Hlue ngă hdră mtrŭn mrô 45/QĐ-TTg wưng thŭn 2019 -2021, 19 anôk bruă klei mrâo đru bi ksiêm mta čuăn, lehanăn tă êlan kơ klei hâo hưn, bơ̆n bâo jêñ jêñ, bi mlih hdră mă bruă, mđĭ hĭn ênoh klei čih, klei hâo hưn, mâo wăt rup lač kơ klei jing hlăm klei hdĭp mnuih djuê ƀiă, krĭng čư̆ čhiăng, krĭng dleh dlan, hŏng klei čih mkra jăk siam, klă mngač djŏ hŏng klei bhiăn hdĭp lehanăn ai tiê dhar kreh phung ƀuôn sang... Mbĭt hŏng dŭm bruă ngă ka kjăp kơ klei hâo hưn, ăt adôk tuôm hŏng klei dleh dlan msĕ si: Phung dưi dưn klei đru jing knŏng phung hdĭp hlăm krĭng taih kbưi, êlan klông adôk dleh dlan, snăn klei čiăng mâo dlăng hră klei mrâo, jing bŏ hŏng klei êmưt, boh nik tơdah tuôm hŏng klei hlĭm hjan êa lip lêč. Jih jang klei čih mkra bi tui hlue si krĭng čiăng hâo hưn... Bi djŏ guôp hŏng jih jang hnơ̆ng thâo săng mơ̆ng phung ƀuôn sang. Bruă hgŭm hlăm klei mă bruă mơ̆ng dŭm anôk bruă gưl dlông, lehanăn alŭ wăl ăt adôk ka kjăp. Mâo đa đa alŭ wăl, boh nik ti dŭm să, ƀuôn ka kiă kriê kjăp ôh jih jang hră mơar; bruă ksiêm ka jêñ jêñ mơh...

Khua phŭn bruă adŭ bruă djuê ana Hầu A Lềnh lač, klei čiăng duh bi liê kơ krĭng mnuih djuê ƀiă, lehanăn krĭng čư̆ čhiăng adôk prŏng, ƀiădah klei mă bruă adôk gun kpăk, dleh kƀah ngăn prăk. Hŏng hdră êlan lông bi hmô mkăp radio kơ krĭng mnuih djuê ƀiă, krĭng čư̆ čhiăng, krĭng dleh dlan, knông lăn, Hầu A Lềnh lač:

Bruă anei mâo leh khua knŭk kna bi mklă hlăk thŭn 2017, truh thŭn 2018 khua knŭk kna bi mklă ênoh prăk bi liê, ƀiădah leh jao prăk truh mlan 8 thŭn 2019, kơh dhar bruă djuê ana mrâo bi leh bruă ngă hră mơar mkŏ mjing klei hrŏng ruah pô ngă bruă, leh ruah pô ngă bruă, snăn amâo mâo pô dưi ngă bruă ôh. Lehanăn ti wưng anăn, dhar bruă djuê ana hlăk ba mdah hŏng bruă kƀĭn ala mtrŭn hdră mđĭ kyar kluôm kơ krĭng mnuih djuê ƀiă, lehanăn krĭng čư̆ čhiăng, hlăm anăn bruă kñăm kơ kdrăp phung ƀuôn sang pioh dlăng lehanăn hmư̆ dăp hlăm hdră mrô 10, lehanăn dŭm hdră êlan mkăn ka mao ngă mơh. Thŭn 2020 - 2021, Phŭn bruă ngăn prăk amâo mâo prăk ôh hlăm klei bi liê kơ bruă anei, snăn hmei dôk guôn klei bi mklă kơ bruă jao prăk pioh ngă bruă. Truh kơ hrue anei, mâo jao leh prăk hlăm anăn truh kơ 10 mta bruă. Dhar bruă djuê ana gĭt gai mtam dŭm anôk bruă bi ksiêm lehanăn lŏ ngă bruă anei tui si klei ngăn prăk bi liê kơ thŭn 2022.

