Hlăm anôk dôk rŭ mkra ti krah ƀuôn prŏng Gia Nghiã, dŭm pluh boh êdeh êdâo bi klei kuai, čuk hli anôk ala. Trương Công Tiến, khua kiă kriê anôk rŭ mkra jŭm ênao Gia Nghiã, knơ̆ng bruă rŭ mdơ̆ng Phú Hiển Vinh, brei thâo, êpul êya ngă bruă dôk bi tiŏ êran hŏng yan adiê, êjai adiê không snăn ngă bruă: Ară anei dơ̆ng čhuang hlăm yan không, snăn êpul êya ngă bruă dơ̆ng bi mguôp hŏng pô kiă kriê bruă knuă srăng tiŏ nao lu êdeh êdâo, mnuih ngă bruă čiăng kơ pral bi leh bruă knuă, kñăm truh hrue 31/12/2022 kơ anăp srăng bi leh anôk rŭ mkra, lehanăn lŏ čuk hli dŭm anôk bruă adôk.

Hồ Sĩ Điệp, k’iăng khua kiă kriê dŭm mta bruă rŭ mkra hlăm čar Daknông lač, Bruă dôk rŭ mkra wăl tač krah ƀuôn prŏng Gia Nghiã mâo ênoh bi liê jih jang 400 êklai prăk, hŏng wưng kčah ngă bruă jing mơ̆ng thŭn 2022 – 2025. Prăk bi liê kơ thŭn 2022 jing 54 êklai prăk. khădah anei jing anôk phŭn kơ bruă dôk rŭ mkra hlăm čar, ƀiădah tuôm hŏng lu klei dleh kpăk kyua bruă ruh mgaih anôk ala, hlŏng truh kơ klei bi mklă hră mơar klei čuăl mkă anôk rŭ mkra, klei tĭng mkă ênoh bi liê...

Snăn ară anei jih jang dŭm bruă dôk dleh mâo mghaih msir leh sơăi, nao hlăm klei ngă bruă yơh:Êpul khua kiă kriê mă leh bruă hŏng êpul ngă bruă mtrŭt êpul êya ngă bruă bi pral mă bruă mtam. Bi brua ruh mgaih anôk ala, snăn ară anei dơ̆ng ba jao ênŭm kơ êpul ngă bruă kñăm čiăng truh kơ hrue 15/11 trŭn kơbruă mtam.

Thŭn 2022 ênoh jih jang prăk duh bi liê kơ jih bruă kluôm hlăm čar Daknông jing 2 êbâo 783, 517 êklai prăk. Tĭng truh kơ jih mlan 10, čar bi liê leh hlăm brô 50% hdră kčah. Boh phŭn kơ klei êmưt hlăm bruă jing, kyua klei ngă hră mơar lŏ bi taih sui hĕ bi leh, lehanăn gun kpăk hŏng bruă ruh mgaih anôk ala. Lê Văn Chiến, k’iăng khua knơ̆ng bruă sang čư̆ êa čar Daknông, brei thâo, ngă hŏng klei pral bi liê ngăn prăk, čar ba jao leh prăk mơ̆ng dŭm anôk bruă amâo lŏ leh bruă knuă, jao kơ dŭm anôk bruă hlăk dôk ngă, mtrŭt phung duh bi liê, phung ngă bruă ngă hŏng klei pral tui tiŏ dŭm mlan không anăp anei, lehanăn ruh mgaih djăp mta klei gun kpăk kơ klei ruh mgaih anôk ala. Daknông ƀuăn srăng bi liê êbeh 95% hdră bi liê mâo jao: Thŭn anei Daknông rŭ mkra lu mta bruă, lu mta bruă hŏng ênoh prăk prŏng, truh kơ giăm mkrah prăk duh bi liê bruă klam hlăm thŭn. Jih jang bruă anei bi mâo sa wưng ngă bruă pioh kơ klei mprăp êmiêt, duh bi liê, snăn truh ti wưng anei jih jang bruă mâo ruah leh ênŭm phung rŭ mkra, kyuanăn yơh klei bi liê ngăn prăk brei bi pral, lehanăn prăk bi liê đĭ mơh. Lehanăn hmei ƀuăn hŏng knŭk kna jing thŭn anei srăng bi liê êbeh 95% ênoh prăk duh kơ bruă kluôm./.