Jing sa čô hlăk ai knŏng jih thŭn êngŭn mlan hŏng bruă pưk hma, ƀiădah bŏ hŏng klei thâo gĭr kreh kruiñ tui hriăm êmuh, lehanăn pral kdal hlăm bruă knuă, jhŏng thâo ba yua klei kreh knhâo hlăm bruă knuă pô, K’Đức, ti să Đinh Trang Thượng, kdriêk Di Linh, čar Lâm Đồng jing leh mnuih tŭ jing hlăm ƀuôn, lehanăn mâo mŭt hlăm Đảng. Leh jing sa čô đảng viên, K’Đức knư̆ hĭn mơh ngă klei thâo bi hmô, jih ai tiê mtrŭt mnuih ƀuôn sang bi mlih ana mnơ̆ng pla, pla mjing djam mtam pioh kơ bruă čhĭ mnia.

“Hŏng klei jing sa čô đảng viên mda asei, wưng leh êgao, kâo mâo bruă klam, jih ai tiê hlăm djăp mta đru kơ bruă Đảng lehanăn êpul khua kiă kriê alŭ wăl jao. Hlăm anăn ba akŏ hlăm klei duh mkra pla mjing, bi mlih mnơ̆ng pla, kñăm ba wĭt ênoh ngăn đah pŏk lehanăn iêo jak jih jang mnuih ƀuôn sang tui ngă msĕ”.

Msĕ snăn mơh, đảng viên K’Ly, ti să Tân Thượng, kdriêk Di Linh ăt ngă jăk klei thâo bi hmô hlăm bruă knuă duh ƀơ̆ng čiăng kơ mnuih ƀuôn sang ƀuh lehanăn tui hlue. Mơ̆ng hrue lông pla ana êbŭng prăng tui si ênoh čoh čuăn, đang hma K’Ly jing leh anôk bi hmô kơ jih jang mnuih ƀuôn sang tui hriăm, mâo leh lu mnuih hlăm krĭng bi tui nao hriăm... K’Ly brei thâo, čiăng bi mlih hdră mă bruă hŏng mnuih ƀuôn sang, snăn pô yơh ngă klei bi hmô êlâo, hŏng dŭm mta bruă ngă bi klă mngač, mâo klei tŭ dưn:

“Čiăng kơ mnuih ƀuôn sang mâo nanao prăk yua hlăm grăp hrue, snăn asei mlei kâo pô mtam yơh nao êlâo hlăm bruă pla ana êbŭng prăng, pioh mă ana ƀiă hruê rông ana sui thŭn, mâo leh mnuih ƀuôn sang tui mđing lehanăn hlue ngă. Ară anei ana êbŭng prăng mâo čhĭ hŏng ênoh mơ̆ng 70.000đ - 100.000p/kg, lu phung ghan mnia hriê tui duah truh hlăm hma, tơl pô amâo mâo djăp mnơ̆ng pioh čhĭ ôh. Anăp anei, kâo gĭr lŏ pŏk phai anôk pla mjing, čiăng kơ mnuih ƀuôn sang dưi mâo ênoh ba wĭt, rơ̆ng kjăp kơ klei hdĭp mda”.

Tui si đảng viên K’Brao, Khua bruă Đảng alŭ Hàng Ùng, să Bảo Thuận, kdriêk Di Linh, bruă ba êlan êlâo mơ̆ng đảng viên hlam bruă duh mkra pla mjing, lehanăn hlăm klei hdĭp ti dŭm boh ƀuôn mnuih djuê ƀiă jing leh bruă yuôm bhăn snăk mâo êpul bruă Đảng kdriêk Di Linh dôk mđing hlue ngă. Kyuanăn, čiăng bi mlih klei mĭn, hdră mă bruă mơ̆ng mnuih ƀuôn sang, snăn đảng viên hlăm êpul bruă Đảng mâo nanao klei bi trông, lehanăn mkŏ mjing hdră mă bruă bi djŏ, lehanăn tŭ jing. Mâo msĕ snăn kơh mnuih ƀuôn sang đăo knang lehanăn tui ngă:

“Êlâo dih pla kphê čŏng rah mjing mă hjăn mơ̆ng asăr snăn mboh amâo mâo lu ôh. Mơ̆ng leh mâo djuê mjeh mrâo jing djuê mrô 138 kphê grep, snăn kphê mboh hĭn mkă hŏng êlâo dih. Mnuih ƀuôn sang mă bruă ară anei mâo klei tŭ dưn hĭn, mâo lu mnuih lŏ hriê bi hriăm êmuh kñăm čiăng mđĭ kyar bruă pô msĕ mơh.

Kdriêk Di Linh ară anei mâo 4.400 čô đảng viên, hlăm anăn mâo 900 čô đảng viên jing mnuih djuê ƀiă. Jing mơ̆ng êpul phung đảng viên anei jing phung ba êlan êlâo hlăm jih jang bruă, đru bi mlih knhuah mĭn, hdră mă nbruă mơ̆ng mnuih djuê ƀiă, đru leh hlăm bruă mđĭ kyar klei hdĭp mda ti kdriêk Di Linh lehanăn hlăm kluôm čar Lâm Đồng./.