Hdră êlan mrô 8 jing hdră phŭn kơ êkei mniê tal êlâo hlăm sa hdră ala čar kñăm, bi êdah klei uêñ mĭn mơ̆ng Đảng leh anăn knŭk kna. Wưng thŭn 2021 – 2025, Hdră êlan mrô 8 dưi mâo lu boh tŭ dưn yuôm bhăn. bruă kriê dlăng leh anăn mkŏ mjing dưi ngă hnưm, hŏng bruă mkŏ mjing Êpul gĭt gai hdră mơ̆ng gưl dlông truh kơ gưl čar ti jih jang alŭ wăl. Gưl dlông ba mdah leh 17 hră mơar mtô leh anăn ngă klei ksiêm duah, hmao mghaih msir dŭm boh klei.

Ngăn prăk ăt dưi iêo mkrum, hŏng ênoh prăk brei čan mâo giăm 2000 êklai prăk, lu hĭn mơ̆ng gưl dlông. Lu hnơ̆ng cuăn phŭn djŏ tuôm hŏng bruă mkŏ mjing êpul hâo hưn yang ƀuôn, êpul bi mguôp mơ̆ng klei bi mlih, leh anăn mđĭ ai dưi kơ knuă druh mniê mnuih djuê ƀiă dưi mâo leh anăn êgao hdră kčah. Dŭm klei bi hmô msĕ si “Anôk đăo knang” dưi bi lar boh tŭ dưn, đa đa đru wăt kơ phung êkei hlăm dŭm boh klei djŏ tuôm.

Khădah mâo dŭm klei tŭ dưn, bruă pluă mbĭt êkei mniê hlăm dŭm hdră kdrêč mơ̆ng hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng ăt tlă anăp hŏng lu klei kpăk čiăng dưi dlăng klă. Anăn jing klei kƀah hlăm klei mkăp brei leh anăn ba yua ngăn prăk alŭ wăl, jing dŭm klei dleh dlan hlăm bruă bi klă djŏ pô leh anăn ngă dŭm mta phŭn, jing dŭm klei dleh kpăk hlăm bruă mjuăt bi hriăm, amâodah dŭm klei êdu kƀah hlăm bruă pluă mbĭt êkei mniê hlăm dŭm hdră kdrêč mkăn.

Bi kơ dŭm klei êdu kƀah hlăm bruă mkăp brei leh anăn yua prăk, khădah Phŭn bruă ngăn prăk mâo hdră hdră mtrŭn mrô 55 mkŏ mjing hdră êlan čiăng kơ alŭ wăl dăp ngăn prăk, ƀiădah hlăm boh sĭt, lu čar krĭng mnuih djuê ƀiă leh anăn čư̆ čhiăng tuôm hŏng klei dleh dlan kơ prăk hrui wĭt, ngă truh bruă mkăp brei ngăn prăk kơ hdră êlan mrô 8 ka djăp ôh. Dŭm êpul hâo hưn yang ƀuôn, khădah dưi mkŏ mjing leh anăn hriăm mjuăt, ƀiădah knŏng mâo mă prăk ênoh prăk ƀiă, amâo mâo djăp čiăng rơ̆ng kơ klei ngă bruă klă klă klơ̆ng. bruă yang ƀuôn čiăng iêo mkrum thiăm ngăn prăk ăt tuôm hŏng lu klei dleh dlan, ka mâo msĕ hŏng klei hmăng hmưi.

Bi kơ dŭm klei êdu kƀah hlăm klei pluă mbĭt êkei mniê hlăm dŭm hdră mkăn, mơ̆ng phung thơ̆ng kơ bruă đru kčĕ hdră êlan, nai prĭn Phạm Thái Hưng brei thâo: dŭm hră mtô mơ̆ng gưl dlông leh anăn alŭ wăl ka klă sĭt mđing kluôm dhuôm kơ boh klei anei.

Hlăm ênoh giăm 200 ênoh mrô boh tŭ mơ̆ng hdră ala čar kñăm, mâo truh 71 ênoh mrô brei mbha hluê si êkei mniê, ƀiădah bruă hluê ngă hlăm ƀuôn hgŭm boh sĭt ăt mâo klei lông dlăng. Klei anei ngă kơ bruă klam mtrŭt mđĭ klei mtăp mđơr êkei mniê krĭng mnuih ƀuôn sang lŏ tuôm hŏng klei dleh dlan hĭn, dleh dưi mâo mta kñăm msĕ si Hdră êlan ala čar ba mdah leh.

Ăt hluê si nai prĭn Phạm Thái Hưng, čiăng mtrŭt mđĭ tŭ dưn dŭm mta kñăm kơ klei mtăp mđơr êkei mniê mơ̆ng hdră mtrŭn mrô 88 Bruă Kƀĭn Ala leh anăn hdră êlan ala čar, čiăng mâo dŭm klei mlih hlăm klei nao jĕ. Hlăm anăn čiăng pluă mbĭt hlăm jih jang dŭm hdră leh anăn hdră điêt mơ̆ng Hdră ala čar kñăm. Klei anei čiăng mâo klei mtô klă kơ hdră êlan ngăn prăk leh anăn hdră ngă bruă, mơ̆ng adŭ bruă gĭt hdră ala čar kñăm leh anăn Dhar bruă djuê ana. Čiăng mlih mrâo hdră mtô mjuăt. Mlih mơ̆ng bi hriăm ƀiă hruê jing hdră elean mđĭ ai dưi hluê hdră, kñăm kơ boh sĭt leh anăn klei hriăm. Êngao kơnăn, čiăng mđĭ hĭn klei hưn hŏng yang ƀuôn. Bi klă mta kñăm hlăm klei duh bi liê leh anăn lŏ dơ̆ng rơ̆ng leh anăn pŏk mlar dŭm klei bi hmô tŭ dưn.

Bruă mgaih msir dŭm boh klei anei amâo djŏ knŏng mđĭ boh tŭ dưn klei ngă bruă mơ̆ng hdră êlan mrô 8 ƀiădah lŏ jing mta phŭn čiăng kơ hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng klă sĭt mâo boh tŭ dưn kluôm kơ klei đĭ kyar hơĭt kjăp leh anăn mtăp mđơr, amâo mâo lui kơ sa čô nah tluôn./.