Pô bi ala Nguyễn Chu Hồi, êpul bruă kƀĭn ala ƀuôn prŏng Hải Phòng lač klei čuăl mkă kluôm lăn čar mâo lu mta mrâo, mbĭt hŏng bruă čuăl mkă jih jang êlan klông, hlăm anăn lŏ mkra wĭt jih jang êlan amâo mâo djăp prŏng hlăm dŭm čar kwar dưr, lehanăn kwar krah. Ăt tui si pô bi ala anei mơh, klei čuăl mkă anei mâo wăt bruă nah gŭ mkăn kñăm bi djŏ guôp hŏng klei mđĭ kyar mrô, lehanăn răng mgang wăl hdĭp mda, mâo dŭm alŭ wăl dliê knŭk kna mkuôm, mđĭ bi lar djăp mta mnơ̆ng dhơ̆ng hdĭp, lehanăn mdrơ̆ng hŏng klei bi mlih yan adiê:

        “Bruă nah gŭ hŏng mrô bi mkŏ krĭng ară anei amâo mâo djŏ knŏng jing êdeh ôtô, êdeh phiơr ƀiădah jing bruă mkŏ êlan hla pŏk web. Bruă nah gŭ tal 3 jing brei thâo bi djŏ hŏng klei bi mlih yan adiê, ară anei čiăng bi mâo dŭm tal ana kyâo, boh nik dliê čŏng mâo, lehanăn lŏ wĭt pla kyâo dliê, pla kyâo hlăm krĭng êngăp êa ksĭ kñăm đru gang mkhư̆ klei amâo mâo jăk mơ̆ng yan adiê ngă, kyua klei bi mlih yan adiê. Klei anei bi knăl kơ bruă čuăl mkă kluôm lăn čar kñăm bi djŏ hŏng klei đĭ kyar ênuk mrâo, lehanăn dưng bi tĭng mkă êlam hĭn boh mơ̆ng bruă ba yua kdrăp mrâo mrang”.        

Bi pô bi ala Bùi Hoài Sơn, Êpul bruă kƀĭn ala ƀuôn prŏng Hà Nội, klei čuăl mkă kluôm lăn čar mâo mđing truh kơ bruă mkŏ kjăp hĭn jih jang klei bhiăn dhar kreh, mđing kơ bruă bi kna plah wah bruă mđĭ kyar lehanăn kriê pioh knhuah gru dhar kreh, hƀuê ênuk. kriê pioh lehanăn mđĭ kyar klei tŭ dưn jăk siam mơ̆ng knhuah gru dhar kreh djăp djuê ana, mđĭ kyar ktang bruă tuh tia kñăm mâo mkra mjing lu mta mnơ̆ng, mđĭ anăn knăl bruă dhar kreh, mđĭ k’hưm lehanăn klei hmăi prŏng hŏng alŭ wăl, lehanăn tar rŏng lăn, djŏ hŏng hdră mtrŭn klei bi kƀĭn prŏng Đảng 13:

“Klei čuăl mkă kluôm lăn čar mâo leh dŭm bruă mđing klă kơ dhar kreh, boh nik hŏng djăp klei bhiăn hlăm dhar kreh. Bi tơdah drei mâo leh djăp ênŭm klei bhiăn dhar kreh knar hŏng arăng mơh msĕ si sang dăp pioh, sang mmuiñ, sang dlăng hră, anôk rang mdah... anei jing knơ̆ng pioh kơ drei mkŏ mjing djăp mta bruă bi năng hŏng klei mđĭ kyar lăn čar. Siămdah, ăt čiăng bi mâo mơh dŭm klei mđing mkăn jing ya mta bruă mâo klei tŭ dưn hĭn. Sa klei čuăl mkă kluôm lăn čar knŏng dưi ngă lehanăn ñu djŏ guôp hŏng klei jing mơ̆ng lăn čar, knŏng tơdah jưh kang djŏ hŏng klei tŭ dưn, dŭm klei yuôm bhăn mơ̆ng dhar kreh anăn”.

        Bi lač, klei čuăl mkă kluôm lăn čar wưng thŭn 2021-2030, êjai anăn tă hdră truh 2050 jing sa hlăm dŭm bruă mjêč djŏ tuôm hŏng klei čuăl mkă krĭng kwar, alŭ wăl, pô bi ala Lê Hữu Trí, Êpul bi ala bruă kƀĭn ala čar Khánh Hòa lač:

        “Tui hlue si hdră bhiăn čuăl mkă, snăn boh djŏ klei čuăl mkă kluôm lăn čar brei mâo hdră mtrŭn hnưm hĭn pioh mjing knơ̆ng kơ djăp alŭ wăl mâo hră mtrŭn kơ dŭm bruă čuăl mkă ti gưl čar, gưl nah gŭ hlăm čar. Ƀiădah klei yuôm bhăn hĭn mơ̆ng klei čuăl mkă jing hrue mmông srăng hnui hĭn, ƀiădah brei mâo hnơ̆ng kjăp, ngă bo djŏ, kñăm mđĭ kyar kjăp lăn čar, jing mđĭ kyar bi kjăp djăp mta kơ klei hdĭp mda ala ƀuôn, hlăm wưng ară anei lehanăn mkă tĭng truh kơ wưng thŭn 2050”.

Ti anôk bi kƀĭn mjêč tal 2 mơ̆ng bruă kƀĭn ala gưl 15, mâo klei dưi mơ̆ng khua knŭk kna, Khua phŭn bruă čuăl mkă duh bi liê Nguyễn Chí Dũng bi êdah hră mơar kơ klei čuăl mkă kluôm lăn čar wưng thŭn 2021-2030, lehanăn tă hdră truh kơ thŭn 2050. Mơ̆ng anăn bruă čuăl mkă kluôm lăn čar wưng thŭn 2021-2030, lehanăn tă hdră truh kơ thŭn 2050, hŏng ênoh čoh čuăn truh ti thŭn 2030 Việt Nam srăng jing ala čar đĭ kyar ênuk mrâo, mâo hnơ̆ng hrui wĭt kah knar jing prŏng, klei đĭ kyar bruă duh mkra tui si klei kreh knhâo hŏng kdrăp mrâo mrang, bi mlih hdră êlan mĭn, ngă bruă bi mlih mrô, hdră êlan mkŏ mjing bruă knuă, anôk ngă bruă gưl lăn čar bi tŭ jing, sa hnơ̆ng hŏng klei kjăp, dưi mjing dŭm krĭng, anôk phŭn bruă duh mkra, jing dŭm ƀuôn prŏng knơ̆ng, mâo klei bi sa hnơ̆ng mơ̆ng bruă nah gŭ, djŏ hŏng ênuk mrâo mrang, dưi mdrơ̆ng hŏng djăp mta klei bi mlih hlăm bruă duh mkra, wăl hdĭp mda mâo klei răng kriê, bi djŏ hŏng klei bi mlih yan adiê, hŏng klei hdĭp mnơ̆ng dhơ̆ng lehanăn ai tiê phung ƀuôn sang dưi mđĭ hĭn, bruă răng mgang klei êđăp ênang hơĭt kjăp./.