Hlăm sa mlam knhal jih hrue kăm, Thượng úy Y Biza Rya, Khua êpul đru čung ba phung ƀuôn sang mơ̆ng kđông kahan răng mgang knông lăn Ia Rvê, mbĭt hŏng êpul kahan nao čuă phung ƀuôn sang ti alŭ mrô 1, să Êa Rvê. Thượng úy Y Biza brei thâo, hâo hưn mđĭ hĭn klei thâo săng kơ hdră bhiăn kơ phung ƀuôn sang ti knông lăn jing sa hdră čiăng kơ phung ƀuôn sang thâo săng, lehanăn mđrăm mbĭt bi răng kriê klei êđăp ênang ti knông lăn. Kđông kahan răng mgang knông lăn lehanăn dŭm knơ̆ng dhar bruă, dŭm alŭ wăl kreh mâo nanao klei bi mguôp čiăng hâo hưn mtrŭt mjhar phung ƀuôn sang kơ dŭm hdră bhiăn, hŏng hdră mkŏ mjing bruă hâo hưn mđrăm mbĭt hŏng klei bi kƀĭn ƀuôn, bi kƀn êpul bruă Đảng, amâodah ya mta klei bi kƀĭn mkăn mâo hlăm ƀuôn sang. Boh nik jing čiăng kơ phung ƀuôn sang thâo păn kjăp, lehanăn hlue ngă djŏ hŏng djăp kmta mtrŭn mơ̆ng hdră bhiăn.

Amai Lâm Thị Hợp, ti alŭ mrô 1, să Ia Rvê brei thâo, giăm 17 thŭn kbưi hŏng ƀuôn sang Bến Tre hriê dôk hlăm kdriêk Êa Sup mkŏ mjing klei hdĭp mda, kyua mâo klei đru ba, dlăng kriê mơ̆ng bruă sang čư̆ êa, lehanăn djăp êpul êya hlăm alŭ wăl đru gŏ sang thâo săng dŭm hdră êlan mơ̆ng Đảng, knŭk kna, hơĭt ai tiê duh ƀơ̆ng, thâo kral ti jing bruă djŏ tui ngă, lehanăn bruă soh bi ñĕ đuĕ. Phung kahan răng mgang knông lăn ăt mđing uêñ kơ phung ƀuôn sang, nao hâo hưn kơ phung ƀuôn sang. Mơ̆ng dŭm klei hâo hưn snăn kâo ƀuh thâo săng leh kơ klei bhiăn lehanăn ăt bi mguôp hŏng dŭm êpul êya bi răng mgang knông lăn.

Să knông lăn Êa Rvê, kdriêk Êa Sup, čar Daklak ară anei mâo êbeh 2 êbâo gŏ sang hŏng êbeh 6 êbâo 900 čô mnuih dôk hlăm 23 djuê ana hdĭp mbĭt mbla. Hlăm dŭm thŭn êgao, mbĭt hŏng bruă sang čư̆ êa alŭ wăl, kđông răng mgang knông lăn Êa Rvê păn kjăp alŭ wăl, đru bi mghaih msir djăp mta klei êđăp ênang hlăm krĭng ƀuôn sang, bi hơĭt klei êđăp ênang bruă kđi čar, klei êđăp ênang yang ƀuôn. Thượng tá Nguyễn Xuân Sơn, pô ngă bruă kđi čar kđông kahan răng mgang knông lăn Êa Rvê, lač: Sĭt suôr hŏng phung ƀuôn sang, “Huă ƀơ̆ng mbĭt, dôk mbĭt, blŭ klei blŭ mnuih djuê ƀiă”, Êa Rvê mâo mkŏ mjing leh kjăp hdră êlan jih jang phung ƀuôn sang bi răng mgang klei êđăp ênang ti knông lăn.Êpul êya anôk kahan mâo 17 čô ngă bruă hlăm alŭ. Êngao kơ bruă čuăn tui si bruă pô, msĕ si hiu suang dlăng, tiŏ mă ma tuĭ, mtrŭt mjhar phung ƀuôn sang snăn ngă jăk bruă hâo hưn, mtrŭt mjhar phung ƀuôn sang hlue gưt hdră êlan mơ̆ng Đảng, klei bhiăn knŭk kna, mtrŭt mjhar phung ƀuôn sang hlue ngă jăk klei bhiăn knông lăn, amâo mâo ngă soh ôh hŏng klei bhiăn knông lăn, răng kriê klei êđăp ênang hlăm yang ƀuôn, hlăm ƀuôn lehanăn să.

