2 thŭn êgao, đang ana teinan hruĕ ka bŏ mơh 1.000m2 mơ̆ng gŏ sang đảng viên Cil Pam Ka Duyên, ti alŭ Dă Tro, să Dă Nhim, kdriêk Lạc Dương (Lâm Đồng) jing leh anôk bi hmô kơ bruă mnuih ƀuôn sang pioh nao tui hriăm. Đảng viên Cil Pam Ka Duyên brei thâo, mâo mnuih bi hmô ngă bruă sĭt êmĭt pioh hâo hưn mtô bi hriăm, bi lar hdră êlan mơ̆ng Đảng, klei bhiăn knŭk kna, snăn kơh ba wĭt boh tŭ dưn jăk, mnuih ƀuôn sang ba yua tui hriăm.

“Leh jing sa čô đảng viên, kâo lŏ mâo klei găl hĭn čiăn tui duah klei thâo săng jih jang hdră êlan mơ̆ng Đảng, klei bhiăn knŭk kna. Mơ̆ng anăn kâo dưi ngă jăk hĭn bruă mơ̆ng êpul bruă Đảng, bruă sang čư̆ êa jao. Bih nik, mtrŭt mnuih ƀuôn sang mlih mnơ̆ng pla, mnơ̆ng rông, gĭr pla mjing ana ƀiă hruê pioh mđĭ bi lar klei hdĭp mda gŏ sang. Ară anei klei hdĭp mda djuê ƀiă tinei mdul hĭn leh klei dleh dlan dah mkă hŏng êlâo”.

Amâo mâo djŏ knŏng đảng viên Cil Pam Ka Duyên, lu đảng viên mkăn jing mnuih djuê ƀiă hlăm să Dă Nhim ăt ƀuh bruă klam pô hlăm klei ba anăp hlăm djăp mta bruă. Hlăm anăn mâo wăt bruă mlih mnơ̆ng pla, mnơ̆ng rông, đru hlăm klei mđĭ kyar  bruă duh mkra pla mjing, bi đru hrue ai mă bruă, mjeh mnơ̆ng pla, mnơ̆ng rông, hdră pla mjing... Kyuanăn, bruă lŏ hma pla mjing ti Dă Nhim hŏng lu mta mnơ̆ng pla ƀrư̆ ƀrư̆ mđĭ kyar tui si mnơ̆ng pioh čhĭ mnia. Dơ̆ng mơ̆ng klei mphŭn dô knŏng pla mă hjăn kphê, truh ară anei, Dă Nhim mâo pla mjing leh truh 16ha ana êa drao Atisô, 6ha ana teinan hruĕ, 40 ha mnga pioh khăt adhan, 300 ha rau djam mtam djăp mta lehanăn êbeh 330ha ana boh kroh. Hnơ̆ng ênoh gŏ êsei ƀun hrŏ leh, ară anei knŏng adôk mă 7% ênoh čuăn mrâo. Đảng viên Cil Pam Ka Phương, Khua ƀuôn, ƀuôn Đarahoa, să Dă Nhim, brei thâo:

“Hmei hâo hưn mtô mblang, mtrŭt mjhar mnuih ƀuôn sang djuê ƀiă, mtă kơ diñu gĭr hlăm klei duh mkra pla mjing, mđĭ kyar klei hdĭp mda. Kyuadah mnĭ anei kơ tluôn knŏng pla mjing kphê, ară anei lŏ bi mlih pla mjing djam mtam boh kroh, êtak êbai pioh hdĭp mda”.

 Bruă Đảng să Dă Nhim mâo jih jang truh 122 čô đảng viên, bi mguôp hlăm 10 êpul bruă Đảng nah gŭ, đảng viên jing mnuih djuê ƀiă truh 52%. Tui si Kon Sơ Ha Vương, Khua bruă mặt trận să Dă Nhim, mbĭt hŏng bruă duh mkra pla mjing, snăn klei ba anăp, thâo bi hmô mơ̆ng grăp čô đảng viên ăt thâo dưn yua jih hnơ̆ng hlăm djăp mta bruă, boh nik hlăm klei mkŏ mkra krĭng ƀuôn sang mrâo, bi hrŏ ƀun hŏng klei kjăp, mâo klei bi mguôp djăp djuê ana mkŏ mjing bruă kđi čar kjăp:

“Hluê ngă hdră êlan mơ̆ng Đảng lehanăn hdră bhiăn knŭk kna, wưng leh êgao, Bruă Đảng, bruă sang čư̆ êa hâo hưn leh kơ mnuih ƀuôn sang hlue  ngă hdră mkŏ mkra krĭng ƀuôn sang mrâo. Hlăm hdră êlan, knŭk kna lehanăn mnuih ƀuôn sang mă bruă mbĭt hlăm bruă mkra êlan, mkra kban, lehanăn duh bi liê mkra mjing hŏng klei kjăp. Mbĭt hŏng bruă bi hơĭt klei hdĭp mda, mđĭ kyar mnơ̆ng dhơ̆ng mâo, lehanăn klei hdĭp ai tiê kơ mnuih ƀuôn sang mâo mđĭ hĭn”.

 Dưn yua bruă klam mơ̆ng sa čô đảng viên hlăm krĭng mnuih djuê ƀiă, ngă tŭ jing hĭn hlăm mnuih djuê ƀiă, klă sĭt ba wĭt klei tŭ dưn hlăm jih jang bruă mâo alŭ wăl mkŏ mjing, klei duh mkra ala ƀuôn ti Dă Nhim klă sĭt mâo leh klei bi mlih klă mngač, lehanăn hlăk lŏ đĭ kyar nanao hlăm grăp hrue./.