Truh hlăm krĭng čư̆ čhiăng Phước Bình, kdriêk Bác Ái, čar Ninh Thuận hlăm dŭm hrue giăm Tết anei, êjai kyâo dliê hlăk luh hla, dơ̆ng bi kdăl mda, snăn đang boh mâo: Boh kruĕ dŭng klĭt mtah 300 phŭn, 50 phŭn durian, boh sưp mơ̆ng gŏ sang Katơr Quỳnh ti ƀuôn Hành Rạc 2 ăt dôk mtah siam. Bi đang boh durian hlăk dôk bi mnga, snăn đang boh kruĕ dŭng hlăk dơ̆ng pĕ leh mprăp kơ yan Tết. Drông phung ngă bruă klei mrâo hlăm sa boh sang mrâo mdơ̆ng giăm êklai prăk ti djiêu sang krum hlue knhuah gru djuê ana Raglai, pô đảng viên êbeh 30 thŭn Đảng hŏng klei mơak yăl dliê:  Êlâo dih gŏ sang ñuăt msĕ hŏng lu gŏ sang mkăn ti Phước Bình knŏng thâo pla kñŭl, lehanăn pla ktơr, êtak snăn amâo mâo jăk mâo klei tŭ dưn ôh. Mơ̆ng leh mâo bruă sang čư̆ êa mtrŭt mjhar bi mlih mnơ̆ng pla mjing gŏ sang ñu jhŏng bi mlih giăm 2 ha pla mjing boh kruĕ dŭng klĭt mtáh, pla boh durian, lehanăn boh sưp, mbĭg anăn mkŏ mjing bruă hiu čhưn ênguê hiu dlăng war bưn đru leh kơ ñu mâo ba wĭt êbeh 150 êklăk prăk/thŭn. Mơ̆ng anăn ñu mtrŭt mjhar, ktrâo atăt mnuih ƀuôn sang bi mlih mơh hdră êlan duh ƀơ̆ng pioh mđĭ kyar klei hdĭp:

Jing đảng viên brei mâo klei thâo bi hmô, thâo piăt êmiêt djah djâo, bi mdoh wăl hdĭp mda, êlan klông bi soh siam, lehanăn pla kyâo bi mâo êyui êđăp. Êlan mơh jing pioh kơ bruă hiu čhưn ênguê lŏ čhŏ mrŏ snăn amâo mâo mnuih čiăng hriê čhưn ôh. Pô klei thâo săng msĕ snăn mơ̆ng anăn ngă klei bi hmô êlâo, mtrŭt mjhar jih jang mnuih, čiăng kơ digơ̆ mđing hmư̆ hlue gưt. Jih jang bruă pô ngă hlăm klei thâo bni hmô, lehanăn dưi lŏ pŏk mlar kơ kluôm yang ƀuôn”.

Ti djiêo anăn jing sa boh sang krum mơ̆ng gŏ sang mnuih Đảng viên mda asei Katơr Chinh. Gŏ sang Chinh ăt jing sa gŏ sang ba êlan êlâo duh bi liê kơ bruă hiu čhưn ênguê yang ƀuôn. Chinh brei thâo, phung tue truh kơ anei êngao kơ klei weh čuă war boh, blei boh, lŏ dơ̆ng dưi ƀơ̆ng dŭm mta mnơ̆ng ƀơ̆ng mơ̆ng djuê ana Raglai msĕ si: Điŏ brông; mnŭ ăm, kan êa krông ăm... Dôk dlăng dŭm ênhiang kdŏ djuê ana Raglai, Churu.

Anôk hmei mâo klei bi mguôp êpul pioh mđĭ kyar bruă hiu čhưn ênguê yang ƀuôn dơ̆ng mơ̆ng Chapi 1 truh Chapi 6. Ară anei hmei hlăk dôk gĭrr mkra wĭt pưk nưh bi siam pioh kơ tue hiu čhưn hlăp mbul hlăm wưng Tết. Êpul phŭn mơ̆ng hmei jing mâo 2 čô đảng viên, kâo jing k’iăng êpul, lehanăn 5 čô mkăn pioh drông tue. Êngao anăn lŏ mâo êpul 13 čô pioh kdŏ mmuiñ.

 Hdră mtrŭn mơ̆ng klei bi kƀĭn prŏng Đảng să Phước Bình, kdriêk Bác Ái mâo leh bruă čuăn lehanăn hdră mghaih msir hlăm bruă lŏ bi kơrŭ lehanăn mđĭ bi lar ai ktang hlăm mnuih ƀuôn sang hgŭm bi duh mkra ala ƀuôn ti alŭ wăl. Mtrŭt mnuih ƀuôn sang bi mlih klei mĭn, knhuah hdĭp, mđrăm mbĭt hŏng ƀuôn sang bi mkŏ mjing klei bi hmô kơ bruă “Hiu čhưn ênguê lăn mnga êa mơak, lehanăn dhar kreh yang ƀuôn”, pô phŭn jing mơ̆ng phung đảng viên mnuih Raglai.  Leh mâo klei hâo hưn, mtrŭt mjhar, truh ară anei kluôm să Phước Bình, kdriêk Bác Ái mâo leh 120 gŏ sang Raglai nao hgŭm, hlăm anăn mâo truh 60 gŏ sang dưi ngă djŏ hŏng klei ngă djŏ hŏng klei čiăng kơ bruă mđĭ kyar hiu čhưn ênguê yang ƀuôn. Bruă Đảng lehanăn knơ̆ng bruă sang čư̆ êa să Phước Bình mâo leh hdră mkŏ mjing ngă dŭm mta bruă mâo klei knŭk kna kăp đru, lehanăn mâo mnuih ƀuôn sang jing pô ngă; Msĕ si bruă rŭ mdơ̆ng sang krum, mkra sang tlô, bi mdoh wăl riêng gah, mkŏ dăp anôk kăp dưm djah, mdha kăp hưn, mdha ktrâo êlan...

