Hnêč hlăm wưng yan bhang, mnuih ƀuôn sang alŭ Kim Môn, să Čư̆ A Thai, čar Gia Lai trŭn kơ bruă rŭ mjing êlan mlir alŭ, pŏk phai truh 8 met. Čiăng kơ êlan dưi leh pral, lu gŏ sang čŏng pô ruh mnư̆ gang, myơr lăn. Gŏ sang Phạm Văn Hùng jing sa hlăm dŭm gŏ sang nao êlâo, ruh mjưh mnư̆ sang pô, myơr êbeh 74m2 lăn. Hlăm sang siă êlan dôk pŏk, Phạm Văn Hùng  bi êdah klei hơ̆k mơak êjai ƀuh ƀuôn sang bi mlih mrâo:   

“Gŏ sang myơr lăn mơ̆ng kdriêl êlan hđăp mŭt hlăm tač sang jing 3m, hmei sa ai hŏng Knŭk kna mkra êlan čiăng bi doh ƀuôn sang, êlan klông găl kơ grăp bruă, mdiăng boh mnga ăt găl mơ̆ kơ mnuih ƀuôn sang. Mnuih ƀuôn sang krĭng anei sa ai čiăng myơr lăn mbĭt hŏng Knŭk kna mkra êlan”.

Êlâo dih, hlăm yan hrui pĕ, êdeh prŏng amâomâo dưi mŭt truh anôk hrui blei boh mnga, kyua êlan điêt, lu kdrêč jhat rai. Čiăng ngă bruă pŏk phai dŭm bĭt êlan krĭng ƀuôn sang, mbĭt hŏng êpul knuă druh gưl să, mơ̆ng mnuih ƀuôn sang pô ăt hâo hưn, mtrŭt mjhar hdơ̆ng pô nao hgŭm. Dương Văn Phon, ti alŭ Hải yên brei thâo, hŏng mnuih ƀuôn sang krĭng anei, myơr sa kdrêč lăn čiăng mâo êlan prŏng kơ hruê anei leh anăn êdei anăp jing klei năng êdi.

“Phung knuă druh kreh nao mđĭ ai, mnuih ƀuôn sang hmei ăt mđĭ ai hdơ̆ng pô, mnuih ƀuôn sang kyua grăp čô, grăp čô ăt kyua pô kyuanăn jing jang bi gĭr. Klă sĭt pô luč lăn điêt, ƀiădah boh tŭ dưn jing êlan Knŭk kna mkra brei kơ pô prŏng leh anăn pô êrô nanao, amâo djŏ knŏng ênuk pô, anak čô pô ăt dưi mâo êlan prŏng, sơnăn kơh mnuih ƀuôn sang dưi đĭ kyar”.

Trần Văn Nguyên, Khua alŭ Hải Yến, să Čư̆ A Thai brei thâo, klei năng mđing jing 79 gŏ sang mơ̆ng 2 alŭ ktuê êlan mâo klei sa ai myơr lăn mkra êlan, brei ƀuh klei sa ai hŏng hdră êlan mơ̆ng Knŭk kna.

 “Mnuih ƀuôn sang hơ̆k mơak kyua êlan anei jhat rai. Êjai hâo hưn mnuih ƀuôn sang ăt sa ai myơr lăn, ruh hĕ mnư̆ mnang êlâo dih. Mâo klei găl mâo Đảng, Knŭk kna uêñ mĭn mkra êlan anei mnuih ƀuôn sang hơ̆k mơak êdi”.

Să Chư A Thai jing krĭng pla mjing mdiê ti nah Yŭ čar Gia Lai. Bi klă êlan klông jing boh kdrŭt mđĭ kyar, alŭ wăl duh bi liê 18 bĭt êlan mlir alŭ hŏng ênoh prăk êbeh 17,4 êklai prăk. Hlăm anăn, mnuih ƀuôn sang čŏng myơr giăm 5000 m2 lăn mkra êlan, đru mguôp êbeh 1,1 êklai prăk.

Phạm Văn Lượng,  k’iăng khua bruă Đảng, khua Bruă sang čư̆ êa să Čư̆ A Thai brei thâo, să dôk mkra tiăm 7 bĭt êlan mrâo leh anăn mâo klei sa ai mơ̆ng mnuih ƀuôn sang.

“Mkra dŭm bĭt êlan dưi mâo klei sa ai mơ̆ng mnuih ƀuôn sang ti alŭ wăl dŭm alŭ, đru kơ Bruă sang čư̆ êa ngă pral dŭm hdră. Hlăm klei ngă bruă hmei mkŏ mjing dŭm êpul mtrŭt mjhar hâo hưn ruh mgaih anôk ala leh anăn mkŏ mjing klei hâo hưn, wăt bruă kđi čar mơ̆ng dŭm alŭ nao hgŭm ngă klei hâo hưn kơ mnuih ƀuôn sang sa ai myơr lăn mkra êlan”.

Dŭm bĭt êlan dưi pŏk phai ti Chư A Thai, čar Gia Lai amâodjŏ knŏng brei klei găl êrô êbat, mkra mjing, ƀiădah lŏ jing klei bi klă kơ ai tiê bi mguôp, sa ai mơ̆ng mnuih ƀuôn sang hlăm bruă mkŏ mkra krĭng ƀuôn sang mrâo.