Khua anôk bruă duh mkra Vũ Hồng Thanh lač, bruă mgô̆ ngă hră mơar hlăm klei bi mnia mblei lăn, kyuadah mâo lu klei ênưih snăk lĕ hlăm klei duah mjhua hŏng dŭm mta mtrŭn mơ̆ng hdră bhiăn knŭk kna duah êlan hjăn pô ngă klei dưi bi čhĭ mnia lăn, ba hriê klei amâo mâo ênuh ênô ôh hlăm klei bi mnia mblei, kơ klei tŭ dưn truh hŏng dŭm tĭng klei bi mnia mblei lăn ala. Kyuadah boh sĭt brei ƀuh, phung mâo mnêč ghan lăn bi mguôp hdơ̆ng diñu ngă bi rŭng jih kơ klei ênoh ênil lăn ala, amâo lŏ djŏ sĭt ôh hŏng klei čiăng, anôk mâo lehanăn kơ ênoh ênil lăn ala.

Phung bi ala mâo leh klei akâo bi kna jih jang djăp mta djŏ hŏng mta mtrŭn kơ klei ngă hră mơar, lehanăn klei bi mnia mblei lăn ala. Khua knơ̆ng čih hră, khua adŭ bruă kƀĭn ala Bùi Văn Cường lač snei:

 “Ênoh čuăn kơ klei bi klă ênoh ênil lăn ala, dah mâo klei bi čhĭ mnia, ngă bruă bi rŭ mdơ̆ng, bi mlih klei dưi djă yua lăn, amâodah amâo lŏ yua. Siămdah, klei nbi knăl čiăng thâo kral amâo djŏ pioh yua ôh, ƀiădah čiăng čhĭ mnia, ka mâo klei čoh čuăn klă ôh. Mơ̆ng anăn mơh dleh dưi bi mklă mnuih blei sang pioh dôk hĕ, amâodah lŏ ghan mnia. Kyuanăn brei mâo klei lŏ bi ksiêm nik klei anei”.

Khua anôk bruă pô bi ala Nguyễn Thị Thanh lač, boh sĭt brei ƀuh ti dŭm alŭ wăl bruă ngă hră mơar klei kơ sang lăn, amâo mâo djŏ knŏng mĭng kơ klei bi lông mđĭ ênoh đuič ôh. Ƀiădah klei dôk găn jing ruă kŏ êdi phung ghan mnia lăn ala duah mjhua ngă mtŭk mtŭl jih klei kơ ênoh ênil lăn ala. Nguyễn Thị Thanh akâo brei lŏ mâo mta mtrŭn klă mngač dưi thâo bi knăl ti jing mnuih čiăng yua lăn sĭt hŏng mnuih duah lăn knŏng lŏ ghan mnia. Lehanăn brei mâo klei bi sa hnơ̆ng hlăm jih klei kuôl kă hlăm klei bi mnia mblei lăn ala, thâo brei mưn lăn.

 “Bruă hưn mdah klei bi lông mđĭ ênoh jing ngă djŏ hŏng bruă rŭ mdơ̆ng sang dôk pioh čhĭ. Leh ruĕ bruă rŭ mdơ̆ng sang dôk pioh čhĭ anăn. Hlei pô djŏ djŏ anôk bi mđăo anăn tơdah amâo mâo ngă djŏ ôh hŏng jih jang klei bhiăn ngă bruă hlăm bruă bi tĭng tla, lehanăn bi tui tiŏ hdră êlan mơ̆ng klei bhiăn lăn ala, arăng lŏ dơ̆ng mlih jao, amâodah čhĭ hĕ anôk anăn kơ pô mkăn. Hmei pia klei diñu ngă anăn jing mjhua hŏng klei bhiăn duah êlan čhĭ lăn hŏng klei mđĭ ênoh hĭn. Anei jing sa mta klei yăl dliê bi hmô kơ klei duah mjhua hŏng klei bhiăn lăn ala, snăn akâo kơ dŭm anôk bruă djŏ tuôm mâo dŭm klei bhiăn mă bruă bi kjăp hĭn klei kơ lăn ala”.

Khua bruă kƀĭn ala Vương Đình Huệ lač: Klei bi mnia mblei lăn ala jing sa hlăm dŭm mta bruă krơ̆ng kơ bruă mđĭ kyar klei duh mkra. Bruă bi mlih klei bhiăn kơ lăn ala jing sa mta bruă dleh snăk, brei mâo hdră êlan ksiêm tĭng bi kjăp mkra mjing klei bhiăn bi djŏ, kñăm čiăng dưi mghaih msir jih djăp mta klei, amâo mâo lĕ hlăm klei k’hư kơ mnuih duah mjhua hŏng klei bhiăn ngă klei amâo mâo djŏ, lehanăn đăm ôh mkra leh klei bhiăn lehanăn lŏ wĭt mkra, bi mlih nanao ngă dleh dlan hlăm klei mă bruă hŏng lăn ala:  

 “Prŏng hĭn êdi hlăm bruă klei kơ sang lăn, jing bruă čuăl mkă. Djŏ tuôm hlăm bruă čuăl mkă djă yua lăn ala, mđĭ kyar dŭm hdră êlan pioh rŭ mkra, mkŏ wĭt bruă duh mkra mnia mblei. Klei adôk ka kjăp anăn yơh jing bruă čuăl mkă tui si thŭn mlan. Bi čuăl mkă tui si anôk ala. Tơdah djŏ hlăm sa wưng mâo hĕlu bruă rŭ mkra, snăn srăng lĕ hlăm klei mdơ̆ng lu sang ƀiădah amâo mâo pô blei. Snăn bruă mkŏ wĭt bi djŏ hŏng klei dưi mâo hlăm bruă bi mnia mblei, hŏng phung duh mkra, hŏng mnơ̆ng dhơ̆ng mâo, snăn jih klei anăn jing kbiă hriê mơ̆ng bruă čuăl mkă sơăi, snăn drei ƀuh ti anei jing awăt êdi hlăm bruă čuăl mkă"”/.