Ară anei lu alŭ wăl krĭng mnuih djuê ƀiă, krĭng čư̆ čhiăng mâo leh hră mơar gĭt gai bruă hlue ngă jih jang hdră êlan mkăp hră klei mrâo, dôk hlăm hdră êlan mđĭ kyar bruă duh mkra krĭng mnuih djuê ƀiă lehanăn krĭng čư̆ čhiăng wưng thŭn 2021 - 2030, gưl tal êlâo: Mơ̆ng thŭn 2021 - 2025. Mơ̆ng anăn, knơ̆ng bruă sang čư̆ êa dŭm boh čar mâo Dhar bruă djuê ana kiă kriê, bi mguôp hŏng dŭm knơ̆ng dhar bruă, knơ̆ng bruă sang čư̆ êa dŭm kdriêk čŏng bi ksiêm, grăp thŭn mkŏ mjing hdră kăp dlăng bruă bi lar hdruôm hră klei mrâo truh hŏng dŭm să boh ƀuôn, sang hră mơar, lehanăn dŭm êpul bruă kđi čar, hŏng mnuih mâo k’hưm krĭng mnuih djuê ƀiă hlăm čar hlue hŏng mdê bi mta hră kllei mrâo tui si klei bi mklă mrô 45 mơ̆ng khua knŭk kna. Knơ̆ng bruă hâo hưn kiă kriê, kăp dlăng bruă dŭ mdiăng, mbha jih jang hră klei mrâo bi pral, mbha bi djŏ mnuih, ênŭm ênoh, djŏ anôk. Knŏng bruă sang čư̆ êa dŭm kdriêk mâo klei hgŭm hĭn hŏng dŭm êpul êya bruă kđi čar: Mâo bruă klam kiă kriê dưn yua mjing djăp klei găl kơ phung hgŭm mâo dlăng hră, dưi dlăng rup lehanăn mđing hmư̆ lehanăn yua hră mơar anăn lŏ bi lar hlăm dŭm anôk bi kƀĭn...

Mrâo anei, dhar bruă djuê ana bi mguôp leh hŏng dŭm knơ̆ng dhar bruă gưl dlông, mbĭt hŏng dŭm knơ̆ng bruă sang čư̆ êa djăp čar, ƀuôn prŏng mkŏ mjing leh klei trông čhai kluôm ala kơ bruă čih mkra hdră mă bruă “Lŏ dơ̆ng ngă djăp hdră mkăp hră klei mrâo, lŏ bi ksiêm duah hdră êlan mlih mrâo hdră kăp klei hâo hưn djŏ guôp hŏng krĭng mnuih djuê ƀiă lehanăn krĭng čư̆ čhiăng, krĭng dleh dlan” wưng thŭn 2023 - 2025.

Ti anôk bi kƀĭn, phung bi ala lač, Hdră mtrŭn mrô 45 QĐ-TTg jing leh hdră êlan, đru ba mtruh klei bhiăn mơ̆ng Đảng, knŭk kna jing leh anôk phung ƀuôn sang pioh bi hriăm êmuh, čiăng mkŏ mjing hdră ngă bruă kơ krĭng mnuih djuê ƀiă, lehanăn bi djŏ hĭn. Hlăm wưng kơ anăp, čang hmăng kơ dŭm knơ̆ng dhar bruă, djăp alŭ wăl mâo hdră êlan mă bruă kjăp hĭn, mghaih msir djăp mta boh klei hŏng phung ƀuôn sang bi găl guôp pral tŭ mă hdră êlan jăk mơ̆ng Đảng, knŭk kna. Kăp ktue dlăng klei hlue ngă hdră êlan mă bruă kơ phung ƀuôn sang, ksiêm dlăng ya mta klei phung ƀuôn sang čiăng.

Anôk bruă djuê ana djăp alŭ wăl ăt akâo leh mơh hŏng Dhar bruă djuê ana lŏ dơ̆ng kčĕ kơ khua knŭk kna mâo dŭm hdră êlan amâo mâo hrui prăk ôh mkăp hră klei mrâo krĭng mnuih djuê ƀiă lehanăn krĭng čư̆ čhiăng wưng thŭn 2022 – 2025; lŏ mđĭ ênoh hră klei mrâo kơ dŭm êpul êya bruă kđi čar, ƀuôn alŭ sang hră knŭk kna čiêm rông hđeh mnuih djuê ƀiă, lehanăn pŏk mlar phung dưi dưn dŭm hdră êlan djuê ana djăp gưl, knuă druh klam bruă djuê ana ti gưl să mâo dlăng hră klei mrâo, hră mơar ksiêm duah truăn kơ bruă pô.

