Kyuanăn hlăm wưng êgao, čar Dak Lak mđĭ leh klei gĭt gai mơ̆ng Đảng, mtrŭt mđĭ bruă hluê ngă hdră mrô 06 mơ̆ng knŭk kna, hluê anăn mkŏ mjing klei hrăm mbĭt, tŭ dưn.

Huỳnh Văn Ánh, să Phú Lộc, kdiêk Krông Năng, čar Daklak mơak êjai  ngă bruă hŏng online ti đa đa mta bruă hlăm sang să hŏng hdră sa ƀăng bhă mâo klei tŭ dưn êdi. Amâo mâo djŏ knŏng ngă hră mơar, ƀiă dah wăt bruă bi tĭng tla hlăm knơ̆ng prăk ăt bi tĭng tla hŏng êlan êlektronik.  Huỳnh Văn Ánh lač:

 “Amâo mâo guôn lŏ nao ngă hră mơar ênua, amâodah hră mơar akâo mrô knăl ti anôk bruă kahan ksiêm ôh. Diñu mtă êla pô wăn hlŏng mă jih jang boh tŭ dưn jing 1 hlăm 3 knŏng ngă mă sa blư̆. Bi prăk bi tĭng tla ăt msĕ snăn mơh, pô mâo leh mrô knăl knŏng dhuôr amâodah mkăp kơ anôk anei hlŏng ngă mtam ênưih pưih lehanăn pral snăk”.

Bi Nguyễn Ngọc Anh, să Hoà An, kdriêk Krông Pač, čar Daklak leh mâo phung ngă bruă mơ̆ng êpul  ngă bruă 06 mơ̆ng să hâo hưn, ñu ƀuh klei tŭ dưn êjai djă yua arkhao anăn knăl hŏng elektronik msĕ si: Jing mâo mkiêt mkriêm hrue mmông, kriêm prăk bi liê kyuadah amâo lŏ ngă lu mta hră mơar ôh, bi hrŏ lu mta hră mơar ngă leh, knŏng ba yua hŏng kak mrâo, lehanăn dŭm mta hră mơar čiăng tui duah, srăng ƀuh jih ti anăn knăl hlăm elektronik msĕ si: Hră dưi mgăt êdeh, hră ênua mdrao mgŭn... Nguyễn Ngọc Anh nao ngă mtam amâo lŏ ngĭ ngư̆ ôh:

 “Klei bi mlih mrô, mâo anăn knăl elektronik, anei jing klei tŭ dưn prŏng êdi kơ mnuih ƀuôn sang, snăn mâo leh dŭm knơ̆ng dhar bruă, êpul êya hlăm să, kdriêk êsei, đru leh mnuih ƀuôn sang thâo săng klei nao mkra anăk knăl elektronik jing găl enưih êdi kơ bruă ngă hră mơar, snăk ƀuh jing mơak snăk”.

Mta bruă mrô 06 mơ̆ng knŭk kna mâo đơ knuă lehanăn klei ling lar prŏng, ba wĭt klei tŭ dưn jing jăk snăk kơ klei knŭk kna kiă kriê hlăm djăp mta bruă. Hŏng bruă klam prŏng mơ̆ng klei hlue ngă mta bruă 06, wưng leh êgao, kahan ksiêm čar Daklak gĭr hlăm jih bruă ngă, mtrŭr mjhar ktrâo atăt mnuih ƀuôn sang nao ngă kak mrâo, mđĭ hĭn bruă čiăng dưi bi lêh ênoh čuăn bi mdoh klei jing kơ mdê asei. Trung tá Trần Văn Dũng, kahan ksiêm să Hoà An, kdriêk Krông Pač, čar Daklak brei thâo:

 “Kahan ksiêm să bi hgŭm leh hŏng dŭm dhar bruă nao truh hlăm grăp boh ƀuôn nao ngă anăk knăl hlăm elektronik ti hnơ̆ng mrô 1 kơ mnuih ƀuôn sang, lehanăn mâo klei bi mguôp hŏng êpul kiă kriê bruă ngă hră mơar, mkă mdưm anăn knăl hlăm elektronik ti hnơ̆ng mrô 2, êjai hlăm klei ngă bruă, snăn mnuih ƀuôn sang jih ai tiê leh tui nao ngă kơ bruă mkŏ anăk knăl hlăm elektronik hŏng grăp čô mnuih”.

