Khua bruă Đảng gưl dlông, khua gĭt gai mặt trận čar kwar gưl dlông Việt Nam Đỗ Văn Chiến brei thâo: Phung bi ala leh anăn mnuih ƀuôn sang bi êdah klei đăo knang kơ boh tŭ dưn hlăm bruă mkŏ mjing leh anăn ƀư̆ mkra hlăm Đảng, boh nik hlăm bruă gang mkhư̆ klei ƀơ̆ng ngăn, klei amâo mâo jăk dưi gĭt gai hluê ngă ktang phĭt, blŭ nao mbĭt hŏng mă, amâo mâo knhal. Dŭm klei hưn mdah mơ̆ng phung bi ala hmăng hmưi dŭm hdră êlan djŏ guôp, dưi rơ̆ng klei hơĭt mđĭ kyar lăn čar, hưn mdah mđing hmư̆ dŭm klei hưn mơ̆ng mnuih ƀuôn sang hŏng klei bhiăn djă yua lăn (mkra mlih), hdră mkăp kơ klei bhiăn čhĭ mnia lăn ala (mkra mlih), klei bhiăn sang dôk (mkra mlih)… năng mđing hĭn jing bruă đru kơ dŭm hdră êlan mđĭ kyar bruă duh mkra ala ƀuôn:

 “Bi hŏng hdră mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng. Dŭm hdră êlan đru kơ mnuih ƀuôn sang kơ lăn dôk, lăn mkra mjing, êa jua năng djŏ srăng bi liê mơ̆ng bruă drei dăp kơ klei duh bi liê bruă knŭk kna. Sơnăn srăng hluê ngă hdră duh bi liê amâo mâo dưi brei čan ôh. Tal 2 jing ară anei alŭ wăl dleh sơnăk hlăm bruă pluă ngăn prăk. Pluă mbĭt hŏng ngăn prăk duh bi liê gơ̆ lač sơnăn đuč, ƀiădah amâo mâo ôh klei mtô pluă mbĭt ngăn prăk duh bi liê hŏng sa hdră tŭ dưn kyuanăn alŭ wăl ăt dôk dleh dlan êdi”.

Mơ̆ng boh sĭt dŭm alŭ wăl, anôk bruă, phung bi ala hưn mdah hŏng Đảng leh anăn knŭk kna gĭt gai dŭm anôk bruă djŏ tuôm, ba mdah dŭm hră mơar klei bhiăn ala čar čiăng gang mkhư̆, mghaih msir boh klei đa đa phung knuă druh, phung mă bruă knŭk kna, phung mâo klei dưi mplĕ kơ pô anei pô dih, ñĕ đuê, huĭ đua klam, răng mgang klei êđăp ênang êgao hnơ̆ng đei, amâo mâo mghiah msir dŭm mta bruă, hmăi kơ bruă mkra mjing, mnia mblei mơ̆ng knơ̆ng bruă leh anăn klei hdĭp mnuih ƀuôn sang. Đru mguôp klei blŭ kơ mta phŭn anei, khua kiă kriê Dhar bruă duh mkra mơ̆ng bruă kƀĭn ala Vũ Hồng Thanh:

 “Hlăm klei hưn mŏng mặt trận ăt mâo klei huĭ đua klam, plĕ kơ pô anei, pô dih. Êjai sa bruă êlâo dih dưi mâo lu klei sa ai mgaih msir. Ƀiădah ară anei knŏng sa dhar bruă amâo mâo tŭ ư lŏ wĭt kâo klei blŭ leh anăn wĭt ngă hră mơar luč lu hruê mmông leh anăn prăk bi liê ăt đĭ ktang”.

K’iăng khua bruă Kƀĭn ala Trần Thanh Mẫn mñă klă: klei hưn mdah bi êdah kleui blŭ mơ̆ng phung bi ala leh anăn mnuih ƀuôn sang, mñă brei mbŏ dŭm mta phŭn kơ boh klei bi êmưt klei đĭ kyar, êmưt klei bi klă čuăl mkă, mlih mrâo klei ngă hră mơar knŭk kna, bi hơĭt wăl duh bi liê mnia mblei čiăng bi leh klei hưn mdah hnơ̆ng tŭ jăk:

 “Hlăm klei bi tuôm hŏng phung bi ala kâo buh lu boh klei ngă soh hlăm kluôm ala hưn mdah klah čŭn bi mŭt hlăm anăn. Tal 2 jing bruă čhĭ mnia, dŭ mdiăng matui ară anei amâo djŏ kñŏng êlan êbat jơ̆ng ôh ƀiădah wăt êlan êdeh phiơr, dleh dưi ksiêm dlăng. Kahan ksiêm ƀuôn prŏng Hồ Chí Minh mrâo čŭt hưn klei ngă soh hŏng dŭm pluh čô”.

Ksiêm dlăng klei hưn kơ bruă mnuih ƀuôn sang mơ̆ng Bruă kƀĭn mlan 4/2023, Dhar bruă gĭt gai bruă kƀĭn ala ăt ktrâo klă klei ktuê dlăng brei ƀuhm hlăm 18 thŭn mơ̆ng thŭn 2002 truh ti thŭn 2021, anôk bruă ênua yang ƀuôn alŭ wăl mă soh ênua hŏng klei mgô̆, mâo leh êbeh 4 êbâo gŏ sang mnia mblei arăng mă soh. Khua êpul bruă ƀuôn sang Dương Thanh Bình lač klă:

 “Kyua bruă tla prăk ênua yang ƀuôn amâo mâo djŏ hŏng klei čuăn mơ̆ng klei bhiăn ala čar, kyuanăn dŭm gŏ sang knơ̆ng bruă, grăp čô ka dưi mkă ôh mmông tla prăk ênua yang buôn čiăng mâo klei tŭ mơ̆ng yang ƀuôn, ênua yang ƀuôn, boh nik mâo lu mnuih tla prăk ênua yang ƀuôn mâo leh giăm 20 thŭn hŏng anei ngă kơ lu mnuih ƀuôn sang čôñ ăl. Mâo đa đa ngă leh hdră kčŭt hưn, đa đa truh kčŭt hưn ksiêm duah, bi klă, srăng mgaih msir jih hnơ̆ng dŭm klei hưn mdah mơ̆ng phung bi ala”.

Khua bruă kƀĭn ala Vương Đình Huệ ăt mnă kơ lu klei dôk mâo, klei dleh kpăk hlăm hdră ngăn prăk, čih mnia sang lăn mâo phung bi ala hưn mdah hlăm dŭm mmông bi tuôm, mñă kơ knŭk kna bi klă djŏ hĭn kơ boh sĭt thŭn 2023, bi klă phŭn agha čiăng mâo hdră êlan mgaih msir djŏ guôp. Hlăm anăn, gĭt gai hdră ngăn prăk mâo mta kñăm, kñăm mlih mrâo klei ngă hră mơar knŭk kna, bi hơĭt wăl duh bi liê mnia mblei, hyuă kjăp hĭn hdră bhiăn bruă knŭk kna. Mbĭt anăn ktuê dlăng, čŏng pô mâo dŭm hdră êlan bi mdrơ̆ng, ksiêm dlăng tŭ dưn hŏng klei ruă tưp Covid-19.