Dak Lak ară anei mâo 81 să krĭng mnuih djuê ƀiă leh anăn čư̆ čhiăng, hŏng êbeh 828 êbâo čô mnuih ƀuôn sang djuê ana ƀiă. Leh hdră bhiăn lăn ala 2024 mâo boh tŭ dưn, alŭ wăl đru leh lăn dôk kơ 238 gŏ sang, đru lăn mkra mjing amâodah bi mlih bruă mă kơ êbeh 1.300 gŏ êsei. Hdră bruă sang hră mơar, mdrao mgŭn krĭng mnuih ƀuôn sang djuê ana ƀiă lŏ dơ̆ng dưi krơ̆ng kjăp, 100% să mâo anôk mdrao mgŭn, giăm 97% sang mdrao mâo aê mdrao, mâo hnơ̆ng 9 čô mdrao/pluh êbâo čô mnuih.

Khădah snăn, alŭ wăl ăt tuôm hŏng lu klei dleh dlan. Keh lăn čiăng mkăp kơ mnuih djuê ƀiă ƀrư̆ hruê ƀrư̆ ƀiă, bruă msir mgaih lăn mâo phŭn agha mơ̆ng dŭm anôk bruă lŏ hma, dliê kmrơ̆ng adôk gun kpăk kơ klei kčah mtrŭn. Lu sang hră gưl tlâo knŭk kna rông ba hđeh mnuih djuê ƀiă kƀah sang dôk, sang huă ƀơ̆ng, adŭ hriăm; bruă mkăp prăk Hdră kñăm ala čar adôk êmưt, hlăk 3 sang hră knŭk kna rông ba krĭng knông lăn ăt kƀah êbeh 194 êklai prăk čiăng bi leh. Hlăm bruă mdrao mgŭn, krĭng taih kbưi ăt adôk kƀah phung aê mdrao thơ̆ng, kdrăp mnơ̆ng leh anăn hdră bruă hdră mnêč.

Mơ̆ng boh sĭt anei, alŭ wăl akâo kơ Anôk bruă kƀĭn ala leh anăn Dhar bruă gĭt gai anôk bruă kbĭn ala pral mkra mlih, bi leh dŭm klei kčah mtrŭn kơ bruă mjing keh lăn đru kơ mnuih djuê ƀiă; ktrâo lač klă klơ̆ng bruă hluê ngă Mta 16 Hdră bhiăn lăn ala 2024. Mbĭt anăn akâo kơ Knŭk kna leh anăn dŭm phŭn, dhar bruă mđing mkăp brei ai dưi kơ Hdră kñăm ala čar wưng 2026-2030; thiăm mbŏ prăk bi liê kơ anôk bruă nah gŭ sang hră, mdrao mgŭn leh anăn mâo hdră êlan iêô jak phung nai, aê mdrao ngă bruă sui thŭn ti krĭng dleh dlan.

Nguyễn Thiên Văn, K’iăng khua anôk bruă sang čư̆ êa čar Dak Lak lač, brei pral ksiêm dlăng, ba jao keh lăn mâo phŭn agha mơ̆ng dŭm knơ̆ng bruă lŏ hma, dliê kmrơ̆ng ba yua amâo tŭ dưn kơ alŭ wăl čiăng hluê ngă hdră lăn dôk, lăn pla mjing kơ mnuih ƀuôn sang djuê ana ƀiă.

“Ti alŭ wăl čar mâo 19 knơ̆ng bruă dôk hlăm gưl Phŭn bruă kiă kriê, mâo keh lăn hlăm brô êbeh 20 êbâo ha, ƀiădah grăp thŭn knŏng lŏ tla kơ knŭk kna hlăm brô mơ̆ng 20 -25 êklai prăk.  Êjai anăn klei čiăng kơ lăn dôk, lăn pla mjing kơ mnuih djuê ƀiă dôk mâo klei mđing uêñ snăk. Kyua anăn bruă ksiêm dlăng, tĭng dlăng sa jing jao kơ alŭ wăl kriê dlăng, dua jing dŭm boh klei anăn Phŭn bruă srăng mŭt ngă, mâo klei bi klă leh anăn jao wĭt kơ alŭ wăl čiăng kơ hmei hluê ngă dŭm hdră êlan lăn ala kơ mnuih ƀuôn sang djuê ƀiă."

Ti anôk mă bruă, Trần Thị Hoa Ry, K’iăng khua Êpul gơ̆ng bruă djuê ana mơ̆ng bruă kƀĭn ala čih pioh dŭm klei akâo mơ̆ng alŭ wăl, leh anăn bi myuôm boh tŭ dưn hlue ngă hdră êlan hŏng mnuih djuê ƀiă mơ̆ng Dak Lak. Ñu mtă kơ čar lŏ dơ̆ng ksiêm dlăng djŏ phung dưi dưn, mđĭ hĭn klei bi mguôp plah wah dŭm dhar bruă, mtrŭt mđĭ klei hâo hưn hdră êlan leh anăn uêñ mĭn duh bi liê kơ kdrăp yua bruă mdrao mgŭn nah gŭ.

“Ksiêm dlăng djŏ tuôm kơ mnuih mă bruă ăt msĕ mơh jing hnơ̆ng čuăn kah mbha hnơ̆ng kơ hdră êlan bruă mtô bi hriăm leh anăn mdrao mgŭn čiăng pŏk ngă hlăm wưng kơ anăp. Thâo Dak Lak ăt srăng dưi dưn lu kơ hdră kčah djŏ hŏng dŭm hdră kñăm ala čar mơ̆ng mnuih djuê ƀiă, mdrao mgŭn. Hŏng bruă mă ti sang êa drao nah gŭ anăn snăn mđing ksiêm dlăng wĭt kdrăp mnơ̆ng yua kriê dlăng klei suaih pral kơ jih jang mnuih ƀuôn sang, hlăk êjai drei hluê ngă bruă kriê dlăng  klei suah pral kơ jih jang mnuih snăn ară anei lu anôk ka dưi ngă ôh"./.