Khua bruă kƀĭn ala Trần Thanh Mẫn brei thâo, gưl 1, Klei bi kƀĭn tal 9 mă leh bruă hŏng klei kjăp, klă mngač, mâo klei đua klam lehanăn pral jih ai tiê hlăm bruă kđi čar, mjing klei sa ai êdi hlăm phung bi ala bruă kƀĭn ala. Hlăm anăn, boh tŭ bruă yuôm bhăn mơ̆ng kđi čar, tui si klei bhiăn hlăm klei bi kƀĭn anei, mâo bi mklă leh hdră mtrŭn ksiêm wĭt bruă bi mlih hdră bhiăn phŭn thŭn 2013 čiăng lŏ dơ̆ng ngă bi leh bruă dăp wĭt êpul bruă kđi čar. Hlue ngă hdră êlan anei, hrue kăm êgao, êpul khua kiă kriê anôk bruă Mặt trận čar kwar Việt Nam ăt mkŏ mjing mơh klei bi kƀĭn, mă klei blŭ kơ klei čih mkra hdră mtrŭn mlih mrâo, thiăm mbŏ đa đa mta hlăm hdră bhiăn phŭn thŭn 2013. Kiă kriê klei bi kƀĭn, K’iăng khua bruă mặt trận čar kwar Việt Nam Hoàng Công Thủy lač:

“Đơ knua klei bi mlih, thiăm mbŏ hdră bhiăn phŭn tal anei jing knŏng ƀiă, mđing kơ 8/120 mta hlăm hdră bhiăn phŭn thŭn 2013 kñăm mdưm hlăm klei bhiăn jih jang hdră êlan mơ̆ng Đảng kơ klei dăp wĭt dŭm anôk bruă mơ̆ng bruă  Mặt trận čar kwar Việt Nam, dŭm êpul bruă kđi čar, dŭm êpul êya yang ƀuôn mâo Đảng lehanăn knŭk kna jao bruă čuăn; bi leh bruă mkŏ mjing bruă sang čư̆ êa alŭ wăl hlăm 2 gưl, čiăng bi jĕ mnuih ƀuôn sang, giăm hŏng mnuih ƀuôn sang, mă bruă kơ mnuih ƀuôn sang bi jăk hĭn.”

 Khua bruă kƀĭn ala Trần Thanh Mẫn brei thâo: Klei čih mkra hdră mtrŭn mơ̆ng anôk bruă kƀĭn ala kơ dŭm klei bhiăn, hdră êlan, boh nik bruă mđĭ kyar klei duh mkra êngao knŭk kna, mâo 7 hdră 17 mta, hlăm anăn mâo hdră mtrŭn kluôm, djŏ tuôm kơ klei bi mlih anôk duh mkra mnia mblei, klei đru kơ ngăn prăk, klei brei čan prăk, lehanăn blei mprăp; đru kơ bruă kreh knhâo, kdrăp mrâo, mlih mrâo hŏng klei knhêč, bi mlih mrô, lehanăn mjuăt bi hriăm mnuih mă bruă, đru phung duh mkra man dưn lehanăn prŏng, phung duh mkra ba anăp.

“Mđing hĭn êdi jing kơ hdră mtrŭn bruă duh mkra êngao knŭk kna. Kyuadah, hdră mtrŭn mơ̆ng Đảng mrâo bi klă hrue 4/5 snăn knŭk kna, Khua knŭk kna ăt bi kƀĭn leh dua gưl mprăp kơ hdră mtrŭn čiăng ba mdah kơ bruă kƀĭn ala.   Đảng tă leh hdră snăn drei ngă yơh bi jăk. Kâo jao kơ dhar bruă duh mkra, dhar bruă ngăn prăk bi mguôp kjăp hŏng phŭn bruă ngăn prăk lehanăn dŭm anôk bruă djŏ tuôm bi mă bruă mbĭt”.

Khua bruă kƀĭn ala Trần Thanh Mẫn mñă, hdră mtrŭn kơ dŭm klei bhiăn, hdră êlan kơ bruă mđĭ kyar klei duh mkra êngao knŭk kna, kñăm pŏk klei duh bi liê jăk hlăm bruă duh mkra mnia mblei, đru hlăm bruă mâo dưn yua lăn ala, anôk duh mkra mnia mblei, đru kơ ngăn prăk, brei čan prăk, bi hgŭm bruă knŭk kna hŏng êngao knŭk kna, đru hlăm bruă kreh knhâo, kdrăp mrâo, bi mlih mrâo hŏng klei knhêč, bi mlih mrô, lehanăn mjuăt bi hriăm mnuih mă bruă, đru hlăm bruă mkŏ mjing phung duh mkra prŏng lehanăn man dưn, phung duh mkra ba anăp… Khua bruă kƀĭn ala  Trần Thanh Mẫn lač:

“Drei bi mlih yơh klei mĭn, knŭk kna tă êlan bi mlih, amâo mâo djŏ knŏng kăp ksiêm đuič ôh, tui si Khua gĭt gai Đảng Tô Lâm mtă leh hlăm lu blư̆. Brei mâo hdră êlan mă bruă djŏ hŏng klei bhiăn, lehanăn đru hlăm bruă bi mlih mrô, mlih mrâo hŏng klei knhêč, anăn yơh jing hdră knŭk kna mđrăm mbĭt hŏng anôk bruă êngao knŭk kna hlăm klei mđĭ kyar… Kâo mtă brei mâo klei ksiêm dlăng bi nik phung dưi dưn hdră êlan mă bruă anei, rơ̆ng dưi mă bruă hŏng klei tŭ dưn djŏ tui si klei bhiăn leh čoh čuăn.”

Pioh prăp êmiêt kơ jih jang bruă bi kƀĭn tal 2 hlăm klei bi kƀĭn gưl 9, hrue kăm êgao, dhar bruă gĭt gai bruă kƀĭn ala ăt mă leh mơh klei blŭ kơ 3 mta bruă čiăng ba mdah kơ anôk bruă kƀĭn ala hlăm hrue 19/5, mâo: hdră êlan duh bi liê bruă mkra êlan dơ̆ng pral Quy Nhơn - Pleiku; hdră êlan mkra êlan dơ̆ng dar tal 4 ƀuôn prŏng Hồ Chí Minh.