Êjai hlăm klei mă klei blŭ phung ƀuôn sang, snăn tinăn ƀuh lu klei phung ƀuôn sang mâo lu klei blŭ mđing uêñ, sa ai hŏng dŭm klei bhiăn čih mkra, boh nik dŭm mta mtrŭn kơ klei čiu hnô, klei đru, klei mkŏ mkra anôk ala mrâo, kơ klei hrui mă lăn... Sitôhmô, mta 67 hlăm klei čih mkra hdră bhiăn lăn ala lŏ mlih mrâo mâo mta mtrŭn kơ dŭm mta hrui mă lăn pioh mđĭ kyar klei duh mkra ala ƀuôn kyua klei tŭ dưn kơ lăn čar, kơ yang ƀuôn. Bi mkă hŏng hdră bhiăn dôk djă yua ară anei dưi ƀuh mta mtrŭn mơ̆ng mơ̆ng hdră bhiăn lŏ čih mkra mâo pŏk phai hĭn, klă mngač hĭn. Siămdah, čiang dưi bi sa ai, lehanăn amâo lŏ lĕ hlăm klei amâo mâo djŏ êjai ngă bruă, snăn năng lŏ bi mngač hĭn kơ mta kñăm, ênoh čuăn kơ ya mta čiăng hrui mă lăn. Mâo lu klei blŭ bi lač, jing djăp mta bruă brei ngă hŏng klei klă mngač, bi djŏ hŏng klei tŭ dưn kơ knŭk kna, lehanăn kơ mnuih djŏ sua mă lăn, lehanăn phung duh bi liê, čiăng kơ mnuih tuôm hŏng klei sua mă lăn ăt mâo anôk dôk, rơ̆ng kơ klei hdĭp jing knar amâodah kdlưn hĭn hŏng anôk dôk hđăp.

        Phạm Phi Long, ti alŭ anôk dôk mrô 3, ƀuôn hgŭm Tân Thuận Đông, kdriêk čar mrô 7, ƀuôn prŏng Hồ Chí Minh lač: Anei jing bruă djŏ hŏng klei hdip phung ƀuôn sang, snăn năng mă bruă hŏng klei khăp, bi mâo mta mtrŭn djŏ ba wĭt klei tŭ dưn jăk plah wah knŭk kna, phung duh bi liê lehanăn pô lăn tuôm hŏng klei sua mă. Lehanăn, đruy kơ alŭ dưi nga bruă hŏng klei kjăp hĭn tơdah mâo klei bi sua mă lăn, mđĭ hnơ̆ng kjăp bruă čuăl mkă, kơ klei djă yua lăn hlăm wưng kơ anăp:

Klei bi mlih anei bi tĭng mkă kơ jih bruă mă hlăm êdei anăp, mâo klei dưi mkă tĭng bi jăk đăm lĕ hlăm klei amâo mâo thâo bi djŏ, lĕ hlăm klei bi kčŭt bi kjhuăr amâo mâo thâo lŏ leh. Mơ̆ng anăn dưi dưn yua jih klei găl mơ̆ng lăn pioh kơ klei mđĭ kyar bruă duh mkra ala ƀuôn, lehanăn djăp mta klei bhiăn kơ klei dưi djă yua lăn, lŏ mlih hdră djă yua lăn...

        Leh găn lu bruă mghaih msir klei kơ lăn ala, pô mgang kđi Huỳnh Hữu Nam, Hlăm êpul phung mgang kđi čar Đồng Nai lač; năng lŏ thiăm mbŏ, bi leh jih jang mta mtrŭn dưi ngă bruă hŏng klei klă mngač hlăm jih jang bruă čuăl mkă, klei djă yua lăn, klei kơ ênoh lăn, klei bi mnia mblei lăn, hŏng jih jang dŭm anôk bruă rŭ mdơ̆ng alŭ wăl anôk dôk, alŭ wăl ƀuôn prŏng, sang mnia. Mbĭt hŏng klei mlih mrâo, mđĭ hĭn klei bi ksiêm, mghaih msir klei ngă soh, mghaih msir klei bi mmiă, klei bi kčŭt djŏ tuôm hŏng lăn ala... Mnuih ƀuôn sang mđing hĭn êdi čiăng brei bi leh jih jang kơ hdră bhiăn lăn ala lŏ mlih mrâo, jing bruă klam mơ̆ng mnuih ƀuôn sang hŏng bruă čuăl mkă djă yua lăn, thiăm mbŏ bi leh jih jang mta mtrŭn kơ dŭm klei dưi mơ̆ng mnuih djă yua lăn hlăm alŭ wăl čuăl mkă, mâo bruă klam mơ̆ng knơ̆ng bruă sang čư̆ êa dŭm gưl hlăm čar bi ksiêm, mghaih msir hŏng klei klă mngač bruă lăm lui, hrui mă lăn bi mlih klei dưi djă yua lăn mâo čih leh hlăm hdră čuăl mkă bruă djă yua lăn.

