Hlue Pô bi ala Trần Văn Sáu, êpul Đồng Tháp, Hdră mtrŭn 88 lač Phŭn bruă sang hră mtô bi hriăm mkŏ mjing čih mkra sa hdruôm hră. Hdruôm hră anei dưi bi mklă mtăp mdơr hŏng dŭm hdruôm hră mkăn kyua êpul bruă, phung čih mkra. Lač klă Hdră mtrŭn 88 dưi kđăm mkra hlăm thŭn 2014, truh thŭn 2020 kơh mâo Hdră mtrŭn 122, Pô bi ala Trần Văn Sáu kčah 6 thŭn, ya ngă Phŭn bruă sang hră mtô bi hriăm amâo mkŏ mjing hlue ngă Hdră mtrŭn anei? Hlăk êjai anăn, lŏ ngă kơ bruă kđăm mkra hdruôm hră hŏng hdră bi hgŭm ala ƀuôn, mơ̆ng anăn ngă kơ bruă mâo lu hdruôm hră mtô, ênoh đĭ amâo dưi ktuê dlăng:

“Đảng iêo mthưr kriê dlăng kơ phung mniê, ƀiădah Knŭk kna krơ̆ng bruă klam gĭt gai hlăm bruă sang hră. Amâo dưi mjing ôh bruă ala ƀuôn jing klei mnia blei hdruôm hră mtô bi hriăm. Boh sĭt brei ƀuh, hlăm djăp ta bruă tơdah ala ƀuôn mtrŭn ênoh sơăi, hjăn hdruôm hră mtô bi hriăm bi lar hlăm ala ƀuôn snăn ênoh ƀrư̆ đĭ. Anei jing sa klei amâo djŏ leh anăn amâo mâo tur knơ̆ng čiăng rơ̆ng hdruôm hră mtô bi hriăm lŏ dơ̆ng amâo đĭ.”

Khua phŭn bruă sang hră mtô bi hriăm Nguyễn Kim Sơn mblang:

“Phung bi ala mđing kơ hdră mtrŭn mơ̆ng Êpul ktuê dlăng jing jao kơ Phŭn bruă sang hră mprăp hưn hŏng Bruă kƀĭn ala hdră msir djŏ tuôm kơ bruă čih mkra hdruôm hră mtô bi hriăm. Hmei bi mĭn mơ̆ng ară anei truh thŭn 2024 bruă yuôm bhăn hĭn brei mđing tal êlâo jing bi mklă hnơ̆ng jăk mơ̆ng hdruôm hră mtô adŭ 5, 9,12 bi jăk, rơ̆ng djăp hdruôm hră mtô êlâo kơ thŭn hriăm mrâo, bi bruă dưi jao snăn hmei srăng ksiêm hriăm hlăm 2 thŭn kơ anăp, tơdah hdră mlih mrâo hdruôm hră dưi bi leh snăn srăng mâo klei ksiêm dlăng êlan leh anăn kčah hdră msir hŏng Bruă kƀĭn ala êdei”

Anôk bi kƀĭn bruă kƀĭn ala ăt kdrăm kơah hŏng klei bi trông djŏ tuôm kơ bruă mdrao mgŭn. Phung bi ala lač, hlăm wưng êgao, ăt adôk mâo klei êmưt mkăp êa drao. Bruă bi lông blei êa drao dưi mkra mđĭ leh ƀiădah bruă blei kdrăp mnơ̆ng mdrao mgŭn jhat rai bŏ hŏng dleh dlan. Klei dleh dlan hĭn ară anei jing amâo dưi blei ôh mnơ̆ng jăk leh anăn mđĭ kyar hdră mrâo. Boh klei mnuih ƀuôn sang mâo klei ruă brŭ đĭ… Pô bi ala Nguyễn Tri Thức, Êpul bi ala ƀuôn prŏng Hồ Chí Minh mâo klei blŭ:

“Kâo akâo kơ Bruă kƀĭn ala, Knŭk kna mđing dlăng mprăp 2 anôk bruă xạ trị proton ti Hà Nội leh anăn ƀuôn prŏng Hồ Chí Minh čiăng kơ mnuih ƀuôn sang Việt Nam dưi ba yua leh anăn dưi dưn hdră mnêč mrâo mrang hĭn dlông rŏng lăn. Drei mâo sa klei găl, phung aê mdrao dôk mă bruă xạ trị ti Hà Nội leh anăn ƀuôn prŏng Hồ Chí Minh dưi ba yua hdră mnêč anei leh 6 mlan dưi mtô bi hriăm ti ala tač êngao”.

Blŭ hrăm hlak mblang, Khua phŭn bruă mdrao mgŭn Đào Hồng Lan brei thâo: mta phŭn kyua mkăp mta hoạt chất hin dlông rŏng lăn, ênoh đĭ hlăm kluôm rŏng lăn… Phŭn bruă dôk gĭr mâo hdră msir klei kƀah kơ êa drao, kdrăp mnơ̆ng mdrao mgŭn lu anôk bruă mdrao mgŭn. Mâo dŭm klei bhiăn kơ hdră êlan hŏng klei gun kpăk hlăm hdră pŏk ngă. Kơ hdră msir hlăm wưng kơ anăp, Khua phŭn bruă Đào Hồng Lan brei thâo, srăng bi hgŭm hŏng dŭm alŭ wăl, dŭm anôk bruă mdrao mgŭn čiăng ktuê dlăng klei gun kpăk djŏ tuôm kơ bruă rơ̆ng êa drao, kdrăp mnơ̆ng msir mgaih hlue si klei dưi./.