Nao hgŭm leh anăn gĭt gai mmông bi tuôm hŏng dŭm gưl phung bi ala Bruă Kƀĭn Ala. Khua gĭt gai Đảng Tô Lâm mnă klă, 80 thŭn lŏ ksiêm wĭt êlan đĭ kyar mơ̆ng Bruă Kƀĭn Ala Việt Nam jing sa hdră bruă kjăp, mbruă leh anăn amâo mâo mdei klei mlih mrâo. Mơ̆ng klei ruah khua kluôm hƀuê ênuk hruê 06-01-1946, klei ruah khua êngiê tal êlâo hlăm hƀuê ênuk lăn čar, Bruă Kƀĭn Ala bi klă dŭm boh klei yuôm hĭn mơ̆ng lăn čar, bi klă hdră bhiăn phŭn, mkŏ mjing tur knơ̆ng kơ sa lăn čar êngiê, bi klă hdră êlan prŏng, ktuê dlăng gưl dlông klei ngă bruă knŭk kna, mbĭt anăn bi klă bruă hŏng tač êngao Bruă Kƀĭn Ala, đru mđĭ kơhưm lăn čar hlăm tar rŏng lăn. Drei bi mni Bruă Kƀĭn Ala amâodjŏ knŏng sa anôk bruă klei dưi hĭn, ƀiădah lŏ jing sang mbĭt mơ̆ng phung bi ala kơ mnuih ƀuôn sang – tuôm klam ngă bruă ktrŏ ƀiădah yuôm bhăn, mđing hmư̆ mnuih ƀuôn sang, blŭ klei mnuih ƀuôn sang, răng mgang boh tŭ kơ mnuih ƀuôn sang”.

Klei hưn truh kơ êbeh 2.200 čô bi ala nao hlăm klei kƀĭn kơ đa đa boh tŭ dưn ăt msĕ mơh đa da hdră êlan mđĭ kyar lăn čar hlăm wưng kơ anăp, boh nik jing gĭr ngă tŭ jing Hdră mtrŭn klei kƀĭn kluôm Bruă Đảng kluôm ala tal 13 leh anăn mprăp jăk kơ klei kƀĭn kluôm phung bi ala kluôm ala tal 14 mơ̆ng Đảng, rơ̆ng dưi ngă tŭ jing dua mta kñăm 100 thŭn mâo Đảng ba mdah leh. Khua gĭt gai Đảng Tô Lâm lač klă kơ 3 hdră tă klă klơ̆ng anăn jing rơ̆ng kơ klei dưi kiă kriê, kluôm dhuôm lăn čar, răng mgang klei êđăp ênang hơĭt kjăp, mđĭ kyar lăn čar pral leh anăn hơĭt kjăp leh anăn amâo mâo mdei mđĭ hnơ̆ng, bi mâo djăp klei čiăng ƀrư̆ hruê ƀrư̆ lu hlăm klei hdĭp mnuih ƀuôn sang. Anei ăt jing mta kñăm hĭn mơ̆ng Đảng, mơ̆ng Yang ƀuôn ngă phŭn. Bi kơ klei mkŏ dăp phung mă bruă kđi čar, mkŏ mjing wăl bruă knŭk kna mơ̆ng lăn čar čiăng đĭ kyar, Khua gĭt gai Đảng Tô Lâm brei thâo:

 “Phung mă bruă mơ̆ng dŭm êpul bruă, anôk bruă hlăm bruă kđi čar 3 gưl, boh nik gưl ƀuôn hgŭm ngă bruă hrăm mbĭt, hluh hlir, bi djăp ênŭm klei čiăng mơ̆ng mnuih ƀuôn sang, đru kơ mnuih ƀuôn sang jăk hĭn, găl hĭn. Klei mjĕ giăm plah wah gưl dlông, gưl čar leh anăn gưl ƀuôn hgŭm dôk ƀrư̆ ƀrư̆ bi kluôm hlăm jar bruă knŭk kna mrâo. Bruă mkŏ mjing, mkŏ wĭt êpul mă bruă đru kơ bruă kiă kriê yang ƀuôn, klă sĭt hĭn, mnuih ƀuôn sang dưi mâo klei đru pral hĭn, jăk hĭn”.

Hlăm mmông bi tuôm, Khua bruă kƀĭn ala Trần Thanh Mẫn lač jăk kơ bruă Đảng gưl dlông, Phun bruă kđi čar, êpul khua bruă Đảng dŭm gưl, lač jăk kyua klei bi mguôp, đăo knang, hrăm mbĭt, sa ai, ngă bruă tŭ dưn mơ̆ng knŭk kna, dŭm anôk bruă hdră bhiăn, mặt trận čar kwar, dŭm phŭn, dhar bruă, alŭ wăl leh anăn mnuih ƀuôn sang hlăm lăn čar, bi êdah klei mpŭ leh anăn dŭm klei duh myơr yuôm bhăn mơ̆ng phung bi ala Bruă Kƀĭn Ala hlăm dŭm gưl, Khua bruă kƀĭn ala Trần Thanh Mẫn hmăng hmưi, phung bi ala Bruă Kƀĭn Ala djă pioh nanao klei blŭ hrăm kjăp, bi mguôp kjăp hŏng Đảng, knŭk kna leh anăn mnuih ƀuôn sang.

 “ Lŏ dơ̆ng duh myơr kơ Bruă Kƀĭn Ala, kơ bruă cách mạng hing ang mơ̆ng Đảng, mơ̆ng djuê ana drei, msĕ si Khua gĭt gai Đảng Tô Lâm tuôm lač “Ksiêm wĭt čiăng nao kơ anăp – bi hdơr čiăng kđăm leh anăn lŏ dơ̆ng čhuang êbat.” Mŭt hlăm wưng mrâo, lăn čar drei dôk ti anăp dŭm klei găl ƀiădah ăt mâo lu klei dleh dlan, klei lông dlăng. Bruă Kƀĭn Ala srăng lŏ dơ̆ng ngă dŭm hdră êlan mơ̆ng Đảng, Mđing hmư̆ klei blŭ phung bi ala, mnuih ƀuôn sang leh anăn knơ̆ng bruă, hrăm mbĭt hŏng knŭk kna, bi mguôp kjăp hŏng dŭm anôk bruă djŏ tuôm, ngă tŭ dưn bruă mkŏ mjing hdră bhiăn, ktuê dlăng gưl dlông, bi klă dŭm boh klei yuôm bhăn mơ̆ng lăn čar. Bi lar ai tiê mlih mrâo, mbruă, mnuih ƀuôn sang ngă phŭn, bi mguôp, bi klă dŭm hdră mtrŭn mơ̆ng Đảng, ba hdră mtrŭn mơ̆ng Đảng nao hlăm klei hdĭp.”

Wưng anei, Khua bruă kƀĭn ala Trần Thanh Mẫn mđup brei mêđai “Kyua Bruă Kƀĭn Ala Việt Nam” kơ Khua gĭt gai Đảng Tô Lâm, Khua lăn čar Lương Cường, Khua knŭk kna Phạm Minh Chính leh anăn phung khua gĭt gai Đảng, knŭk kna, Mặt trận čar kwar Việt Nam leh anăn khua gĭt gai Bruă Kƀĭn Ala ăt mdê̆ msĕ mơh mđup brei mêđai bi hdơr “Kyua Bruă Kƀĭn Ala Việt Nam ” kơ phung bi ala Bruă Kƀĭn Ala dŭm gưl./.