  Čiăng mđĭ hĭn bruă klam mơ̆ng anôk bruă Đảng djăp gưl hlăm klei hlue ngă bruă mrô 06, hrue 20/3/2023, Êpul kiă kriê bruă Đảng čar Daklak mâo leh asăp mtrŭn mrô 33 kơ klei mđĭ hĭn bruă mơ̆ng Đảng kiă kriê, kñăm kiă kriê kjăp ênoh mnuih, anăn knăl grăp čô mnuih, lehanăn bi mklă bruă hŏng elektronik pioh kơ klei bi mlih mrô wưng thŭn 2022 - 2025, tă hdră truh kơ thŭn 2030 hlăm čar. Mơ̆ng asăp mtrŭn anei, knơ̆ng bruă sang čư̆ êa čar Daklak mâo leh lu hdră pioh ngă bruă anei. Lehanăn gĭt gai dŭm knơ̆ng dhar bruă hlăm čar mkŏ mjing giăm 2.400 êpul nao ngă bruă 06 mơ̆ng čar hlŏng truh kơ dŭm boh ƀuôn. Truh kơ ară anei, čar Daklak mâo ngă leh ênŭm êbeh 2,1 klei mkŏ dưm jih jang klei hâo hưn mơ̆ng grăp čô mnuih hlăm ênoh mkăp kơ lăn čar klei kơ anak mnuih, lehanăn ngă jăk bruă knŭk kna kiă kriê kơ bruă răng mgang klei êđăp ênang hlăm alŭ wăl. Mbĭt hŏng anăn, mâo mkăp leh êbeh 1,6 êklăk pŏk kak asei mrâo mkŏ čip elektronik kơ grăp čô mnuih, mâo tŭ mă leh êbeh 500 êbâo arkhao anăk knăl elektronik ti hnơ̆ng mrô 1 lehanăn mrô 2. Jih jang bruă ngă hră mơar hlăm čar ăt hlăk dôk mkŏ dŭm mta bruă mơ̆ng knŭk kna pioh kơ bruă 06 đru mđĭ hĭn klei tŭ dưn hŏng jih jang ênoh mơ̆ng kluôm ala hŏng online ti hnơ̆ng mrô 3, mrô 4 mâo klei mđing hĭn, boh nik hlăm 25 bruă mơ̆ng knŭk kna dôk hlăm ênoh 06 đru mđĭ hĭn klei tŭ dưn bruă knŭk kna kiă kriê mnuih ƀuôn sang. Thiếu tướng Lê Vinh Quy, Khua knơ̆ng bruă kahan ksiêm čar Daklak, k’iăng khua êpul kiă kriê mta bruă 06 gưl čar brei thâo:

 “Anei jing bruă mơ̆ng knŭk kna dôk ngă čiăng kơ jih jang djăp gưl bi hgŭm, lehanăn mâo klei sa ai mơ̆ng jih jang mnuih ƀuôn sang. Hlăm anăn, êpul kahan ksiêm jing knơ̆ng, pô phŭn hlăm klei ngă bruă anei, lăm lui jih klei mĭn amâo mâo djŏ mơ̆ng pô, ngă bruă kyua kơ jih jang mnuih. Mđing kơ bruă ba klei tŭ dưn kơ jih jang mnuih lehanăn phung duh mkra. Tal 2 jing jih ai tiê hâo hưn čiăng kơ mnuih ƀuôn sang lehanăn phung duh mkra ƀuh klei tŭ dưn mơ̆ng mta bruă 06, lehanăn ƀrư̆ ƀrư̆ bi leh jing bruă mrô hŏng anak mnuih, lehanăn yang ƀuôn mrô”.

 Mâo klei gĭt gai mơ̆ng dŭm gưl bruă Đảng, klei ngă bruă hŏng jih ai tiê mơ̆ng bruă sang čư̆ êa, jih jang boh tŭ dưn tal êlâo hlăm klei hlue ngă mta bruă mrô 06 ti čar Daklak mâo mjing leh klei găl tui si klei bhiăn kơ bruă mghaih msir djăp mta bruă knuăk kna kiă kriê mjing djăp klei găl kơ mnuih ƀuôn sang lehanăn phung duh mkra kyar bruă duh mkra pioh kơ bruă bi mlih mrô ti gưl ala čar./.