Tui si aduôn Hoàng Thị Hạnh – k’iăng khua adŭ bruă djuê ana, mâo leh klei akâo bi mlih kơ dŭm mta kñăm, hdră mkăp hră klei mrâo bi djŏ guôp hŏng klei jing mdê bi krĭng mnuih djuê ƀiă, lehanăn krĭng čư̆ čhiăng, krĭng dleh dlan hĭn.Hŏng klei mkăp djăp mta hră mơar djŏ hŏng bruă kñăm ciăng kơ klei duh mkra, mâo klei truăn hĭng hŏng phung dưi dưn hdră êlan đru, kñăm čiăng amâo mâo klei mđĭ mđăl ôh, dleh dưi ksiêm đăm lĕ hlăm klei ê’am alah, ngă luič liê ngăn prăk knŭk kna hơăi muang. Kơ hdră êlan hâo hưn: Kñăm mkŏ mjing App hla pŏk êlektronik mnuih djuê ƀiă lehanăn krĭng čư̆ čhiăng kñăm bi lar dŭm bruă yuôm bhăn mă mơ̆ng dŭm hrăklei mrâo djăp mta klei yăl dliê truh hŏng phung čiăng dlăng. Mbĭt hŏng anăn jih jang klei mrâo, klei čih hlăm dŭm hră klei mrâo dưi ba yua hŏng kdrăp mrâo mrang pioh dlăng hŏng klei yuăn lehanăn klei blŭ mnuih djuê ƀiă, thâo ƀuh djăp mta klei hâo hưn hŏng dŭm alŭ wăl dôk hlăm klei dleh dlan, kñăm dưi truh hŏng phung ƀuôn sang, anôk bruă kiă kriê đĭng blŭ thâo mĭn, computer, lehanăn hŏng djăp mta kdrăp pioh dlăng lehanăn hmư̆ mkăn:

Bruă hâo hưn hmei dôk ngă hŏng jih ai tiê hĭn, hŏng klei ênưih thâo săng hĭn, jĕ giăm hĭn, djŏ guôp hŏng klei bhiăn mnuih djuê ƀiă, čiăng kơ jih jang mnuih mâo dlăng sơăi. Lehanăn klei thâo bi kah mbha mơ̆ng dua nah anăn brei kbiă hriê mơ̆ng lam ai tiê. Klei hâo hưn hŏng asăp blŭ, hŏng rup lehanăn dŭm klei hâo hưn mkăn, jing leh hdră êlan jăk hĭn kơ bruă hâo hưn dưi bi lar pral hĭn truh hŏng krĭng mnuih djuê ƀiă, anăn yơh jing klei blŭ, sĭt yơh klei blŭ hŏng klei yuăn jing amâo mâo kƀah ôh, ƀiădah čiăng kơ klă mngač hĭn, jĕ giăm hĭn srăng ară anei bi mđing truh kơ sang mđung rup Việt Nam, Sang mđung asăp Việt Nam mâo leh dŭm anôk mđung hŏng klei blŭ mnuih djuê ƀiă, lehanăn; lŏ mâo dŭm hră klei mrâo lehanăn hdră hâo hưn mkăn mdê mdê boh nik hŏng rup, lehanăn klei blŭ...

Dưn yua klei đĭ kyar mơ̆ng hdră êlan hâo hưn ênuk mrâo ară anei, hŏng djăp mta hdră, hrue mlan kơ anăp hŏng hdră mkăp hră klei mrâo truh hŏng krĭng mnuih djuê ƀiă, krĭng čư̆ čhiăng bi nao hlăm bruă klă kjăp hĭn, kyuadah ară anei lu hră mơar truh hnui leh amâo lŏ jing mrâo ôh msĕ si tuôm găn hlăm mnĭ anei kơ tluôn. Amâo mâo djŏ knŏng mkăp kơ dŭm mta klei mrâo truh hŏng mnuih djuê ƀiă, ƀiădah hdră êlan ba mtruh năng brei kơ phung ƀuôn sang hmao thâo mơh djăp mta boh klei hlăm ala čar lehanăn hlăm tar rŏng lăn, hŏng klei pral, klă mngač, năng jing bruă hâo hưn truh hŏng klei kjăp lehanăn klă hĭn./.