 Ngă bruă mđĭ kyar hiu čhưn ênguê yang ƀuôn jing leh anôk bi hmô ti să Phước Bình wưng thŭn 2019-2022, ênoh mnuih hiu čhưn hlăm dŭm alŭ wăl lăn mnga êa mơak, dhar kreh ti să Phước Bình mâo leh klei đĭ kyar jăk, boh nik hlăm dŭm hrue mdei, knăm mơak. Grăp thŭn Phước Bình mâo drông mơ̆ng 5.000 – 7.000 gưl čô tue. Mnuih ƀuôn sang kơ anei bi mlih leh klei mĭn, mâo klei thâo bi hghŭm hlăm bruă duh ƀơ̆ng mđĭ kyar klei hdĭp gŏ sang pô. Aduôn Pi Năng Thị Cô, K’iăng khua bruă Đảng să Phước Bình, kdriêk Bác Ái brei thâo:

Boh nik jing bi mlih mnơ̆ng pla. Mơ̆ng anăn ƀuh mtam klei hdĭp mâo klei bi mlih sĭt, mâo čhĭ mnia, lŏ mâo ngă lu mta bruă mkăn. Tinei mâo truh 5 djuê ana ayŏng adei hdĭp mbĭt anăn jing: Yuăn; Čăm; Raglai, Churu ƀiădah hdĭp hlăm klei thâo bi mguôp snăk. Mdê hŏng êlâo, ară anei mâo leh klei bi mlih.)

Mơ̆ng boh tŭ dưn leh mâo, knơ̆ng bruă sang čư̆ êa kdriêk Bác Ái, čar Ninh Thuận lŏ dơ̆ng mtrŭn hdră mă bruă mrâo wưng thŭn 2023 – 2025 lehanăn tă hdră truh thŭn 2030 pioh mđĭ bruă hiu čhưn ênguê hlăm kdriêk. Hlăm anăn, lŏ pŏk mlar bi leh dŭm mta mnơ̆ng kơ bruă hiu čhưn ênguê ti să Phước Bình. Boh nik hlăm thŭn 2024 anei, hlue ngă mta bruă mrô 6 mơ̆ng hdră lăn čar kñăm mđĭ kyar klei duh mkra ala ƀuôn krĭng mnuih djuê ƀiă, krĭng čư̆. Trần Văn Toàn, Khua adŭ bruă dhar kreh hâo hưn kdriêk Bác Ái, čar Ninh Thuận brei thâo, hdră bi hmô bruă hiu čhưn ênguê yang ƀuôn jing sa klei găl mơ̆ng alŭ wăl, lehanăn jing anôk mrâo kơ bruă mkŏ wĭt klei duh mkra ti kdriêk.

Lŏ dơ̆ng hlăm thŭn 2024 lŏ bi lar truh kơ lu gŏ sang mkăn mđĭ kyar bruă hiu čhưn ênguê mơh, mbĭt hŏng dŭm gŏ sang mâo leh êlâo hlăm thŭn 2022, 2023 lŏ dơ̆ng bi kjăp, bi siam ngă bruă hŏng klei djŏ hĭn hlăm klei kiă kriê mâo klei kreh knhâo hĭn, lehanăn ba yua hdră êlan mă bruă mâo klei bhiăn kjăp kñăm mjing klei thâo bi lar hlăm mnuih ƀuôn sang, pioh iêo jak jih jang mđrăm mbĭt mđĭ kyar bruă hiu čhưn ênguê hlăm ƀuôn.)

 Čiăng atăt Phước Bình mâo klei đĭ kyar jing ƀuôn hiu čhưn ênguê hlăm yang ƀuôn, lehanăn dưi lŏ pŏk bi lar bruă hiu čhưn ênguê anei bi mguôp hŏng dŭm boh čar msĕ si Ninh Thuận, hlăm wưng tinăp, phung đảng viên mnuih Raglai ti să Phươc Bình, kdriêk Bác Ái srăng lŏ dơ̆ng mđĭ hĭn bruă klam pô hlăm klei mtrŭt mjhar mnuih ƀuôn sang mbĭt hŏng alŭ wăl bi sai ai mkŏ mjing klei hiu čhưn ênguê lăn mnga êa siam, lehanăn dhar kreh yang ƀuôn”./.