Kdriêk Čư̆ Kuiñ jing sa hlăm dŭm alŭ wăl ti čar Dak Lak mâo lu mnuih ƀuôn sang hluê đăo. Hlăm anăn phung đăo Khop mâo 67%, Klei Mrâo Mrang Jăk mâo êbeh 26% leh anăn phung đăo Yơng mâo 7%. Hŏng mta kñăm mđĭ ênoh phung đảng viên phung phung mâo klei đăo, hruê 14/12/2014, Bruă Đảng kdriêk Čư̆ Kuiñ mkŏ mjing leh anăn ba mdah hdră mtrŭn mrô 2 kơ bruă Mtrŭt mđĭ ktang bruă mđĭ kyar phung đảng viên jing phung mâo klei đăo mâo mbĭt hŏng bruă mkŏ dăp, yua knuă druh jing phung  đăo hlăm bruă kđi čar nah gŭ”.

Mta knăm mơ̆ng hdră mtrŭn mrô 2 jing mkŏ mjing klei mlih hlăm klei thâo săng mơ̆ng phung knuă druh, đảng viên leh anăn mnuih ƀuôn sang, boh nik jing mnuih ƀuôn sang đăo kơ klei mĭn sa ai, djŏ klă mơ̆ng Đảng hlăm bruă hluê ngă hdră êlan klei đăo knang. Mơ̆ng anăn đăo knang kơ klei gĭt gai mơ̆ng Đảng, klei uêñ mĭn, klei kriê dlăng, gĭt gai mơ̆ng knŭk kna. Mbĭt anăn, ăt đru bi mlih êpul đảng viên hlăm grăp anôk bruă Đảng, mđĭ hĭn bruă klei gĭt gai, ai kdơ̆ng blah mơ̆ng êpul bruă Đảng leh anăn đảng viên ti dŭm krĭng mnuih ƀuôn sang mâo klei đăo.

Hluê ngă dŭm hnơ̆ng čuăn leh anăn klei čuăn hlăm Hdră mtrŭn mrô 2 mơ̆ng bruă Đảng kdiêk, dŭm anôk bruă Đảng nah gŭ bi klă hŏng dŭm hdră mtrŭn klei čih hluê si grăp thŭn. Êdah êdi, ti Anôk bruă Đảng să Hoà Hiệp bi klă hŏng dŭm hdră mtrŭn klei čih mrô 12 kơ bruă mđĭ hĭn klei gĭt gai mơ̆ng Đảng hŏng bruă mđĭ kyar đảng viên. Hlăm anăn bi klă mta kñăm “Mtrŭt mđĭ bruă mtô bi hriăm, hriăm mbŏ, bi mŭt đảng viên mrâo jing mnuih djuê ƀiă leh anăn phung mâo klei đăo”. Mơ̆ng anăn dŭm anôk bruă đảng să hluê ngă ktang phĭt dŭm hdră êlan leh anăn hdră bruă mdê mdê. Trần Văn Du, khua bruă Đảng nah gŭ alŭ Giang Sơn, să Hoà Hiệp, kdriêk Čư̆ Kuiñ, čar Dak Lak brei thâo:

 “Anôk bruă Đảng mtrŭt mjhar sa hdră bruă, mbha hnơ̆ng čuă kơ phung đảng viên hlăm anôk bruă đảng nag bruă mtô bi hriăm. Mbĭt anăn, mbha kơ phung knuă druh, êpul bruă ăt ƀuh klă hnơ̆ng čuăn anei”.

Mơ̆ng dŭm hdră bruă, bruă ngă klă klơ̆ng ti alŭ wăl, dŭm anôk bruă Đảng hrŏng mă leh phung ƀuôn sang êdah êdi ti krĭng mnuih djuê ƀiă mâo klei đăo čiăng hriăm mbŏ klei thâo, bi mŭt hlăm êpul bruă Đảng, đru mkŏ mjing êpul knuă druh, đảng viên mbŏ kơ alŭ wăl. Trần Văn Thục, khua bruă Đảng să Hòa Hiệp, kdriêk Čư̆ Kuiñ, čar Dak Lak brei thâo:

 “Hmei mâo leh klei kƀĭn trông kơ bruă mđĭ kyar đảng viên, hlăm anăn kñăm kơ bruă mđĭ kyar đảng viên hlăm krĭng mnuih ƀuôn sang mâo klei đăo, ăt msĕ mơh mđĭ kyar đảng viên jing mnuih djuê ƀiă. Bi kơ wưng sui mâo phŭn hrô kơ phung knuă druh bruă kđi čar, truh kơ ară anei thŭn khua čiăng mâo klei mdei”.

Hluê si aduôn Phúc Bình Niê Kđăm, khua kiă bruă Đảng kdriêk Čư̆ Kuiñ, hŏng lu klei gĭr ruh mgaih klei dleh dlan, dưn yua mbruă dŭm klei čuăn mơ̆ng gưl dlông hlăm bruă mđĭ kyar Đảng, truh kơ ară anei, bruă đảng kdriêk Čư̆ Kuiñ mâo 33 êpul êya anôk anôk bruă Đảng, mâo 25 anôk bruă Đảng, 8 anôk bruă Đảng nah gŭ, hŏng êbeh 4.400 đảng viên. Ênoh phung Đảng phung đảng viên jing phung đăo ƀrư̆ hruê ƀrư̆ đĭ lu đru mlih leh bruă klam đang viên, mđĭ hĭn bruă klam gĭt gai, ai kdơ̆ng blah mơ̆ng dŭm êpul bruă Đảng:

 “Ênoh leh anăn hnơ̆ng tŭ jăk đảng viên jing phung mâo klei đăo dưi mđĭ hĭn. Hlăm thŭn 2016, ênoh phung đảng viên jing phung đăo hlăm kdriêk mâo 108 čô. Leh hluê ngă hdră êlan truh kơ arăanei, ênoh đảng viên jing phung đăo hlăm kdriêk jing 245 čô, mâo 5,5% ênoh đảng viên hlăm kdriêk. Kdriêk ăt mkŏ dăp ba yua 13 čô đảng viên jing phung đăo ngă knuă druh kmeh gơ̆ng leh anăn dŭm khua kiă kriê, k’iăng khua kiă kriê dŭm êpul bruă kđi čar yang ƀuôn gưl să”.

Dŭm boh tŭ dưn hlăm bruă mđĭ kyar đảng viên jing phung đăo dưi bi klă klei djŏ guôp hŏng boh sĭt ti alŭ kdriêk Čư̆ Kuiñ, mkŏ mjing thiăm kdrông mkŏ, bi mguôp plah wah klei đăo hŏng klei hdĭp. Hluê anăn klei bi mguôp djuê ana, klei đăp knang dưi mđĭ hĭn, đru mđĭ kyar bruă duh mkra ala ƀuôn, gang mkhư̆ dŭm klei mĭn soh čhuai, mnêč mlpư mjhua hŏng klei đăo ngă klei bi kah, luč klei bi mguôp dŭm djuê ana ti alŭ wăl.