưn anei truh kơ klei tŭ dưn adih hlăm hdră mă bruă:

Mơ̆ng boh sĭt ti alŭ wăl brei ƀuh, mnuih ƀuôn sang amâo mâo djŏ knŏng čiăng kơ klei đru, ƀiădah lŏ čiăng kơ klei đru mgang klei tŭ dưn hŏng klei sĭt hĭn. Tơdah hơăi, klei đăo knang kơ klei kpă srăng hmăi amâo mâo jăk. Kyuanăn kâo čang hmăng kơ klei čih mkra hdră bhiăn brei mâo hdră êlan bi djŏ kơ hnơ̆ng tŭ hlăm bruă đru kơ hdră bhiăn. Lehanăn lŏ bi ksiêm duah kơ hdră êlan mă bruă bi êngiê, nao mđrĭng hŏng bruă klam klă mngač mơ̆ng mnuih ngă klei đru kơ hdră bhiăn, mơ̆ng anăn dưi rơ̆ng kơ hnơ̆ng tŭ, đăm lĕ hlăm klei ngă mă khă kơ leh.

Ti sa kdrêč mkăn, pô bi ala Nguyễn Thị Yến Nhi, êpul mơ̆ng Vĩnh Long akâo, êpul mkra čih mkra bi ksiêm duah, bi djŏ klei bhiăn hlăm klei mă bruă, bi mâo klei thâo bi hgŭm hlăm klei đrukơ klei bhiăn êjai ngă bruă bi kčŭt hưn:

Êjai dŭm anôk bruă hdră bhiăn mâo hdră êlan êngiê prŏng hĭn, snăn bruă čoh čuăn kơ hdră êlan mă bruă, plah wah anôk bruă anei hŏng anôk bruă adih adôk ka kjăp ôh, adôk lu klei kƀah. Êjai anăn klei čiăng bi mlih klei bhiăn brei rơ̆ng mâo klei dưi kơ anak mnuih, knư̆ hĭn brei mâo klei mđing. Kyuanăn ba mta klei anei hlăm hdră bhiăn kăp đru kơ klei bhiăn jing brei mâo hĕ hdră êlan kjăp, rơ̆ng bi mâo klei sa hnơ̆ng plah wah dŭm anôk bruă, lehanăn hơĭt nanao êjai hlue ngă klei dưi êngiê kơ anak mnuih.

 Bi hŏng klei čih mkra kơ hdră bhian gŏ sang lŏ mlih mrâo, mâo đa đa klei blŭ akâo kơ dŭm anôk bruă bi ksiêm dlăng, bi kjăp hlăm jih jang klei ngă hră mơar bi djŏ hlăm hdră bhiăn anei mâo čoh čuăn leh mơ̆ng klei mlih mrâo lehanăn hdră bhiăn kak asei thŭn  2023. Pô bi ala Tô Ái Vang, êpul mơ̆ng Cần Thơ lač:

Tui si klei bhiăn mă bruă kơ ênoh čiăng djŏ tuôm kñăm bi ênŭm  100% msĕ sơăi hlăm klei hlue ngă, lehanăn bi sa hnơ̆ng kơ anăn mdê mdê mjing kliăng kơ klei tui duah pral thâo bĭt hlăm VNeID. Tui si klei bhiăn ngă hră mơar, hdră êlan mă bruă sa ƀăng bhă mơ̆ng anôk ngă hră mơar mơ̆ng knŭk kna hŏng  VNeID, ba yua VNeID hrô kơ klei tui duah hră mơar.

Dôk bư̆ ban kơ dŭm mta mtrŭn hlăm êlan mrô 2, mta 7, tui si klei ƀuh sĭt, Khua knơ̆ng bruă sang čư̆ êa gưl ƀuôn hgŭm čiăng bi klă djăp mta hră mơar kơ hră gŏ sang, êngao kơ hră hưn hrue kkiêng, hră hưn klei djiê mnuih, hră bi klă klei bi dôk ung mô̆, pô bi ala Nguyễn Trường Giang, êpul mơ̆ng Lâm Đồng akâo lŏ bi tĭng mkă klei čoh čuăn:

Sa čô mnuih djiê, bi mâo hră hưn klei djiê pioh ngă klei bhiăn dơr djiê. Ară anei amâo mâo brei ôh khua knơ̆ng bruă sang čư̆ êa ƀuôn hgŭm jao klei dưi, ƀiădah ñu yơh nao kơ Hà Nội bi kƀĭn anôk bruă kƀĭn ala luič jih mlan, snăn amâo mâo thâo ôh mnuih ƀuôn sang si srăng ngă? hră hưn hrue kkiêng dah lač dưi dôk guôn. hră bi klă klei bi dôk ung mô̆ arăng gơ̆ čiăng hlŏng mâo mtam, pioh lŏ ngă bruă mkăn. Kyuanăn kâo čang hmăng brei mâo hdră êlan mă bruă bi djŏ hĭn đru brei kơ mnuih ƀuôn sang.