Hŏng ênhă 70m² mâo dua boh adŭ pĭt, sa boh adŭ čhưn, mâo sang pui lehanăn sang tlô mnei, sang mrâo kjăp siam đru leh kơ gŏ sang Nay Hdoănh, ti ƀuôn Mơ Nai Trang, xã Ia Piar, kdriêk Phú Thiện hơĭt leh anôk dôk. Hrue nâo dôk kơ sang mrâo ñu mgei ai tiê lač: Êlâo dih gŏ sang kâo hdĭp hlăm sang tĭ rưč, hjan hluh brôč, mđiă hlơr bruă knuă, duh mĭn kơ anak aneh hriăm hră mơar. Klei mơak anei mơ̆ng gŏ sang Nay Hdoănh ăt jing klei mơak mơ̆ng 355 gŏ sang mkăn mâo đru leh hlăm klei mdơ̆ng sang mrâo ti kdriêk Phú Thiện.

“Mâo Đảng, Knŭk kna mđing, đru rŭ mdơ̆ng brei sang sơnei, kâo mơak snăk. Amâo mâo mĭn ôh pô dưi mâo hĕ sa boh sang jăk snei. Lač jăk kơ klei bi đru anei brei kơ kâo mâo leh klei hdĭp jăk hĭn”.

Mbĭt hŏng kdriêk Phú Thiện, kdriêk Chư Prông – mâo êbeh 1.000 boh sang tĭ rưč, sang hluh ƀrôč năng lăm lui hĕ – ăt dôk jing klei gĭr čiăng bi leh djŏ hŏng wưng kčah. Bi mklă anei anei jing bruă čuăn phŭn, jing yuôm bhăn hlăm klei thâo bi đru, Êpul bruă  kiă kriê klei bi đru lăm lui sang ti rưč mơ̆ng kdriêk jao leh bruă kơ grăp čô ngă bi leh bruă kăp ksiêm lehanăn mtrŭt mjhar. Đinh Văn Dũng – Khua bruă Đảng kdriêk Chư Prông, ăt jing khua êpul kiă kriê brei thâo, kdriêk iêo jak leh jih jang klei dưi, ruh mgaih jih klei dleh dlan, ngă bi tŭ jing jih jang bruă bruă. Mbĭt hŏng anăn, kdriêk lŏ bi mguôp prăk dŭm anôk bruă mâo leh truh 54 êklai prăk pioh mă bruă. Dŭm boh să mâo leh dŭm klei mtrŭt mjhar, mđĭ ai mnuih ƀuôn sang, iêo jak ai tiê mă bruă mơ̆ng găp djuê, mnuih riêng gah, mguôp mbĭt hŏng lĭng kahan dôk hlăm alŭ wăl đru bi rŭ mdơ̆ng. Truh kơ ară anei, ênoh boh sang mâo mdơ̆ng dưi bi leh êgao kơ 70%. Bruă Đảng kdriêk hlăk ktuh êyuh jih ai tiê, ktưn čiăng bi leh 997 boh sang êlâo kơ hrue 30/6/2025, bi mâo ênŭm 100% gŏ sang ƀun mâo sang dôk kjăp.

Kah knar hlăm grăp hruê mđing mtrŭt mjhar mâo mkra mơ̆ng 8 - 10 boh sang. Grăp mlan, grăp gưl êpul kiă kriê kdriêk lŏ ksiêm wĭt bruă knuă, lŏ dơ̆ng mtrŭt, lehanăn iêo jak mđrăm mbĭt hŏng dŭm gưl, đru lŏ bi mguôp hrue ai mă bruă.  Ară anei kluôm kdriêk mâo leh 75% hrue ai mă bruă mơ̆ng găp djuê bi đru, dŭm anôk hmei jao kơ bruă mặt trận, dŭm êpul êya lehanăn lĭng kahan lŏ bi đru hrue ai. Mbĭt hŏng anăn, lŏ hyuă kjăp hĭn bruă kăp ksiêm, kiă kriê kjăp rơ̆ng kơ bruă mkra mjing mâo ngă hŏng klei kjăp”.

