Nguyễn Quang Vinh, ti êpul mrô 1, alŭ mrô 3, să Nhân Cơ, kdriêk Dak R’Lâp, čar Dak Nông bŏ hŏng klei mơak leh hmư̆ hing kơ bruă srăng duh bi liê mkra êlan dơ̆ng pral Dưr Dhŭng kdrêč găn Gia Nghĩa (Dak Nông) - Chơn Thành (Bình Phước) mâo leh dhar bruă gĭt gai bruă kƀĭn ala tŭ ư ba mdah hŏng bruă kƀĭn ala ksiêm bi mklă, kñăm mâo klei bi tŭ ư ti anôk bi kƀĭn tal 7, mlan 5 tinăp. Vinh mâo klei čang hmăng bruă mkra êlan dơ̆ng anei srăng pral mâo bi mklă, čiăng kơ êlan anei mâo mkra, pioh kơ mnuih ƀuôn sang mâo klei găl ênưih bi găn êrô jăk hĭn. Dŭm mta boh mnga mnuih ƀuôn sang pla mjing msĕ si kphê, tiu, boh durian... Msĕ hŏng sang Vinh mâo ngă, srăng dưi ba čhĭ hŏng klei găl ênưih hĭn, đru mđĭ kyar klei hdĭp mda mnuih ƀuôn sang.

       “Kâo čang hmăng kơ bruă kƀĭn ala pral dưi bi mklă. Tơdah êlan leh mkra nao kpă blăk pral hĭn. Jing jăk găl kơ klei duh mkra mnia mblei djăp mta mnơ̆ng dhơ̆ng, sĭt nik klei hdĭp srăng đĭ kyar pral mơh, bruă tuh tia, bruă lŏ hma, lehanăn jih jang mnơ̆ng bi čhĭ mnia jing găl ênưih. Mâo êlan dơ̆ng anei srăng ba wĭt lu klei tŭ dưn kơ mnuih ƀuôn sang”.

         Lê Văn Chiến, Khua hlăm êpul kiă kriê bruă Đảng čar, k’iăng khua knơ̆ng bruă sang čư̆ êa čar Daknông lač, Daknông lehanăn alŭ wăl lăn dap kngư jing krĭng pla mjing lu mta mnơ̆ng pioh ba čhĭ kơ ala tač êngao, lehanăn ti năn duh mkra mnia mblei. Anei ăt jing krĭng truăn kơ bruă tuh tia, anôk mkra mjing bô xít- alumin- ksueh. Siămdah, Lăn dap kngư ăt jing krĭng adôk êdu awăt kơ klei mđĭ kyar bruă duh mkra. Kbiă hriê mơ̆ng klei êlan klông ka kjăp. Amâo mâo kdrŭn ksĭ, amâo mâo êlan êdeh treng, jih jang kluôm krĭng čiăng mđĭ kyar knŏng jưh knang kơ êlan dơ̆ng đuič.

Lê Văn Chiến lač, êlan dơ̆ng pral Dưr - Dhŭng nah yŭ kdrêč găn Gia Nghĩa (Dak Nông) - Chơn Thành (Bình Phước) srăng đru yuôm bhăn kơ klei dleh kpăk kơ êlan klông. Đuĕ nao phă dhŭng hŏng klei ênưih, mkŏ hŏng êlan dơ̆ng prŏng Chơn Thành- ƀuôn prŏng Hồ Chí Minh. Mklăk hŏng anăn nao phă dưr, srăng jing anôk mkŏ êlan dơ̆ng pral lăn daop kngư mơ̆ng Dak Nông găn Dak Lak, Gia Lai, Kon Tum, mkŏ hŏng kwar krah ti êlan dơ̆ng pral Dưr Dhŭng. Jing srăng mkŏ hŏng jih jang djăp krĭng srăng anôk mđĭ kyar bruă duh mkra mrâo, mtrŭ kơ klei hdĭp mda ala ƀuôn, kơ Daknông lehanăn krĭng lăn dap kngư. Hŏng klei yuôm bhăn msĕ snăn, čar Daknông mâo mprăp leh ƀhĭ ênŭm kơ bruă mkra êlan:      

    “Čar hlăk ngă dŭm knhuang pioh kơ bruă mkra êlan. Hlăk dôk ngă djăp mta hră mơar djŏ hŏng klei knŭk kna kiă kriê jing čar Daknông bi mguôp truh 1.000 êklai prăk snăn Daknông mprăp leh. Hjăn hŏng bruă čuăn yuôm bhăn mkăn anăn jing kơ bruă ruh mgaih anôk ala, mâo ngă leh djăp”.

 Tui si klei čuăl mkă, êlan dơ̆ng pral Gia Nghĩa - Chơn Thành mâo boh prŏng 6 grông êlan. Wưng mbha gưl klei duh bi liê hŏng boh taih jing 128,8 km, boh prŏng 4 grông êdeh mâo bi leh, ruh mgaih bi jih anôk ala bi djăp 6 grông êdeh. Snăn phŭn tal êlâo tĭng ênoh bi liê leh hlăm brô 25.540 êklai prăk, hlăm anăn mâo mkrah jing prăk knŭk kna, dŭm adôk jing prăk mơ̆ng phung duh bi liê dăp hdră.

 Hjăn ti čar Dak Nông, êlan dơ̆ng găn hriê truh 27,8km (lu jing găn ti dŭm kdriêk Dak R’Lâp), hŏng jih jang ênoh lăn sua mă hlăm brô 526ha, lŏ mbĕ anôk dôk kơ 252 gŏ sang. Phan Anh Tuấn, khua bruă Đảng kdriêk Dak R’lâp, čar Dak Nông brei thâo, ngă klei gĭt gai mơ̆ng bruă Đảng čar, knơ̆ng bruă sang čư̆ êa čar, wăt hŏng jih bruă kđi čar hlăm kdriêk nao leh sơăi kơ bruă mprăp kơ klei mkra êlan. Hŏng klei sa ai čiăng mkra êlan, kdriêk mâo ksiêm dlăng leh, čuăl mkă truh kơ 6 anôk mkŏ mkra ala ƀuôn mrâo, 10 anôk mă boh tâo, 8 anôk mkăm djah. Kdriêk ăt gĭt gai leh dŭm knơ̆ng dhar bruă, dŭm boh să mâo bruă bi ksiêm, đru bi yap dŭm ênhă lăn, ana kyâo mtâo, mnơ̆ng mnuih ƀuôn sang pla mjing, djŏ hlăm klông tă pioh mkra êlan.

 “Hlue ngă klei čar gĭt gai, snăn mâo mkŏ mjing leh êpul mtrŭt mjhar, hâo hưn lehanăn mkŏ mjing êpul mkăn. Jih jang ti dŭm alŭ wăl dŭm bruă Đảng să, ƀuôn hgŭm, wăl krah êpul kahan ksiêm, kahan lĭng lehanăn bruă mặt trận, dŭm êpul êya bi mguôp mbĭt sơăi. Anwi jing bruă čuăn prŏng, jih bruă kđi čar bi mă bruă mbĭt, hŏng jih ai tiê čiăng kơ mnuih ƀuôn sang bi sa ai”.

 Dak Nông čŏng mprăp leh jăk jih jang djăp boh klei pioh mkra êlan dơ̆ng pral Gia Nghĩa - Chơn Thành mâo bi mklă snăn hlŏng mkra mtam yơh. Bruă Daknông mprăp kơ klei mkra êlan dưi bi êdah leh ai tiê kơ klei čiăng mđĭ kyar klei hdĭp mda la ƀuôn ktang phĭt mơ̆ng čar./.