Phung bi ala bi klă hlăm wưng êa jua mâo klei arưp aram ƀrư̆ hruê ƀrư̆ kƀah, amâo mâo ênŭm mkă hŏng klei čuăn mđĭ kyar bruă duh mkra ala ƀuôn, bruă bi hdră mtrŭn klei bhiăn răng mgang êa jua (mkra mlih), bi êdah dŭm hdră mbhiăn mbĭt, klei mđing tal êlâo hlăm bruă kriê dlăng êa jua, bi mbŏ phung čih mdah, bi klă êa yua gŭ lăn jing djŏ guôp. Pô bi ala Lê Thị Ngọc Linh êpul mơ̆ng Bạc Liêu hlăk mbang:

Ară anei boh klei mă leh anăn yua êa gŭ lăn mplă mplia amâo mâo djŏ hŏng klei čuăl mkă srăng ngă bi hrŏ hnơ̆ng êa, bi čhŏ êa gŭ lăn. Hlăm mta 2, pruê̆ 52 hdră bhiăn mă yua êa gŭ lăn mơ̆ng gŏ sang kơ bruă yua grăp hruê srăng ngă klei čih mdah. Hŏng dŭm klei čih mdah anôk bruă kriê dlăng srăng mâo dŭm klei mtă kơ boh klei êa jua diñu dôk yua mâo dŭm hdră êlan răng mgang djŏ guôp.)

Bơ̆k bâo kơ êa yua grăp hruê, phung bi ala  mñă čiăng mâo klei čuăn klă hĭn kơ hdră êlan răng mgang hŏng dŭm bruă mkŏ  mkra êa yua grăp hruê. Kyuadah hnơ̆ng tŭ jăk êa yua djŏ tuôm klă anăp hŏng klei suaih pral mnuih ƀuôn sang. Pô bi ala Huỳnh Thị Phúc lač:

“Hlăm đa đa bruă klă klơ̆ng kyua klei čiăng mjêč bruă yua êa mơ̆ng mnuih ƀuôn sang đĭ lu, sitôhmô adiê không amâo mâo hjan, mđiă hlơr sui, klei mă yua êa srăng êgao hnơ̆ng mkă hŏng hdră kčah. Kâo mñă kơ êpul čih mkra ksiêm duah, bi mbŏ thiăm dŭm klei čuăn kơ hnơ̆ng brei mă, mă yua bruă hĭn hlăm klei amâo mâo găl mơ̆ng yan adiê leh anăn boh sĭt hlăm klei hdĭp mă bruă mkra mjing, mnia mblei ăt msĕ hŏng đru hlăm klei hdĭp mnuih ƀuôn sang.

Klei bhiăn ară anei knŏng mâo dŭ klei čuăn bi kna bruă ba yua dŭm phŭn êa, êjai ară anei klei arưp aram không amâo mâo hjan, kƀah êa yua dưi mrâo hlăm grăp thŭn, hluê si pô bi ala Nguyễn Thị Thu Thủy, Êpul Bình Định, čiăng mâo klei đăo knăl hnưm čiăng čŏng pô:

“Êpul čih mkra čiăng bi klă klei čuăn 2 thŭn 1 blư̆ mkŏ mjing dŭm hdră mkăp bi mdrơ̆ng hlăm dŭm klei găl êa jua đru kơ klei mkăp brei êa hlăm ƀuôn prŏng hlăm wưng klei mlih yan adiê. Dŭm hdră mkăp kơ dŭm ƀuôn prŏng tŭ klei hmăi kyua mtlai hŏng êa msĭn leh anăn dŭm klei hmăi amâo mâo jăk mơ̆ng klei mlih yan adiê, ksiêm dlăng kjăp djah djâo bi čhŏ hnoh êa čiăng mgaih msir êa jua kơ ƀuôn prŏng mơ̆ng dŭm klei arưp aram êa djah mơ̆ng anôk bruă tuh tia ti akŏ êa, dŭm klei arưp aram čhŏ djhan mơ̆ng dŭm čar akŏ hnoh krông, ksiêm duah dŭm hdră mkăp klei amâo mâo jăk hlăm phŭn êa hlăm dŭm klei rŭng răng.

Boh sĭt hlăm jih jang dŭm alŭ wăl ka dưi mkŏ mjing ôh bruă kriê dlăng êa jua ti alŭ wăl, klei hưn, klei čih bi klă kơ êa jua dôk lu bĭt, pô bi ala Vương Thị Hương, êpul mơ̆ng Hà Giang lač:

Kâo nao nao hŏng bruă mkra mjing klei bi hmô klei čih pioh êa jua sa bĭt hlăm kluôm čar čiăng kơ drei mâo jar hâo hưn klă hĭn. Ƀiădah hlăm hdră bhiăn ka mâo klei čuăn klă nik. Kyuanăn kâo mñă bi mbŏ hruê mmông, hdră êlan bi leh bruă mkŏ mjing klei čih pioh kơ êa jua ala čar kñăm đru kơ bruă kriê dlăng êa jua hluê si kdrăp mrô mơ̆ng gưl dlông truh kơ alŭ wăl).

Ti anăp klei dleh ksiêm dlăng mơ̆ng yan adiê, yan adiê ƀrư̆ hruê ƀrư̆ amâo mâo jăk, pô bi ala Nguyễn Hữu Thông, êpul Bình Thuận lač čiăng bi klă dŭm klei čuăn kơ bruă dưn yua klei kreh knhâo, mrâo mrang hlăm bruă kriê dlăng, răng mgang, yua êa, gang mkhư̆ dŭm klei hmăi mơ̆ng êa ngă truh.

Kâo mñă bi mbŏ bruă bruă ksiêm dlăng hdră êlan mrâo mrang kar êa ksĭ jing êa doh thâo yua čiăng mkŏ mjing klei găl êa jua ăt msĕ hŏng răng bi djăp êa yua đru kơ klei hdĭp grăp hruê leh anăn mkra mjing mơ̆ng mnuih ƀuôn sang, boh nik jing mnuih ƀuôn sang ti dŭm plao ksĭ drei hlăm mta g, pruê̆ 1, êlan 6 mơ̆ng hdră bhiăn.