Ară anei, čar Gia Lai mâo bi leh 93% hdră lam lui sang tĭ brôč. Hlăm ênoh jih jang 17 boh kdriêk, wăl krah, ƀuôn prŏng snăn mâo leh 10 alŭ wăl bi leh ênoh čuăn, dŭm alŭ wăl adôk djăp mơ̆ng 70% - 90% hdră kčah. Boh tŭ dưn anei brei ƀuh klei kiă kriê pral, djŏ mơ̆ng dŭm gưl bruă Đảng, klei sa ai mđrăm mbĭt mơ̆ng jih bruă kđi čar, lehanăn klei sa ai mơ̆ng mnuih ƀuôn sang.

Bruă mghaih msir lăm lui jih sang hlang mtih kđuh sang hluh ƀrôč ti Gia Lai jing leh klei bi knăl klă mngač kơ bruă kiă kriê kjăp hlăm jih bruă kđi čar, lehanăn bruă  Đảng. Mơ̆ng čar hlŏng kơ nah gŭ, hlăm klei bi mbha bruă, mbha gưl hrue mlan mă bruă, mkŏ mjing jêñ jên klei bi kƀĭn grăp mlan, ksiêm wĭt boh mơ̆ng mă bruă, mjing ai êwa bi ktưn. Dŭm êpul bruă Đảng mâo bruă klam phŭn, ba akŏ hlăm klei mtrŭt mjhar hlăm yang ƀuôn. Hŏng ai tiê “Thâo bi đru, hla hrông đŭng hruôm hla tĭ” lehanăn “hlei pô dưi đru ai tiê đru ai tiê, hlei mâo ngăn dŏ đru ngăn dŏ, klei anăn dưi bi lar leh hlăm djăp anôk. Jih jang êpul êya msĕ si kahan ksiêm čar, Binh đoàn 15, êpul kahan răng mgang knông lăn, lehanăn êpul lĭng kahan dôk hlăm alŭ wăl, mđrăm mbĭt bi đru mbĭt hŏng  bruă sang čư̆ êa, lehanăn mnuih ƀuôn sang ngă bruă anăn hŏng klei tŭ dưn. Klei anei đru leh mjing klei ktang kluôm kơ alŭ wăl mâo mdơ̆ng leh dŭm êbâo boh sang, hŏng lu ênoh čuăn jăk hĭn, msĕ si êlưih hĭn, pral hĭn, kjăp hĭn... Kơ dŭm gŏ sang ƀun giăm ƀun, gŏ sang knŭk kna dlăng ba.  Rah Lan Chung – K’iăng khua bruă Đảng čar, khua knơ̆ng bruă sang čư̆ êa čar Gia Lai brei thâo:

 “Bruă lăm lui msir sang tĭ rưč mâo ngă hŏng klei klă mngač, hnŭk êngiê, mtăp mđơr, kjăp lehanăn tŭ jing. Iêo jak jih jang ai dưi klei bi đru mơ̆ng dŭm anôk bruă, êpul êya, phung duh mkra êpul bruă lehanăn mnuih, mbĭt hŏng jih jang yang ƀuôn, hlăm lehanăn êngao čar. Mbĭt hŏng anăn, hyua kjăp hĭn klei kăp ksiêm, pral mâo klei bi mni phung mâo klei bi đru jăk.”

 Bruă hlăm lui sang hlang mtih kđuh sang hluh ƀrôč ti Gia Lai hlăk jing leh boh kdrŭt, ai ktang kơ mnuih ƀuôn sang kpưn đĭ tlaih mơ̆ng klei dleh dlan, bi hơĭt klei hdĭp mda, mđrăm mbĭt bi rŭ mdơ̆ng ƀuôn sang Gia Lai knư̆ hrue knư̆ đĭ kyar, mdrŏng sah, kreh dhar. Hlăm anăn, dŭm êpul bruă Đảng mâo ngă leh jăk bruă klam jing hla čhiăm gru ba akŏ ktrâo atăt, mkŏ mjing klei bi ktưn lar bar, hŏng ai tiê thâo bi mguôp jih jang djuê ana, anăp truh kơ mta kñăm mđĭ kyar kjăp ti alŭ wăl./.