Hluê si phung bi ala, čiăng mâo hnơ̆ng đĭ kyar êbeh 10% kluôm thŭn mơ̆ng 7.84 % ară anei, Knơ̆ng bruă sang čư̆ êa čar Dak Lak brei hnưm mkŏ mjing hdră kčah klă klơ̆ng, bi mklă dŭm hdră bruă boh kdrŭt, phŭn mkăp prăk srăng bi liê leh anăn dŭm klei êdah êdi. Lê Văn Cường, Khua anôk bruă Dhar kreh–ala ƀuôn mơ̆ng Êpul gơ̆ng bruă ƀuôn sang čar Dak Lak mtă:

"Kâo mtă kơ Knơ̆ng bruă sang čư̆ êa čar brei ktrâo klă jing 6 mlan knhal jih thŭn ya hdră bruă srăng mâo, ya hdră mkăp, ya ngăn prăk bi liê čiăng rơ̆ng klei đĭ kyar kah knar kluôm thŭn mơ̆ng 10.02% kơ dlông".

Hlak mblang dŭm anôk kpăk kơ klei đĭ kyar, phung bi ala Êpul gơ̆ng bruă ƀuôn sang čar Dak Lak lač wăt hlăm bruă lăn ala, klei ngă hră mơar, mâo lu mta čiăng msir mghaih. Bùi Thị Hà Giang, Khua dlăng bruă Đảng, Khua Êpul gơưl bruă buôn sang să Êa Drăng, čar Dak Lak hưn mdah boh sĭt ti alŭ wăl.

"Klei sa ai mơ̆ng mnuih ƀuôn sang leh anăn anôk bruă duh mkra hlăm bruă hluê ngă hră mơar knŭk kna jing ka jăk ôh. Tal 2 jing bruă kriê dlăng mơ̆ng knŭk kna kơ lăn ala, mkăp brei hră dưi yua lăn ăt msĕ mơh dŭm hdră êlan yua lăn mâo phŭn agha mơ̆ng lŏ hma, anôk bruă dliê kyâo dôk tuôm hŏng lu klei kpăk đuôm drei srăng dleh dưi ngă bruă klam jing mđĭ kyar bruă duh mkra mơ̆ng să leh anăn kluôm ala".

Klei bi kƀĭn mơ̆ng Êpul gơ̆ng bruă ƀuôn sang čar Dak Lak dưi hluê ngă mtam leh čar hưn mthâo Hdră čuăl mkă lehanăn mkŏ mjing tŭ dưn Klei bi kbi ƀĭn mtrŭt mđĭ hdră duh bi liê. 25 hdră bruă, ênoh prăk êbeh 40.200 êklai prăk dưi mkăp hră tŭ yap duh bi liê.

Dŭm hdră bruă duh bi liê knŭk kna dôk ngă ti Dak Lak ăt mâo hnơ̆ng prŏng êdi, ƀiădah, hluê si pô bi ala Huỳnh Gia Hoàng, K’iăng Khua Knơ̆ng bruă ngăn prăk čar Dak Lak, čiăng đru mguôp klă sĭt kơ klei đĭ kyar, jih bruă kđi čar čiăng nao hgŭm ktang phĭt hĭn, msir mgaih klei kƀah kơ bruă msir anôk ala leh anăn bi liê prăk duh mkra.

"Čiăng dưi bi liê ngăn prăk mơ̆ng knŭk kna, brei bi mklă anei jing bruă klam mbĭt mơ̆ng jih anôk bruă kđi čar. Boh nik mđing kơ bruă ruh mgaih anôk ala. Ka mâo ôh thŭn mâo prăk duh bi liê knŭk kna mâo lu msĕ snăn. Kyua anăn jing gưl bruă Đảng, bruă sang čư̆ êa alŭ wăl, boh nik jing bruă knŭk kna gưl să, ƀuôn hgŭm, brei bi mklă anei jing bruă klam phŭn kluôm čiăng hluê ngă hlăm jih wưng păn bruă."

Phung bi ala bi tŭ ư lač Dak Lak dôk mâo lu klei găl mđĭ kyar hlăk wăl anôk đĭ kyar dưi pŏk mlar, hdră čuăl mkă dưi hưn mthâo lehanăn klei mđing dlăng mơ̆ng phung duh bi liê ƀrư̆ hruê prŏng. Khă snăn, klei găl knŏng dưi jing boh kdrŭt đĭ kyar tơdah dŭm klei gun kpăk kơ hdră duh bi liê knŭk kna, lăn ala, hdră čuăl mkă, klei ngă hră mơar lehanăn hdră hluê ngă dưi msir mghaih pral hlăm dŭm mlan knhal jih thŭn.