Phung bi ala mâo leh klei bi tŭ ư hŏng bruă čiăng mlih mkra, thiăm mbŏ dŭm klei bhiăn, kñăm čiăng bi leh jih jang hdră bhiăn, djŏ hŏng klei jing hlăm bruă knuă lehanăn klei hdĭp, boh nik mđĭ hĭn klei bi mlih mrô, bi mlih hdră êlan ngă hră mơar, lehanăn mkŏ mjing bruă sang čư̆ êa dua gưl.

Đru mguôp klei blŭ hlăm bruă čih mkra klei bhiăn tŭ mă klei hâo hưn,   Bùi Thanh Toàn, Khua knơ̆ng bruă kreh knhâo lehanăn kdrăp mrâo, boh nik hŏng boh pia “anôk bruă sang čư̆ êa” lehanăn phung mâo bruă klam kăp hâo hưn. Boh sĭt ară anei, dôk mâo klei mčhua hŏng bruă knuă hŏng klei dưi, amâodah ñĕ đuĕ amâo mâo hưn mdah ôh dŭm klei hâo hưn. Bùi Thanh Toàn bi êdah lehanăn mâo klei akâo thiăm mbŏ klei čoh čuăn klă mngač, hlăm klei bhiăn mghaih msir klei ngă soh, mbĭt hŏng bruă klam mơ̆ng pô yua klei hâo hưn leh mâo hâo hưn.

 “Klei bhiăn mghaih msir klei ngă soh, sĭt nik dôk hlăm dŭm klei bhiăn, dŭm mta mtrŭn mkăn. Siămdah, tui si kâo ăt lŏ mñă hlăm klei bhiăn anei. Bi hlăm anei lu jing knŏng ƀuh pô dlăng kluôm mkăp klei hâo hưn. Ƀiădah bi pô phŭn ngă bruă mkăp klei hâo hưn si? Sitôhmô mâo anôk bruă A adih mkăp klei hâo hưn, ƀiădah êdei kơ anăn kâo jing pô ngă soh bi kpleh klei hâo hưn anăn si srăng mghaih msir hŏng kâo? Sĭt yơh hlăm klei bhiăn anei, amâo mâo ôh dŭm klei čoh čuăn klă mngač kơ klei mghaih msir, ƀiădah brei sa pruĕ mñă jing srăng mâo klei bhiăn mghaih msir.”

Mbĭt hŏng klei anei mơh, mâo đa đa phung bi ala čiăng bi mâo dŭm klei čoh čuăn klă mngač hŏng dŭm hngah mkăp klei hâo hưn, čiăng lĕ hlăm klei  mčhua lačdah jing klei “hgăm bruă sang čư̆ êa”. Mbĭt anăn brei mgô̆ mkăp klei hâo hưn hlăm êlan hla pŏk, lehanăn lŏ mđĭ hĭn bruă mkăp dŭm ênoh bruă plah wah dŭm anôk bruă. Ară anei ăt adôk klei bi bư̆ ban klei hâo hưn plah wah dŭm knơng dhar bruă, ngă bi dleh bruă dưi tŭ mă klei hâo hưn mơ̆ng mnuih ƀuôn sang.

Bi hŏng klei bhiăn đru mnuih hlue ngă klei bhiăn, aduôn Lê Thị Thanh Thuỷ, K’iăng khua knơ̆ng bruă hlue ngă klei bhiăn čar Daklak lač, năng lŏ bi lar phung dưi dưn, lehanăn mđĭ hĭn klei tŭ mơ̆ng bruă anei. Kyuanăn klei bhiăn năng lŏ thiăm mbŏ êpul mnuih khua thŭn hdĭp hjăn, phung tuôm hŏng klei găp djuê ngă jhat mŭt hlăm ênoh dưi đru hlăm bruă đru mgang tui si klei bhiăn, lehanăn bi mlih klei bhiăn ngăn prăk pioh iêo jak lu mnuih đru mgang kđi, phung truăn kơ bruă nao ngă hlăm bruă anei.

 “Tơdah dôk djă pioh hlue si klei čoh čuăn hđăp, snăn jing dleh iêo jak phung thâo mgang kđi, amâodah phung truăn kơ bruă hlăm klei bhiăn, mâo klei hur har đru jih ai tiê hlăm bruă mghaih msir djŏ hŏng klei bhiăn, boh nik ti dŭm alŭ wăl dôk găn klei dleh dlan, ngă hmăi amâo mâo hlăm bruă mghaih msir, lehanăn dưi dưn klei klă djŏ hlăm bruă mghaih msir kơ mnuih ƀuôn sang. Knơ̆ng bruă hlue ngă klei bhiăn mâo klei akâo mkŏ mjing dŭm hdră êlan bi klă klei kơ ngăn prăk, rơ̆ng čiăng thâo mă bruă hlăm klei đru ba djŏ tui si klei bhiăn, boh nik hŏng krĭng taih kbưi, krĭng dleh dlan, bi năng hŏng hdră êlan bi đru, lehanăn bi năng mơh hŏng mnuih ngă bruă đru mnuih ƀuôn sang kơ klei bhiăn.”

Klah čŭn ti anôk bi kƀĭn, Nguyễn Thị Thu Nguyệt, K’iăng khua êpul bi ala bruă kƀĭn ala čar Daklak bi myuôm ai tiê klei đua klam, boh tŭ kơ klei đru mguôp klei blŭ. Êpul phung bi ala bruă kƀĭn ala čar Daklak srăng bi klin jih jang djăp ênŭm pioh lŏ ksiêm duah, bi leh boh klei kăp kčĕ bi trông ti anôk bi kƀĭn bruă kƀĭn ala anei, kñăm mđĭ hĭn hnơ̆ng tŭ dŭm mta bruă čih mkra hdră bhiăn, čiăng dưi bi lar pral hĭn lehanăn ba yua kơ klei hdĭp, ngă bruă bi tŭ dưn hĭn./.