Sa hlăm dŭm boh phŭn mâo mnuih mă bruă mđing uêñ jing bruă rơ̆ng klei dưi mơ̆ng hră ênua yang ƀuôn boh klei anôk bruă duh mkra dôk êmưt ngă bruă. Cao Văn Bi, Khua Công đoàn anôk bruă duh mkra ti ƀuôn hgŭm Tuy Hòa, čar Dak Lak, akâo brei mâo hdră msir čiăng kơ mnuih mă bruă amâo hmăi kơ klei dưi tơdah anôk bruă duh mkra ka bi leh bruă klam tla prăk hră ênua yang ƀuôn.

"Hdră mtrŭn 158 snăn hră ênua yang ƀuôn knŏng bi mklă wưng anôk bruă duh mkra mâo tla leh prăk mưn kơ mnuih ngă bruă. Msĕ snăn mnuih ngă bruă tŭ klei luič liê. Kyuanăn ăt čiăng akâo jing si srăng ngă čiăng bi mklă wưng tla mơ̆ng mnuih ngă bruă truh kơ wưng mdei bruă. Bi 2 mlan, 3 mlan amâodah 1 thŭn anôk bruă duh mkra ka tla snăn knŭk kna, anôk bruă pô mâo bruă klam jing hrui mă kdrêč anăn mơ̆ng anôk bruă duh mkra čiăng kơ mnuih ngă bruă amâo mâo klei hmăi ôh"

Ti anôk bi kƀĭn, dŭm klei blŭ mơ̆ng phung mă bruă, phung mă bruă knŭk kna, mnuih mă bruă leh anăn knuă druh mđing kơ dŭm klei dleh dlan dôk mâo hlăm klei hdĭp, klei mă bruă leh anăn hdră hluê ngă dŭm hdră êlan djŏ tuôm kơ mnuih mă bruă. Jing klei mđing dlăng jing klei kơ bruă mă hlăm boh klei čiăng kơ klei thâo bruă, klei thâo mrô ƀrư̆ hruê ƀrư̆ đĭ; klei êmưt tla prăk mlan, êmưt tla prăk hră ênua yang ƀuôn; klei čiăng kơ sang dôk yang ƀuôn, sang dôk kơ mnuih mă bruă leh anăn dŭm klei gun kpăk hlăm klei dưi dưn dŭm hdră êlan đru.

Wĭt lač kơ bruă mjuăt bi hriăm bruă knuă leh anăn bruă mă ti alŭ wăl, Nguyễn Quang Thuân, K'iăng khua knơ̆ng bruă kiă kriê bruă knuă čar Dak Lak, brei thâo msir mghaih bruă mă, mđĭ hnư hrui wĭt leh anăn bi hơĭt klei hdĭp mnuih mă bruă jing sa hlăm dŭm bruă čar mđing.

“Êlâo hĭn, čar bi hgŭm leh hŏng dŭm knơ̆ng, dhar bruă mkŏ mjing hdră mjuăt bi hriăm, mđĭ klei thâo mă bruă kơ mnuih ngă bruă hlăm wưng kơ anăp. Mbĭt anăn, đru kơ anôk bruă duh mkra bi hgŭm bruă mă, mđing kơ dŭm gŏ êsei ƀun, hŏng lu hdră msĕ si mjing bruă mă ti anôk pô, bi hgŭm mnuih mă bruă êngao čar leh anăn ba mnuih mă bruă nao mă bruă ti ala tač êngao, hlăm anăn mâo mnuih mă bruă wưng bhiâo.”

Mbĭt hŏng bruă msir mghaih dŭm klei gun kpăk kơ hdră bhiăn, mlih mrô dưi bi mklă jing sa hlăm dŭm hdră msir čiăng mđĭ hnơ̆ng tŭ jăk hdră ngă bruă, đru kơ mnuih ƀuôn sang leh anăn mnuih mă bruă dưi dưn hdră bhiăn găl ênưih hĭn, boh nik dŭm hdră bhiăn kơ hră ênua yang ƀuôn. Tạ Đức Hậu, K'iăng khua Anôk bruă hră ênua yang ƀuôn čar Dak Lak, brei thâo anôk bruă hră ênua yang ƀuôn dôk ƀrư̆ ƀrư̆ bi mlih hdră ngă bruă đru kơ mnuih mă bruă dưi dưn dŭm hdră bhiăn găl ênưih hĭn.

"Phŭn bruă ênua yang ƀuôn bi klă bi mlih mơ̆ng bruă tŭ mă jing bruă ngă êlâo. Leh mâo kdrăp mrô doh snăn hmei ngă êlâo klei bi mguôp hŏng kdrăp mrô ala čar kơ mnuih ƀuôn sang čiăng thâo ƀuh dŭm mta mrô bi mklă mơ̆ng mnuih mă bruă adôk ka djŏ, ka bi knar snăn hmei ngă êlâo mơh mơĭt hră anăn mnuih mă bruă adôk ka djŏ kơ anôk bruă kiă kriê mnuih mă bruă ăt msĕ mơh kơ mnuih mă bruă čiăng hmao mkra mlih, bi djŏ."

Khua knơ̆ng bruă sang čư̆ êa čar Dak Lak mñă klă, dŭm mta phŭn dưi bi trông ti anôk bi kƀĭn amâo djŏ knŏng mdei ti bruă wĭt lač grăp klei êmuh ƀiădah lŏ mdưm klei čiăng lŏ dơ̆ng msir mghaih leh klei bi blŭ hrăm. Knơ̆ng bruă sang čư̆ êa čar Dak Lak tŭ mă, gĭt gai dŭm anôk bruă djŏ tuôm ksiêm hriăm leh anăn msir mghaih. Mbĭt anăn mtă brei mđĭ hdră bi blŭ hrăm klă anăp plah wah bruă sang čư̆ êa, anôk bruă duh mkra hŏng mnuih mă bruă; bi hgŭm hŏng êpul bruă Công đoàn čiăng kriê dlăng klei hdĭp mnơ̆ng dhơ̆ng, ai tiê klei mĭn leh anăn răng mgang klei dưi, klei tŭ dưn djŏ hdră bhiăn, klă sĭt mơ̆ng phung mă bruă.