Hlăm sa boh sang hdơr knga tla ai mrâo mdơ̆ng giăm truh 70 m2, hŏng ênoh 200 êklăk, amai Nguyễn Thị Tặng, đảng viên hlăm êpul bruă Đảng ƀuôn hgŭm Thành Công, ƀuôn prŏng Ƀuôn Ama Thuôt bŏ hŏng klei mơak. Hŏng ênoh 2 ung mô̆ mâo hrui wĭt 10 êklăk prăk/mlan, gŏ sang ñu knŏng djăp yua hlăm klei hdĭp aguah tlam mlam hrue, lehanăn duh kơ dua čô anak hriăm hră mơar. Kyua mâo klei đru truh 70 êklăk prăk mơ̆ng keh “Đảng viên mkiêt mkriêm ngă hlue knhuah mngač Hồ Chí Minh” mơ̆ng ƀuôn prŏng Ƀuôn Ama Thuôt lehanăn lŏ mâo găp djuê bi đru, snăn klei dôk hmăng hmưi nanao čiăng kơ sa boh sang kjăp mơ̆ng gơ̆ dưi bi sĭt:

 “Ka tuôm mâo ôh klei mĭn mâo hĕ sa boh sang msĕ snei, knŏng dôk mĭn čiăng tloh blei sa bĭt lăn đuič yơh jing tal êlâo, bi klei tloh mdơ̆ng sang jing ka jhŏng mĭn ôh, kyuadah jing sa ênoh prăk prŏng snăk, hŏng ênoh prăk dua ung mô̆ mâo duah knŏng djăp pioh rông dua čô anak lehanăn amĭ mduôn đuič. Mâo hĕ sang anei jing jăk êdi kâo bŏ hŏng klei mơak, bi ala kơ gŏ sang hmei kâo lač jăk kơ phung đảng viên hlăm anôk bruă Đảng đru brei leh kơ gŏ sang hmei”.

Kyua thŭn leh khua asei awăt, klei hdĭp mda dleh dlan, snăn Nguyễn Văn Châu 62 thŭn, mâo 30 thŭn Đảng leh dôk ti êpul anôk dôk mrô 5, Ƀuôn hgŭm Tự An, ƀuôn prŏng Ƀuôn Ama Thuôt ăt dưi lŏ rŭ mkra mơh sang dôk êjai dôk hdĭp hlăm sang mdơ̆ng hđăp hđê leh mâo 30 thŭn hŏng anei mâo leh lu anôk dơ̆ng jhat rai. Ti anăp klei klei msĕ snăn, mlan 4/2021, mâo klei đru kơ ñu truh 25 êklăk prăk mơ̆ng “keh mkiêt mkriêm hlue ngă knhuah mngač Hồ Chí Minh” mơ̆ng ƀuôn prŏng Ƀuôn Ama Thuôt lŏ mguôp mbĭt hŏng prăk mkuôm pioh, snăn gŏ sang ñu tloh lŏ mkra wĭt pưk sang bi kjăp hĭn.

 “Êlâo dih sang tĭ rưč mdjip mdjap, hluh ƀrôč, leh mâo bruă Đảng ƀuôn prŏng đru ba, dua thŭn hŏng anei hmei hơĭt hĭn leh mơ̆ng klei angĭn hjan, kyuadah asei mlei kâo awăt snăk mduôn khua leh. Kâo lač jăk lu êdi”.

Mâo hlue ngă bruă anei mơ̆ng hlăk thŭn 2013 truh kơ ară anei, keh mkiêt mkriêm hlue ngă knhuah mngač Hồ Chí Minh mơ̆ng ƀuôn prŏng Ƀuôn Ama Thuôt mâo ba yua leh hlăm klei tŭ dưn, iêo jak leh lu phung knuă druh, đảng viên leh anăn mnuih ƀuôn sang bi mguôp mbĭt. Čiăng dưi mâo prăk pioh kơ keh, dŭm anôk bruă Đảng, êpul bruă Đảng mâo nanao klei hâo hưn, mtrŭt mjhar knuă druh jing phung đảng viên mơ̆ng dŭm anôk bruă êpul êya bi mkrum leh msĕ si: Mbha êpul bi mguôp êpul sa bi mkrum ƀiă êdi 30.000 prăk/mlan, êpul 2 ƀiă êdi 15.000 prăk/mlan, êpul 3 bi mkrum 6.000 prăk kơ dlông/mlan lehanăn êpul 4 jing bi mguôp tui si ai tiê dưi mâo. Hdră mă bruă anei mâo ngă mơ̆ng thŭn 2013 truh kơ ară anei, keh đảng viên mkiêt mkriêm mâo êbeh 8,6 êklai prăk. Mơ̆ng anăn, mâo đru mdơ̆ng lehanăn mkra wĭt truh 15 boh sang, đru kơ klei duh ƀơ̆ng kơ 11 čô mnuih, đru mdrao mgŭn kơ 697 čô mnuih lehanăn lŏ ngă dŭm klei đru mkăn. Trần Văn Châu, k’iăng khua anôk bruă kiă kriê klei hâo hưn mơ̆ng bruă Đảng ƀuôn prŏng Ƀuôn Ama Thuôt, čar Daklak brei thâo:

 “Kâo ƀuh keh anei jing yuôm bhăn êdi bŏ hŏng klei thâo khăp. Tal sa, jing đru kơ phung đảng viên dôk hlăm klei dleh dlan, mâo klei truh, lehanăn kơ phung đảng viên ƀun čiăng mâo êlan duah ƀơ̆ng, ƀiădah lĕ hlăm klei kƀah ngăn prăk duh kơ bruă snăn đru kơ digơ̆ ngă bruă knuă, lehanăn đru mdơ̆ng brei sang dôk snăn mơ̆ng keh anei bi tĭng mkă lehanăn đru bi hmao mơh, snăn digơ̆ ƀuh êpul bruă Đảng dôk nanao tĭng kơ diñu.”

    Dưi ƀuh, mơ̆ng leh mâo ênoh prăk mkiêt mkriêm mơ̆ng ƀiă jing lu, lehanăn jing leh sa ênoh prŏng. Anei jing bruă ngă bŏ hŏng klei thâo khăp, jing yuôm bhăn êdi bi êdah mơ̆ng klei thâo tui hriăm mơ̆ng knhuah mngač mơ̆ng Awa, mơ̆ng anôk bruă Đảng lehanăn mnuih ƀuôn sang ti ƀuôn prŏng Ƀuôn Ama Thuôt, đru mguôp leh kơ dŭm phung knŭk kna dlăng ba, đảng viên găn klei dleh dlan, kpưn đĭ hlăm klei hdĭp./.