Hlăm dŭm hruê m’ak yan mnga, drông Têt, amai H’Bŭi Ayŭn, ti ƀuôn Drai Sĭ, să Êa Tar, kdriêk Čư̆ Mgar, čar Dak Lak amâo wơr ôh bruă dlăng kriê mnơ̆ng rông. Dŭm êtuh drei mnŭ, sin, ŭn, pai, bê lehanăn êmô dưi ƀơ̆ng ênŭm djăp mta mnơ̆ng tŭ jăk lehanăn bi mdoh war rông. Amai brei thâo, mâo êpul mnơ̆ng rông snăn gŏ sang ñu thŭn anei dưi drông sa yan Têt djăp ênŭm, blei mprăp lu mta mnơ̆ng, nư knơ̆ng prăk dưi tla leh mkrah wah.

Amai H’Búi yăl dliê, êlâo adih bruă duh mkra gŏ sang amai knŏng jưh knang hlăm 1ha kphê. Leh nao hgŭm hlăm Êpul bruă mniâ ƀuôn, thŭn 2019, amai dưi čan 70 êklăk prăk mơ̆ng knơ̆ng prăk đru ba yang ƀuôn hŏng ênoh prăk mnga hdjul. Mâo prăk duh bi liê, ung mô̆ amai mĭn tĭng kơ hdră duh ƀơ̆ng, pla lu mta mnơ̆ng mnuă, rông lu mta mnơ̆ng čiăng mđĭ hnư hrui wĭt. Amai yăl dliê: Kyua nao hgŭm hlăm êpul bruă mniê, mâo phung amai adei đru ktrâo lač, kâo gĭr hluê ngă. Mơ̆ng anăn, kâo dưi hriăm lehanăn thâo kơ hdră rông mnơ̆ng, pla mnơ̆ng, bi mlih mnơ̆ng pla, mnơ̆ng rông djŏ guôp hŏng klei găl mâo. Kâo pla rơ̆k lehanăn ktơr ti hma, ba wĭt ngă mnơ̆ng ƀơ̆ng kơ êmô, bê ba wĭt leh boh tŭ dưn. Mkă hŏng êlâo, kâo knŏng pla kphê snăn hdră duh mkra gŏ sang ăt dul ƀiă mơh.

Hluê si H’Blên Ayŭn, Khua êpul bruă mniê să Êa Tar, kdriêk Čư̆ Mgar, čiăng đru kơ mnuih hgŭm hlăm êpul mđĭ kyar bruă duh mkra, bi h’ĭt klei hdĭp, Êpul mtrŭt phung amai adei bi đru bi hrŏ klei ƀun hŏng lu hdră, mkra lehanăn krơ̆ng kjăp gru hmô mkiêt mkriêm djŏ guôp, msĕ si: Gru hmô rông ŭn lăn, gru hmô 10 čô amai adei đru kơ 1 čô ti alŭ 1, 2, 3, ƀuôn Êa Tar, gru hmô mă bruă ti êpul bruă ƀuôn Êa Kiêng…  Êpul ăt mkŏ mjing 7 êpul mkiêt mkriêm, êpul mgrơ̆ng čan prăk ti Knơ̆ng prăk đru ba yang ƀuôn kdriêk Čư̆ Mgar kơ êbeh 300 čô hgŭm mă čan đru tlaih kơ ƀun hŏng ênoh giăm 6 êklai prăk. Êpul ăt mtô mblang kơ phung amai adei tui hriăm, si srăng ngă čiăng mjing bruă mă kơ diñu. Tal dua jing hriăm čiăng mâo klei thâo săng ba yua hlăm klei hdĭp gŏ sang, bi h’ĭt bruă duh mkra, mkra mđĭ hnư hrui wĭt mơ̆ng gŏ sang, dưi mđĭ kyar hluê hdră h’ĭt kjăp.

