-Akâo kơ ih yăl dliê si klei iêo mŭt kahan thŭn 2023 ti čar Daklak mâo mơ ya mta klei mrâo?

  Bruă iêo mŭt kahan thŭn 2023, snăn ară anei ăt adôk djă yua klei bhiăn iêo mŭt kahan thŭn 2015. Siămdah, bruă hrŏng ruah, iêo mŭt kahan thŭn anei mâo anôk mrâo jing knŭk kna mâo leh hdră mtrŭn mrô 37 hrue 6/6/2022 lŏ mlih mrâo thiăm mbŏ đa đa mta mơ̆ng klei mtrŭn mrô 120 hrue 9/10/2013 čoh čuăn đŭ bi kmhal hlei pô ngă soh hlăm bruă lĭng kahan. Mơ̆ng anăn đŭ bi kmhal klei ngă soh hlăm bruă hrŏng ruah kahan. lehanăn anei jing sa hlăm dŭm klei iêo mŭt kahan hŏng ênoh lu. Anei jing sa hdră čiăng bi hrŏ djăp mta bruă amâo mâo djŏ hlăm klei iêo mŭt kahan, mghaih msir klei dêč đuĕ amâo mâo čiăng nao mŭt kahan. Lehanăn êdah êdi hŏng boh tŭ dưn, thŭn   2022 dêč amâo mâo nao mkă dlăng klei suaih pral pioh nao kahan jing truh 103 čô hđeh êdam. Siămdah, thŭn 2023 anei klei dêč amâo mâo nao mkă dlăng klei suaih pral knŏng dua čô đuič. Anei yơh jing mta mrâo, klei êdah hĭn êdi hlăm bruă hrŏng ruah kahan thŭn 2023.

 - Bruă iêo mŭt kahan thŭn 2023 mâo mơ̆ si iklei găl lehanăn klei dleh dlan, akâo kơ ih yăl dliê brei?

  Bruă iêo mŭt kahan thŭn 2023 mơ̆ng čar dah lač kơ klei găl jing mâo klei mđing uêñ, klei kiă kriê mơ̆ng Êpul bruă Đảng, čar, Êpul Gơ̆ng bruă ƀuôn sang, Knơ̆ng bruă sang čư̆ êa, lehanăn dŭm knơ̆ng dhar bruă, êpul êya, dŭm gưl bruă Đảng nah gŭ, bruă sang čư̆ êa sa, kdriêk, čar. lehanăn jih jang phung ƀuôn sang mâo leh klei thâo săng, boh nik phung hđeh êdam truh thŭn nao mŭt kahan. Bi klă bruă klam, bruă čuăn, yap jing klei myun dưi nao mŭt kahan.

Sĭt yơh ăt mâo lu mơh klei dleh dlan, tal êlâo jing asei mlei grăp čô mnuih mđing kơ klei duh ƀơ̆ng, lehanăn nao mă bruă kbưi ti dŭm alŭ wăl duh mkra. Kyuanăn yơh, klei iêo jak phung hđeh êdam nao mkă dlăng klei suaih pởal pioh nao mŭt kahan mơ̆ng dŭm gưl bruă Đảng, bruă sang čư̆ êa djăp gưl ăt dôk tuôm hŏng lu klei dleh dlan. Tal dua, klei suaih pral hđeh êdam ară anei toh hroh lu êdi, kyua lu phung hđeh êdam mâo klei amâo mâo jăk hŏng ală, mâo klei ruă hnơ̆ng êrah đĭ, klei ruă kboh... Boh nik mâo đa đa phung hđeh êdam lŏ yua mta mđĭ ai, lehanăn dŭm mta êa drao čiăng bi msoh ai kkuih tăp, hnơ̆ng êrah đĭ, ngă kơ êpul nai aê êa drao mkă dlăng klei suaih pral ti gưl kdriêk tuôm nanao hŏng klei dleh dlan.

- Snăn akâo kơ ih lŏ mblang brei, čar Daklak si knhuang mâo mprăp leh kơ bruă jao kahan mrâo thŭn 2023?

  Ênoh čuăn mơ̆ng knŭk kna jao kơ čar Daklak thŭn 2023 jing bi mâo 2.968 čô hđeh êdam nao mŭt kahan. Hlăm anăn mâo 2.502 čô nao ngă bruă čuăn lĭng kahan hlăm anăn mâo 2 čô mniê. lehanăn 466 čô hđeh êdam nao ngă bruă čuăn jing kahan ksiêm, hlăm anăn mâo 1 čô mniê. Čiăng bi leh jăk bruă jao kahan ti dŭm alŭ wăl, dŭm anôk bruă kiă kriê lĭng kahan čar mâo kčĕ leh kơ Êpul Gơ̆ng bruă kiă kriê lĭng kahan 15 boh kdriêk, wăl krah, lehanăn ƀuôn prŏng mđing hĭn kơ hnơ̆ng tŭ, kơ bruă kiă kriê hđeh êdam djăp thŭn nao mŭt kahan. Ktrâo atăt djăp alŭ wăl, boh nik hŏng dŭm anôk bruă kiă kriê lĭng kahan dŭm kdriêk ngă bi jăk jih jang bruă mprăp, kơ klei mjuăt bi hriăm kơ jih jang klei bhiăn jao kahan hŏng klei kdrăm k’ah, klă sĭt bruă jao kahan anei jing sa knăm yuôm bhăn kơ hđeh êdam djăp djuê ana hlăm čar pô. Lehanăn, kiă kriê dŭm gưl bruă Đảng, bruă sang čư̆ êa djăp gưl hrăm mbĭt, ngă bi jăk hdră êlan đru kơ bruă nah tluôn hŏng lĭng kahan, boh nik klei bi čuă êmuh, mđĭ ai phung hđeh êdam hơĭt ai tiê, mprăp klei nao mŭt kahan hŏng klei jăk thŭn   2023 anei.

-Lač jăk kơih lu, Đại tá Lê Văn Hùng.