Dŭm thŭn êlâo gŏ sang BNướch Ngang, dôk ti êpul anôk dôk A Duông, wăl krah Prao, kdriêk čư̆ čhiăng Đông Giang, čar Quảng Nam dôk hlăm ênoh gŏ êsei ƀun. Grăp hrue, BNướch Ngang hiu hlăm dliê ngă hma pưk pla mjing hbei mtei, mnơ̆ng ƀơ̆ng... Klei hdĭp lĕ nanao hlăm klei dleh dlan. Leh kơ anăn,  BNướch Ngang mâo anôk bruă lŏ hma čar Quảng Nam lehanăn mâo bruă sang čư̆ êa kdriêk Đông Giang đru mjeh mnơ̆ng pla ngă đang war dliê kyâo. Ară anei gŏ sang BNướch Ngang mâo kiă kriê leh 4 hécta ana sâm ba kích hrah jŭ, 5 hécta ana akasi lehanăn ana săm đrao lehanăn ana quế. Êngao anăn ñu lŏ rông bê, rông ŭn jŭ... Grăp thŭn ñu mâo prăk mnga mơ̆ng 150 truh kơ 200 êklăk prăk. BNướch Ngang jing sa čô đảng viên ba akŏ nanao hlăm jih jang bruă. Ară anei ñu jing khua kiă kriê êpul anôk dôk A Duông, wăl krah Prao, kdriêk Đông Giang. Ñu pioh leh lu mmông bi tuôm lehanăn ktrâo atăt mnuih ƀuôn sang Kơtu mđĭ kyar klei hdĭp. Hlei pô hdĭp hlăm klei dleh dlan, čiăng đru kơ mjeh mnơ̆ng pla, snăn BNướch Ngang đru mtam. 

“Pô jing đảng viên brei mâo klei thâo bi hmô hŏng jih jang mnuih hlăm ƀuôn pô. Klei kâo duh ƀơ̆ng jing leh klei jih jang mnuih bi tui hriăm. Grăp blŭ bi kƀĭn ƀuôn, kâo kreh ktrâo atăt kơ mnuih ƀuôn sang tui hriăm, kơ hdră pla mjing, lehanăn rông mnơ̆ng. Čang hmăng bruă sang čư̆ êa alŭ wăl lŏ đru kơ dŭm gŏ êsei mâo lăn pla mjing, đru mjeh mnơ̆ng pla, đru kơ digơ̆ mâo bruă knuă mă lehanăn mâo mnơ̆ng ba wĭt hơĭt”.

BNướch Ngang kreh hâo hưn mtô mblang mđĭ ai mnuih ƀuôn sang mkŏ mjing klei hdĭp dhar kreh mrâo, lăn lui hĕ ya mta klei bhiăn amâo lŏ djŏ ôh. A Lăng Minh, djuê ana Kơ Tu ti wăl krah Prao yăl dliê, êlâo dih, gŏ sang dôk hlăm klei dleh dlan, mâo  BNướch Ngang nao truh kơ sang ktrâo atăt hdră duah ƀơ̆ng, rông mnơ̆ng lehanăn pla mjing snăn ară anei klei hdĭp mdul leh klei dleh dlan:

“Đảng viên BNướch Ngang ba akŏ nanao hlăm klei mđĭ kyar bruă duh mkra ti alŭ wăl. Êngao anăn lŏ ktrâo atăt kơ mnuih ƀuôn sang hdră rông mnơ̆ng, pla mjing ana sâm ba kích hrah jŭ snăn klei hdip mnuih ƀuôn sang ară anei mdul leh, dơ̆ng tlaih mơ̆ng klei dleh dlan”.

Lu đảng viên mda asei ti krĭng dlông kdriêk Đông Giang, čar Quảng Nam mâo nanao ai tiê thâo ba anăp, jhŏng mĭn, jhŏng ngă, kpưn đĭ tlaih mơ̆ng ƀun. Đảng viên mda asei ATing Nấu ti wăl krah Prao, kdriêk Đông Giang ăt jing sa klei bi hmô. Ară anei, ATing Nấu rŭ mjing leh anôk rông ŭn jŭ, rông bip, kuai ƀăng kan, lehanăn pla mjing lu mta ana boh kroh.

 Nguyễn Hữu Sanh, Khua êpul hgŭm phung ngă lŏ hma kdriêk Đông Giang, čar Quảng Nam brei thâo: Lu phung đảng viên tinei bi êdah bruă klam ba akŏ kơ klei bi hmô hlăm bruă duh ƀơ̆ng, mđĭ kyar klei hdĭp. Mâo leh dŭm klei bi hmô mơ̆ng klei thâo duh ƀơ̆ng msĕ si BNướch Ngang, A Ting Nấu... Diñu mâo nanao ai tiê "đảng viên ba êlan êlâo, mnuih ƀuôn sang tui tluôn”, jing leh sa klŏ boh tâo guh mngač hlăm klei bi ktưn mđĭ kyar klei hdĭp mda, msir klei ư̆ êpa bi hrŏ klei ƀun ƀin:

“Đảng viên ba akŏ hlăm klei duah ƀơ̆ng. Boh nik jing đảng viên dôk hlăm ƀĭng hgŭm phung ngă lŏ hma, thâo ktưn mđĭ kyar klei duh ƀơ̆ng, pŏk phai đang war, mjing leh war bưn bi hmô mâo ênoh ba wĭt prŏng, đru kơ phung ngă lŏ hma kpưn đĭ tlaih ƀun hŏng klei kjăp”.

Grăp thŭn, Êpul hgŭm phung ngă lŏ hma čar Quảng Nam hgŭm leh hŏng dŭm dhar bruă djŏ tuôm, dŭm alŭ wăl đru 1.500 čô đảng viên jing ƀĭng hgŭm phung ngă lŏ hma mâo čan prăk hŏng mnga hdjul, mkăp mjeh mnơ̆ng pla, mnơ̆ng rông, đru kơ phung đảng viên duh ƀơ̆ng mkŏ mjing klei hdĭp jăk yâo. Hồ Quang Bửu, K’iăng khua knơ̆ng bruă sang čư̆ êa čar Quảng Nam brei thâo: Lu đảng viên amâo mâo djŏ knŏng thâo duh ƀơ̆ng đuič ôh, ƀiădah lŏ jih ai tiê hur har đru lu mnuih ƀuôn sang, mđĭ ênoh mâo ba wĭt, bi hơĭt klei hdĭp mda, đru hlăm bruă mkŏ mkra krĭng ƀuôn sang mrâo:

“Ară anei mâo đa đa Đảng viên ti dŭm kdriêk čư̆ čhiăng diñu mđĭ kyar bruă knuă jăk snăk, diñu mguôp leh hlăm klei duh mkra hŏng klei kdlưn hĭn lehanăn jing leh bruă bi hmô jăk êdi kơ mnuih ƀuôn sang bi tui hriăm. Msĕ si bruă diñu pla mjing ana sâm lehanăn ana êa drao ba wĭt leh lu klei tŭ dưn êdi. Tơdah ti krĭng dlông mâo lu Đảng viên thâo bi hmô msĕ snei, sĭt nik klei hdĭp mnuih ƀuôn sang djăp mtam mâo klei bi mlih”./.