Êpul bruă mniê să Êa Mnang, kdriêk Čư̆ Mgar ruah leh hdră hrăm mbĭt, đru kčĕ čiăng kơ amai adei ba yua kdrăp mrâo hlăm bruă pla mjing, bi mlih mnơ̆ng pla, mnơ̆ng rông djŏ guôp. Mkŏ mjing dŭm êpul brei čan prăk đru kơ amai adei mâo prăk duh kơ bruă. Êpul ăt iêu mtrŭt djăp ai dưi, klei mâo bi hgŭm hưn mthâo dŭm gru hmô duh ƀơ̆ng kơ mnuih ƀun, giăm ƀun. Aduôn Phạm Thị Ngọc Trang, Khua êpul bruă mniê să Êa Mnang hưn mdah hdră ngă bruă mơ̆ng alŭ wăl: Čiăng kơ gŏ sang amai adei ƀun lehanăn giăm ƀun dưi tlaih kơ ƀun h’ĭt kjăp, Êpul bruă mniê ăt brei amai adei čan prăk mă mơ̆ng phŭn mkăp mkiêt mkriêm êpul. Êpul bruă mniê să bi hgŭm hŏng Anôk bruă mặt trận să hưn mthâo dŭm gru hmô čiăng kơ gŏ sang amai adei ƀun, giăm ƀun dưi tui hriăm, nao čuă dlăng gru hmô wĭt ba yua kơ pô čiăng mđĭ kyar bruă duh mkra tlaih kơ ƀun.

Hluê aduôn Lê Thị Thu Hiền, Khua êpul bruă mniê kdriêk Čư̆ Mgar, wưng êgao, dŭm gưl bruă mniê kdriêk Čư̆ Mgar pŏk leh lu gru hmô bruă duh mkra msir klei ƀun, đru kơ phung mniê mphŭn čô̆ kơ bruă… Mơ̆ng anăn mâo leh 14 gru hmô mđĭ kyar bruă duh mkra hlăm gŏ êsei mnuih djuê ƀiă, mâo 100 čô nao hgŭm. Dŭm gru hmô đru leh 30 êklăk prăk čiăng amai adei duh rông bê, êmô, pai, čhĭ mnơ̆ng dhơ̆ng. Mơ̆ng anăn, ba wĭt leh boh tŭ klă sĭt, đru kơ amai adei lŏ mâo hnư hrui wĭt lehanăn ƀrư̆ ƀrư̆ bi hrŏ ƀun. Aduôn Lê Thị Thu Hiền brei thâo: Hlăm wưng ti anăp, Êpul bruă mniê kdriêk srăng mđĭ hdră mtô mblang, mtrŭt mjhar, bi lar dŭm gru hmô mrâo, hdră ngă jăk hlăm phung knuă druh, amai adei mniê, boh nik bi mlih klei mĭn, hdră ngă hlăm bruă mđĭ kyar hdră duh mkra mơ̆ng gŏ sang phung mniê mnuih djuê ƀiă.

Kdriêk Čư̆ Mgar, čar Dak Lak ară anei mâo 72 alŭ, ƀuôn mnuih djuê ƀiă, êbeh 45% ênoh mnuih kluôm kdriêk. Mơ̆ng bruă pla mjing hluê hdră mơ̆ng đưm êlâo amâo ba wĭt klei tŭ dưn, dôk jưh knang lu đei hlăm hdră đru mơ̆ng knŭk kna, truh ară anei, lu gŏ êsei mnuih djuê ƀiă bi mlih leh hdră mĭn, hdră ngă, ƀrư̆ tui ksiêm dŭm kdrăp mrâo, bi mlih mnơ̆ng pla, mnơ̆ng rông čiăng mđĭ kyar bruă duh mkra. Hlăm ênoh anăn, mâo lu phung amai adei gĭr ktưn kpưn đĭ tlaih kơ ƀun hơĭt kjăp, đru mđĭ hnư hrui wĭt kơ gŏ sang, bi h’ĭt klei hdĭp./.