        Tui si pô mgang kđi Huỳnh Hữu Nam mâo lu boh klei hlăm alŭ wăl, ba klei luič liê prŏng kơ mnuih ƀuôn sang, kơ bruă sang čư̆ êa. Pô mgang kđi Huỳnh Hữu Nam lač:  

Phung ƀuôn sang knŏng thâo kơ bruă tuh tia bruă êngao kơ lŏ hma grăp thŭn jing djăp leh. Bi tơdah knŭk kna hrui mă lăn lŏ pŏk hră mơar amâo mâo thâo bĭt ôh. klei čoh čuăn ênoh lăn kơ mnuih ƀuôn sang tui hlue hŏng ênoh bruă lŏ hma jing sa klei amâo mâo djŏ ôh. Klei yuôm jing amâo lŏ mkă tĭng ôh kơ anôk mkŏ mkra anôk dôk mrâo kơ mnuih ƀuôn sang. Ăt čiăng akâo mơh kơ knŭk kna bi mlih hdră êlan kñăm đru kơ mnuih ƀuôn sang hơĭt anôk dôk lehanăn hdĭp mda.

        Mâo lu klei blŭ lač djŏ tuôm hŏng klei čih mkra hdră bhiăn lăn ala lŏ mlih mrâo, hŏng mta kñăm jing lŏ bi kjăp hĭn, jăk hĭn ba wĭt klei tŭ dưn djŏ kơ knŭk kna, kơ mnuih mâo lăn, kơ phung duh mkra bi mâo klei bhiăn djŏ guôp, nga bruă bi tŭ jing ênoh ngăn prăk mơ̆ng bruă hrui mă lăn, prăk brei mưn lăn plah wah gưl dlông hŏng alŭ wăl. Hdră bhiăn ăt čoh čuăn mơh kơ ênoh jiă jing kdlưn hĭn hŏng mnuih dôk djă yua lăn prŏng, mâo lu sang, mkăp pioh anôk lăn pioh ghan mnia, amâodah êmưt hlăm bruă yua lăn, lehanăn lui êruh amâo mâo bruă ngă... Phan Minh Thành, Khua knơ̆ng bruă ngăn dŏ wăl hdĭp mda čar Long An lač, bruă bi mlih klei kơ ênoh ênil lăn ala brei mâo klei klă mngač hŏng grăp alŭ wăl, krĭng kwar:

Klei k ơênoh ênil lăn ala srăng jing anôk mkă tĭn hlăm jih jang bruă djŏ tuôm kơ bruă čuăn klei ngăn prăk kơ lăn ala, wăt hlăm klei hrui mă lăn, amâodah bi mnia mblei hŏng pô mâo lăn. Bi tui hlue anôk, ƀiădah brei ngă bruă hŏng klei klă mngač, snăn jao kơ Êpul Gơ̆ng bruă ƀuôn sang čar mtrŭn klei mlih mkra bi djŏ guôp hŏng alŭ wăl.

        Lu mnuih ƀuôn sang dôk čang guôn mơ̆ng klei mlih mkra hdră bhiăn lăn ala anei, tơdah bruă knuă leh dưi ngă, snăn djăp mta klei mơ̆ng gưl dlông hlŏng kơ alŭ wăl brei bi sa hnơ̆ng klei mă bruă. Lehanăn lŏ dơ̆ng bi mbha gưl, mbha klei dưi nao mđrĭng hŏng klei bi ksiêm klei dưi ngă bruă čiăng kơ êjai ngă bruă bi mâo klei tŭ dưn jăk, đru sĭt kơ bruă mđĭ kyar klei duh mkra ala ƀuôn./.