Tui si Đại tá Đỗ Quang Thấm, k’iăng khua bruă Đảng knơ̆ng kiă kriê kahan răng mgang knông lăn čar Daklak, wưng leh êgao, mbĭt hŏng bruă đru phung ƀuôn sang mđĭ kyar klei hdĭp mda, bi hơĭt bruă knuă, kahan răng mgang knông lăn ngă leh hŏng lu bruă čiăng hâo hưn, mtô bi hriăm klei bhiăn truh hŏng phung ƀuôn sang ti knông lăn, mkŏ mjing klei bi kƀĭn hlăm ƀuôn sang, mbha hră hliê, amâodah truh kơ grăp boh sang, bi mguôp hŏng dŭm bruă ngă đru kơ klei duah ƀơ̆ng... Thŭng 2022, kahan răng mgang knông lăn čar Daklak mkŏ mjing leh dŭm pluh klei hâo hưn, mtrŭt mjhar phung ƀuôn sang ti knông lăn đru hlăm bruă mdrơ̆ng hŏng klei ruă tưp, bi kdơ̆ng hŏng phung ngă soh hŏng matuĭ, čhĭ mnia mnuih găn knông lăn soh hŏng klei bhiăn. Lehanăn mkŏ mjing “Hip hră hdră bhiăn knông lăn”, hgŭm hŏng dŭm alŭ wăl mkŏ mjing dŭm êpul kăp kče kơ hdră bhiăn, êpul hgĭm hlue gưt hdră bhiăn... Truh kơ ară anei ti Daklak mâo leh 26 hip hdră bhiăn hŏng êbeh 20 êbâo hdruôm hră; 38 êpul čŏng răng kriê, đru mgang knông lăn... Đại tá Đỗ Quang Thấm lŏ brei thâo: Sa hlăm dŭm klei bi hmô ară anei hmei hlăk dôk ngă jing hgŭm hŏng alŭ wăl, anăn jing bruă “Gŏ sang phung mniê amâo mâo ngă soh hŏng klei bhiăn knông lăn” lehanăn “ƀuôn amâo mâo ôh phung hlăk ai ngă soh hŏng klei bhiăn” čiăng mjing klei lar bra lehanăn dŭm klei hâo hưn mâo pŏk mlar hlăm djăp anôk. Mbĭt hŏng anăn hmei ăt mđĭ hĭn bruă klam jing khua mduôn, khua ƀuôn, mnuih mâo k’hưm čiăng ngă jăk bruă hâo hưn, bi lar, mjuăt bi hriăm hdră bhiăn kơ mnuih ƀuôn sang.

Čar Daklak mâo leh êbeh 73km klông knông lăn bi knông hŏng čar Mondulkiri, ala čar Campuchia; mâo 4 boh să knông lăn dôk hlăm dua kdriêk Êa Sup lehanăn ƀuôn Đon. Jih jang bruă ngă pioh mđĭ kyar bruă duh mkra, dlăng kriê klei suaih pral, lehanăn mđĭ hĭn klei thâo săng kơ phung ƀuôn sang lehanăn đru bi răng mgang kjăp klei êđăp ênang bruă kđi čar, klei êđăp ênang yang ƀuôn, mkŏ mjing krĭng knông lăn knư̆ knư̆ hơĭt kjăp lehanăn mđĭ kyar./.